Phihlelo

Go Tloga go Tšweletšeng Dibetša go ya go Phološeng Maphelo

KA GE GO ANEGA ISIDOROS ISMAILIDIS

Ke be ke khuname ka matolo ge megokgo e be e theoga marameng a-ka. Ke ile ka bolela thapelong ka re: “Ruri, Modimo, letswalo la-ka le mpotša gore nka se ke ka tšwela pele ke šoma tšweletšong ya dibetša. Ke lekile ka matla go hwetša mošomo o mongwe, eupša ke paletšwe. Gosasa ke tla tsenya lengwalo la-ka la go tlogela. Jehofa hle, o se ke wa tlogelela bana ba rena ba bane ba bolawa ke tlala ya borotho.” Go tlile bjang gore ke fihle ntlheng ye?

BOPHELO e be e le bja khutšo le bjo bonolo kua Drama, Gerika leboa moo ke belegetšwego gona ka 1932. Tate o be a tlwaetše go bolela le nna mabapi le seo a bego a nyaka ke se dira. O ile a nkgothaletša go ya United States bakeng sa go yo hwetša thuto gona. Ka morago ga ge Gerika e hlakotšwe nakong ya Ntwa ya II ya Lefase, moano wo o ilego wa aparetša gare ga ba-Gerika e be e le wo o rego: “Le ka utswa dithoto tša rena, eupša le ka mohla le ka se utswe seo se lego ka menaganong ya rena.” Ke be ke ikemišeditše go phegelela thuto e phagamego gomme ke hwetše selo se itšego seo motho le ge e le ofe le ka mohla a ka se kego a kgona go se utswa.

Go tloga ke sa le yo monyenyane ke be ke ile ka tsenela dihlopha tše di fapa-fapanego tša bafsa tšeo di bego di thekgwa ke Kereke ya Orthodox ya Gerika. Moo re ile ra botšwa gore re pheme dihlotswana tše kotsi. Ke gopola ka mo go kgethegilego sehlopha se tee​—Dihlatse tša Jehofa​—se bolelwa, ka ge go be go thwe se emela mo-lwa-le-Kriste.

Ka morago ga go aloga sekolong sa thekhinikhale kua Athene ka 1953, ke ile ka ya Jeremane go ya go bona ge e ba nka hwetša mošomo gomme ka ba ka tsena sekolo ka nako e swanago. Eupša seo ga se sa ka sa kgonega, ka gona ke ile ka ya dinageng tše dingwe. Ka morago ga dibeke tše mmalwa, ke ile ka ikhwetša ke se na tšhelete ke le boema-kepeng bja Belgium. Ke gopola ke tsena ka kerekeng, ke dula fase gomme ke lla ka matla kudu moo e lego gore  megokgo e ile ya rothela fase ka pele ga-ka. Ke ile ka rapela gore ge e ba Modimo a ka nthuša gore ke fihle United States, nka se ke ka phegelela dilo tše di bonagalago eupša ke tla hwetša thuto gomme ke katanele go ba Mokriste yo botse le modudi yo botse. Mafelelong ka 1957 ke ile ka fihla gona.

Bophelo bjo Bofsa United States

Bophelo United States bo be bo le thata bakeng sa modiiledi yo a bego a sa tsebe leleme la moo le yoo a bego a se na tšhelete. Ke be ke šoma mešomo e mebedi bošego gomme ke katanela go ya sekolong mosegare. Ke ile ka ya dikholetšheng tše mmalwa gomme ka hwetša degree ya kholetšheng ya tlasana. Ka morago ke ile ka ya Yunibesithing ya California kua Los Angeles gomme ka hwetša degree ya bachelor ya tša thutamahlale ka physics yeo e dirišwago. Mantšu a tate mabapi le go hwetša thuto a ile a ntira gore ke tšwele pele nywageng ye e thata.

