Baruti ba Babedi Bao ba Ilego ba Thabela Dipuku tša Russell

KA 1891, Charles Taze Russell, yo a ilego a dira modiro o mobotse kudu magareng ga Bakriste ba therešo ba rapelago Jehofa, o ile a etela Yuropa ka lekga la pele. Go ya ka dipego tše dingwe, nakong ya ge a be a khutša kua Pinerolo, Italy, Russell o ile a kopana le Moprofesara Daniele Rivoire, yo e kilego ya ba moruti wa sehlopha sa bodumedi seo se bego se bitšwa ma-Waldo. * Gaešita le ge Rivoire a ile a tšwela pele a kgomaretše ma-Waldo ka morago ga ge a tlogetše bodiredi bja gagwe, o ile a ba le kgopolo e bulegilego gomme a bala dikgatišo tše dintši tšeo C. T. Russell a di ngwadilego.

Ka 1903, Rivoire o ile a fetolela puku ya Russell ya The Divine Plan of the Ages go Setaliana gomme a dira gore e gatišwe ka ditshenyagalelo tša gagwe. Se se ile sa dirwa pele ga ge tokollo ya semmušo ya Setaliana e ka gatišwa. Go ketapele ya puku, Rivoire o ile a ngwala gore: “Re bea tokollo ye ya pele ya Setaliana ka tlase ga tšhireletšo ya Morena. Eka a ka e šegofatša e le gore, go sa šetšwe diphošo tša yona, e ka tsenya letsogo go godišeng leina la gagwe le le kgethwa-kgethwa gomme e tutuetše bana ba gagwe ba ba bolelago Setaliana gore ba be le boineelo bjo bogolo. Ka go bala puku ye, eka dipelo tša bohle bao ba lebogago bohlokwa bja lehumo, bohlale le tsebo ya go tseba merero ya Modimo le lerato, ba leboge Modimo ka boyena, yoo ka kgaugelo ya gagwe go gatišwa ga puku ye go ilego gwa kgonega.”

Le gona Rivoire o ile a thoma go fetolela Zion’s Watchtower and Herald of Christ’s Presence ka Setaliana. Makasine wo, e lego sebopego sa pele sa The Watchtower, o ile wa tšwelela e le kgatišo ya gane ka ngwaga ka 1903. Gaešita le ge Moprofesara Rivoire a sa ka a fetoga Morutwana wa Beibele, ka ge Dihlatse tša Jehofa di be di bitšwa bjalo ka nako yeo, o ile a bontšha kgahlego e kgolo ka go phatlalatša molaetša wa Beibele ka ge o hlalositšwe ka dikgatišong tša Barutwana ba Beibele.

‘Go Ile gwa ba Bjalo ka ge Eka go Khumoga Dilo tše e Kego  ke Makgapetla Mahlong A-ka’

Moruti yo mongwe wa mo-Waldo yo a ilego a thabela dikgatišo tša Russell e be e le Giuseppe Banchetti. Tatago Giuseppe, yo a bego a sokologetše Bokatholikeng, o ile a mo nea thuto ya bo-Waldo. Ka 1894, Giuseppe o ile a ba moruti gomme a hlankela ditšhabeng tše dintši tša ma-Waldo kua Apulia le Abruzzi gape le dihlakahlakeng tša Elba le Sicily.

Tokollo ya molao ya Setaliana ya puku ya Russell ya Divine Plan of the Ages e ile ya gatišwa ka 1905. Banchetti o ile a ngwala tsheka-tsheko e mafolofolo ya puku yeo. E ile ya tšwelela ka gare ga kgatišo ya Protestanta e lego La Rivista Cristiana. Banchetti o ile a ngwala mabapi le puku ya Russell gore: “Go rena ke selo seo se hlabišitšego seetša kudu le tlhahlo e kgonthišeditšwego yeo Mokriste yo mongwe le yo mongwe a ka e hwetšago e le gore a be le thuto e nago le mohola le e šegofaditšwego ya Mangwalo a Makgethwa . . . Gatee-tee ge ke e bala, go ile gwa ba bjalo ka ge eka go khumoga dilo tše e kego ke makgapetla  mahlong a-ka, bjale ka ge eka tsela ya go ya go Modimo ke e lebanyago le e bonolo. Gaešita le dilo tšeo gantši di bego di bonala eka di a ganetšana di ile tša nyamelela. Dithuto tšeo pele di bego di bonala e le tše thata di ile tša bonala di le bonolo gomme di amogelega gabotse. Dilo tšeo nakong e fetilego di bego di sa kwešišege di ile tša kwagala gabotse. Morero o makatšago wa go phološwa ga lefase ka Kriste o ile wa tšwelela go nna ka tsela e bonolo kudu mo e lego gore ke ile ka gapeletša go bolela go swana le Moapostola gore: “A! Bodiba bya lehumô la Modimo, le bya bohlale bya xaxwe, bya tsebô ya xaxwe!”—Ba-Roma 11:33.