Mo e ka bago ka nako ye, ke ile ka kopana le mosetsana yo mobotsana wa mo-Gerika, Ekaterini gomme re ile ra nyalana ka 1964. Morwa wa rena wa mathomo o ile a belegwa nywaga e meraro ka morago, gomme lebakeng la ka tlase ga nywaga e mene, re ile ra ba le barwa ba bangwe ba babedi le morwedi. E be e tloga e le tlhohlo go hlokomela lapa gomme ka nako e swanago ke ithuta yunibesithing.

Ke be ke šomela Madira a Lefau-faung a United States khamphaning ya dibetša le diphatša-maru kua Sunnyvale, California. Ke ile ka akaretšwa medirong e fapa-fapanego ya moyeng le ya diphatša-marung, go akaretša le mananeo a Agena le a Apollo. Ke ile ka ba ka amogela difoka bakeng sa go tsenya ga-ka letsogo medirong ya Apollo 8 le Apollo 11. Ka morago ga moo, ke ile ka tšwetša thuto ya-ka pele gomme ka akaretšwa kudu medirong e fapa-fapanego ya lefau-faung ya madira. Ge ke fihla ntlheng ye, ke be ke nagana gore bophelo bja-ka bo feletše​—mosadi yo mobotsana, bana ba bane bao ba rategago, mošomo wa maemo le ntlo e botse.

Mogwera yo a Phegelelago

Mathomong a 1967 ke ile ka tsebana le Jim mošomong, monna yo a ikokobeditšego kudu le yo botho. Jim ka dinako tšohle o be a bonagala a myemyela sefahlegong sa gagwe, gomme le ka mohla o be a sa ke a gana taletšo ya go ba le nna nakong ya teye. O ile a diriša dibaka tše go abelana le nna tsebišo e tšwago ka Beibeleng. Jim o ile a mpotša gore o be a dutše a ithuta le Dihlatse tša Jehofa.

Ke ile ka tšhoga ge ke e-kwa gore Jim o be a tlwaelane le sehlopha se sa bodumedi. Go be go kgonega bjang gore motho yo botse gakaalo e be mohlaselwa wa sehlotswana sa mo-lwa-le-Kriste? Lega go le bjalo, ke be ke sa kgone go gana kgahlego ya motho ka noši yeo Jim a bego a mpontšha yona gotee le botho bja gagwe. Go be go bonagala eka letšatši le lengwe le le lengwe o be a ntlela le selo se itšego se fapanego bakeng sa gore ke se bale. Ka mohlala, ka letšatši le lengwe o ile a tla ka ofising ya-ka gomme a re: “Isidoros, sehlogo se se lego ka go Morokami se bolela mabapi le go matlafatša bophelo bja lapa. E ya le wona gae gomme o o bale le mosadi wa gago.” Ke ile ka mmotša gore ke tla bala tokollo yeo, eupša ka morago ke ile ka ya ntlwaneng ya ka thoko gomme ka rathaganya makasine ka ditsekana tše nyenyane gomme ka di lahlela ka bolekeng bja ditlakala.

Ka nywaga e meraro, ke be ke lahla puku e nngwe le e nngwe le makasine o mongwe le o mongwe tšeo Jim a bego a nnea tšona. Ka ge ke be ke e-na le go beba sefahlego malebana le Dihlatse tša Jehofa e bile ke leka go boloka Jim e le mogwera wa-ka, ke ile ka nagana gore go kaone gore  ke theetše seo a se bolelago gomme ke se fetiše kapejana.

Lega go le bjalo, dipoledišanong tšeo ke ile ka bona gore bontši bja dilo tšeo ke bego ke di dumela le go di dira di be di sa thewa Beibeleng. Ke ile ka lemoga gore dithuto tša Boraro botee, mollo wa dihele le go se hwe ga moya e be e se tša Mangwalo. (Mmoledi 9:10; Hesekiele 18:4; Johane 20:17) Ka ge ke be ke le Mogerika wa Orthodox yo a ikgantšhago, ga se ka ka ka nyaka go dumela ka potego gore Jim o be a nepile. Eupša ka ge a be a diriša Beibele ka mehla gomme le ka mohla a sa ke a nea kgopolo ya gagwe ka noši, mafelelong ke ile ka lemoga gore monna yo o be a ntshwaretše molaetša o bohlokwa o tšwago ka Beibeleng.

Mosadi wa-ka o ile a lemoga gore go be go e-na le selo se itšego seo se bego se direga, gomme a botšiša ge e ba ke boledišane le mogwera wa-ka yo a bego a kopanela le Dihlatse. Ge ke araba ka gore ee, o itše: “A re yeng kerekeng le ge e ka ba efe ka ntle le ya Dihlatse tša Jehofa.” Lega go le bjalo, go se go ye kae nna le mosadi wa-ka gotee le bana ba rena, ke ge re e-ba gona ka mehla dibokeng tša Dihlatse.

Phetho e Thata

Ge ke dutše ke ithuta Beibele, ke ile ka gahlana le mantšu a a moporofeta Jesaya: “Ké mo ba tl’o xo tšea dithšoša ba rula mexomá ka tšôna, ba tšea marumô ba rula maxwêtla ka ôna. Xo ka se bê le sethšaba se se tl’o xo tšwêla se sengwê lerumô; batho ba tlo lesa xo ithuta xo hlabana.” (Jesaya 2:4) Ke ile ka ipotšiša gore, ‘Mohlanka wa Modimo yo a ratago khutšo a ka šoma bjang moo go dirwago le go tšweletšwa dibetša tšeo di bolayago?’ (Psalme 46:9) Ga se gwa ka gwa ntšea nako e telele gore ke phethe gore ke swanetše go fetoša mošomo wa-ka.

Ka mo go kwešišegago, ye e be e le tlhohlo e kgolo. Ke be ke e-na le mošomo wa maemo. Ke ile ka katana go theoša le nywaga ka mošomo o thata, thuto le go dira boikgafo gore ke fihle ntlheng ye. Ke ile ka phegelela maemo a godimo mošomong wa boiphedišo gomme bjale ke be ke lebeletšane le go tlogela mošomo wa-ka. Lega go le bjalo, lerato la-ka le le tseneletšego la go rata Jehofa le kganyogo e matla ya go dira thato ya gagwe mafelelong di ile tša fenya.​—Mateo 7:21.

Ke ile ka phetha ka go nyaka mošomo khamphaning ya kua Seattle, Washington. Lega go le bjalo, ka manyami, kapejana ke ile ka hwetša gore ke be ke swaregile kudu mošomong woo o bego o sa dumelelane le Jesaya 2:4. Maiteko a-ka a go šoma feela medirong e mengwe a ile a folotša, le gona letswalo la-ka le ile la buša la ntshwenya gape. Ke ile ka bona gabotse gore nka se ke ka tšwela pele ka mošomo wa-ka gomme ka nako e swanago ka dula ke e-na le letswalo leo le hlwekilego.​—1 Petro 3:21.

Go ile gwa ba molaleng gore re be re tlo swanela gore re dire diphetogo tše bohlokwa. Lebakeng la ka tlase ga dikgwedi tše tshela, re ile ra fetoša mokgwa wa rena wa go phela gomme gwa fokotša ditshenyagalelo tša lapa ka seripa. Ka morago re ile ra rekiša ntlo ya rena ya mabonwa gomme ra reka e nyenyane kua Denver, Colorado. Ga bjale ke be ke loketše go dira phetho ya makgaola-kgang​—go tlogela mošomo wa-ka. Ke ile ka tlanya lengwalo la-ka la go tlogela, ke hlalosa boemo bja-ka bjo bo laolwago ke letswalo. Bošegong bjoo, ka morago ga ge bana ba ile go robala, ke ile ka khunama fase le mosadi wa-ka gomme ra rapela Jehofa, bjalo ka ge go hlalositšwe mathomong a sehlogo se.