Bjalo ka ge go boletšwe ka 1925 ke Remigio Cuminetti, Banchetti o ile a bontšha “go rata kudu” mošomo wa Barutwana ba Beibele gomme o be “a kgodišegile ka mo go feletšego” ka dithuto ge di be di hlaloswa ke bona. Ka tsela ya gagwe, Banchetti gape o ile a nyaka gore dithuto tšeo di tsebje.

Go molaleng go tšwa dipukung tša Banchetti gore, go swana le Dihlatse tša Jehofa, o ile a dumela gore go tla ba le tsogo ya mo lefaseng, bjalo ka ge e rutilwe ka Mangwalong. Le gona o ile a dumelelana le Barutwana ba Beibele ge a be a hlalosa gore ngwaga wo Jesu a hwilego ka ona o be o sa feto-fetoge gomme o utollotšwe ke Modimo ka boporofeteng bja Daniele bja dibeke tše 70. (Daniele 9:​24-​27) Ka lekga le fetago le tee, le gona ngangišanong ya phatlalatša ka dithuto tša kereke ya gagwe, o ile a dumela gore Segopotšo sa lehu la Jesu Kriste se swanetše go swarwa ga tee ngwaga le ngwaga, “letšatšing le le nepagetšego leo tiragalo e diragetšego ka lona.” (Luka 22:​19, 20) O ile a gana thuto ya Darwin ya tlhagelelo, gomme o ile a dumela gore Bakriste ba therešo ga ba swanela go tšea karolo dintweng.—Jesaya 2:4.

Lebakeng le lengwe, Banchetti o be a ahla-ahla dipuku tša Russell le monna yo a bitšwago J. Campbell Wall. A araba dikganetšo tša Wall, Banchetti o itše: “Ke kgodišegile gore ge o ka bala dibolumo tše tshela tša Russell, o tla ba le lethabo la kgonthe le le tseneletšego, gomme o tla nteboga ka kudu. Ga ke phatlalatše thuto; eupša ke badile dipuku tšeo nywaga e lesome-tee e fetilego, gomme ke leboga Modimo letšatši le lengwe le le lengwe ge a ile a bea pele ga-ka seetša se bjalo le khomotšo ka thušo ya mošomo wo o theilwego ka mo go feletšego le ka go tia Mangwalong a Makgethwa.”

“Theetša, Theetša, Theetša”

Ke ga bohlokwa gore Baruti ba ba babedi ba ma-WaldoDaniele Rivoire le Giuseppe Banchettiba ile ba bontšha tebogo bakeng sa tsela yeo ka yona Russell a ilego a hlalosa Beibele. Banchetti o ngwadile gore: “Ke re ga go le o tee wa rena Baebangedi, gaešita le baruti ba rena goba baprofesara ba thuta-tumelo, ga go le o tee yo a tsebago dilo ka moka. E sego seo fela eupša gape re na le dilo tše dintši kudu tšeo re swanetšego go ithuta tšona. . . . [Re swanetše] . . . go dula gomme re theetše, re sa nagane gore re tseba dilo ka moka, gomme re sa ganetše seo re se newago bakeng sa teko ya rena ka noši. Go e na le moo, theetša, theetša, theetša.”

Ngwaga le ngwaga, ba dikete ba theetša molaetša wa Mmušo ge o dutše o tlišwa ke Dihlatse tša Jehofa magaeng a bona. Batho ba nago le menagano e bulegilego kae le kae bao ba nyoretšwego ditherešo tša Beibele ba arabela taletšong ya Jesu e rego: ‘Tla o ntatele.’—Mareka 10:​17-21; Kutollo 22:17.

[Mengwalo ya ka tlase]

[Seswantšho go letlakala 28]

Moprofesara Daniele Rivoire

[Mothopo]

Banchetti: La Luce, April 14, 1926

[Seswantšho go letlakala 29]

Giuseppe Banchetti