Lebakeng la ka tlase ga kgwedi, re ile ra hudugela  Denver gomme ka morago ga dibeke tše pedi ka July 1975, nna le mosadi wa-ka ra kolobetšwa. Ke feditše lebaka la dikgwedi tše tshela ke sa kgone go hwetša mošomo, gomme re be re e-ja ganyenyane-ganyenyane tšhelete ya rena yeo re bego re e bolokile. Ka kgwedi ya bošupa, tšhelete yeo e šetšego akhaontong ya rena ya go boloka tšhelete e be e le ka tlase ga ya tefo ya ntlo ya kgwedi le kgwedi. Ke ile ka thoma go nyaka mošomo le ge e le ofe wa nakwana woo ke bego nka o hwetša, eupša kapejana ka morago ga moo ke ile ka hwetša mošomo wa boentšeneare. Mogolo e be e le feela seripa-gare sa woo ke bego ke o gola; lega go le bjalo, e be e le mo gontši kudu go feta moo ke bego ke go kgopetše go Jehofa. Ke be ke thabile gakaakang gore ke ile ka etiša dikgahlego tša mmušo pele!​—Mateo 6:33.

Go Godiša Bana ba Rena Gore ba Rate Jehofa

Ka nako e swanago nna le Ekaterini re be re swaregile ka mošomo o hlohlago wa go godiša bana ba rena ba bane ka go dumelelana le melao ya motheo ya go boifa Modimo. Ka mo go thabišago, re ba bone ka moka ga bona, ka thušo ya Jehofa, e e-ba Bakriste bao ba gotšego tsebong, ba neela maphelo a bona ka mo go tletšego modirong o bohlokwa wa go bolela ka Mmušo. Barwa ba rena ba bararo, Christos, Lakes le Gregory ka moka ga bona ba alogile Sekolong sa Tlwaetšo sa Bodiredi gomme ga bjale ba hlankela dikabelong tše di fapa-fapanego, ba etela diphuthego le go di matlafatša. Toula e lego morwedi wa rena, o šoma e le moithapi ntlong-kgolo ya Dihlatse tša Jehofa kua New York. Dipelo tša rena di ile tša kgomega ge re ba bona ka moka ga bona ba gafa mešomo e holofetšago le mešomo e lefago kudu e le gore ba ka hlankela Jehofa.

Ba bantši ba ile ba botšiša gore sephiri sa katlego e bjalo ya go godiša bana ke sefe. Ee, ga go na mokgwa o rulagantšwego wa go godiša bana, eupša re ile ra leka ka phišego go bjala lerato la go rata Jehofa le moagišani ka dipelong tša bona. (Doiteronomio 6:6, 7; Mateo 22:37-39) Bana ba ile ba ithuta gore re ka se botše Jehofa gore re a mo rata ka ntle le ge ditiro tša rena di bontšha gore re dira bjalo.

Letšatšing le tee ka beke, gantši ka Mokibelo, re be re tšea karolo bodireding re le lapa. Ka mehla re be re swara thuto ya lapa ya Beibele mantšiboeng a Mošupologo ka morago ga dijo tša mantšiboa, gape re be re swarela ngwana yo mongwe le yo mongwe thuto ya Beibele. Ge bana e be e sa le ba banyenyane, re be re ithuta le ngwana yo mongwe le yo mongwe ka dinako tše kopana makga a mmalwa ka beke gomme ge ba dutše ba gola re be re swara dithuto tše teletšana gatee ka beke. Nakong ya dithuto tše, bana ba rena ba be ba lokologa gomme ba boledišana le rena ka mathata a bona ka bolokologi.

Re be re thabela gape le boitapološo bjo bo agago re le lapa. Re be re rata go bapala diletšo tša mmino re le gotee, gomme ngwana yo mongwe le yo mongwe o be a rata go bapala koša ya gagwe yeo a e ratago kudu. Mafelo-bekeng a mangwe, re be re laletša malapa a mangwe bakeng sa go thabela bogwera bjo bo agago. Gape re be re tšea maeto a maikhutšo bjalo ka lapa. Leetong le lengwe le bjalo, re ile ra fetša dibeke tše pedi re ithuta ka dithaba tša  Colorado gomme re šoma le phuthego ya lefelong leo bodireding bja tšhemo. Bana ba rena ba gopola ka lerato ba šoma dikopanong tša selete mafapheng a fapa-fapanego gomme ba thuša ka go aga Diholo tša Mmušo mafelong a fapanego. Ge re be re išitše bana Gerika go yo bona metswalo ya bona, gape ba ile ba kgona go tsebana le Dihlatse tše dintši tše botegago tšeo di bilego kgolegong di swarelwa tumelo ya tšona. Se se ile sa ba kgoma ka mo go tseneletšego, sa ba thuša gore ba ikemišetše go ema ba tiile e bile ba le sebete bakeng sa therešo.

Ee, ka dinako tše dingwe bana ba bangwe ba ile ba se ke ba itshwara gabotse goba ba dira dikgetho tše di sa lokago mabapi le bagwera. Ka dinako tše dingwe, re ile ra ba direla mathata mohlomongwe ka go ba bao ba thibelago kudu dikarolong tše dingwe. Eupša go retologela go “tlhahlo ya monagano ya Jehofa,” bjalo ka ge e hwetšwa ka Beibeleng, go ile gwa re thuša go lokiša ditaba gabotse bakeng sa rena ka moka.​—Ba-Efeso 6:4, NW; 2 Timotheo 3:16, 17.

Nako ya Lethabo Kudu Bophelong Bja-ka

Ka morago ga ge bana ba rena ba tsenetše bodiredi bja nako e tletšego, nna le Ekaterini re ile ra thoma go naganišiša kudu mabapi le seo re ka se dirago bakeng sa go godiša karolo ya rena modirong wo wa go phološa bophelo. Ka gona, ka 1994, ka morago ga gore ke role modiro pele ga nako, ka bobedi re ile ra thoma go hlankela re le babulamadibogo ba ka mehla. Bodiredi bja rena bo akaretša go etela dikholetšhe le diyunibesithi tša lefelong, moo re neago bohlatse go barutwana le go swarela ba bangwe ba bona dithuto tša Beibele. Ka baka la gore ke kgona go ba kwela bohloko mathateng a bona​—ka ge ke be ke le boemong bja bona nywageng e mmalwa e fetilego​—ke bile le katlego e kgolo kudu go ba thušeng go ithuta ka Jehofa. E bile lethabo le legolo gakaakang ge ke ithutile le barutwana ba tšwago Bolivia, Brazil, Chile, China, Egipita, Ethiopia, Mexico, Thailand le Turkey! Ke thabela gape le go nea bohlatse ka mogala, kudu-kudu bathong bao ba bolelago segagešo.

Gaešita le ge ke e-na le dithibelo tše dintši ka baka la segalo sa-ka se thata kudu sa Segerika le go gola, ka mehla ke lekile go itira yo a hwetšagalago e bile ke e-na le moya wa Jesaya, yoo a ilego a tsebatša ka gore: “Ké nna é, nthomê!” (Jesaya 6:8) Re bile le lethabo la go thuša batho ba fetago ba tshela gore ba neele maphelo a bona go Jehofa. Ye ka kgonthe e bile nako ya lethabo kudu go rena.

Ka nako e nngwe bophelo bja-ka ka moka bo be bo dikologile go direng dibetša tšeo di boifišago bakeng sa go bolaya magagešo. Lega go le bjalo, Jehofa ka botho bja gagwe bjo bo sa swanelago o ile a bula tsela bakeng sa-ka le lapa la-ka gore re be bahlanka ba ineetšego le go neela maphelo a rena bakeng sa go išetša batho ditaba tše dibotse tša bophelo bjo bo sa felego lefaseng la paradeise. Ge ke nagana ka diphetho tšeo di hlohlago tšeo ke ilego ka swanela ke go di dira, mantšu a Maleaki 3:10 a tla kgopolong ya-ka: “‘Napang Le ntekê ka xo dira byalo;​—o r’yalo Morêna wa mašaba,​—Le bônê xe ke bula nthoba tša lexodimo ka Le thšollêla thšexofatšô wa xo tlo Le xolêla.’” O ile a dira bjalo e le ka kgonthe​—wa go kgodiša dipelo tša rena!

[Lepokisi/Seswantšho go letlakala 27]

Lakes: Tate o be a nyatša boikaketši. O be a leka ka matla kudu gore a se itshware ka tsela ya boikaketši, kudu-kudu go beeleng lapa la gagwe mohlala o mobotse. O be a fela a re botša gore: “Ge e ba o neela bophelo bja gago go Jehofa, seo se bolela selo se itšego. O swanetše go ikemišetša go ikgafela Jehofa. Ke seo go ba Mokriste go se bolelago.” Mantšu a a ile a dula a le go nna gomme a dirile gore ke kgone go latela mohlala wa gagwe wa go ikgafela Jehofa.

[Lepokisi/Seswantšho go letlakala 27]

Christos: Ke lebogile kudu potego e sa kwanantšhego ya pelo ka moka ya batswadi ba-ka go Jehofa le go ineela ga bona ka go tia boikarabelong bja bona bjalo ka batswadi. Bjalo ka lapa, re be re dira selo se sengwe le se sengwe gotee​—go tloga tirelong ya rena go ya maikhutšong. Gaešita le ge ba ka ba ba ile ba swarega ka dilo tše dingwe tše dintši kudu, batswadi ba-ka ba ile ba boloka bophelo bja bona bo le bonolo e bile ba bo tsepamišitše bodireding. Lehono, ke a tseba gore ke ba yo a thabilego go feta bohle e le ka kgonthe ge ke nweletše ka mo go tletšego tirelong ya Jehofa.

[Lepokisi/Seswantšho go letlakala 28]

Gregory: Se se fetago mantšu a batswadi ba-ka a kgothatšo go nna gore ke oketše bodiredi bja-ka, mohlala wa bona le bohlatse bja lethabo la bona tirelong ya Jehofa di ile tša ntutuetša gore ke hlahlobišiše maemo a-ka, ke beele ka thoko dipelaelo le ge e le dife tšeo ke nago le tšona gotee le matshwenyego mabapi le go thoma tirelo ya nako e tletšego gomme ke katane ka mo go tletšego modirong wa Jehofa. Ke leboga batswadi ba-ka ge ba nthušitše go hwetša lethabo leo le tlišwago ke go katana.

[Lepokisi/Seswantšho go letlakala 28]

Toula: Batswadi ba-ka ka mehla ba be ba gatelela gore tswalano ya rena le Jehofa ke selo se bohlokwa kudu seo re bego re ka dula re e-na le sona le gore tsela e nnoši yeo ka yona re ka dulago re thabile e le ka kgonthe ke ka go nea Jehofa sohle seo re ka se kgonago. Ba dirile gore Jehofa e be wa kgonthe kudu go rena. Tate o be a fela a re botša gore go na le maikwelo ao a sa hlalosegego mabapi le go kgona go robala bošego ka letswalo leo le hlwekilego, o tseba gore o lekile sohle seo o ka se kgonago go thabiša Jehofa.

[Seswantšho go letlakala 25]

Ge ke be ke le lešole kua Gerika, 1951

[Seswantšho go letlakala 25]

Ke e-na le Ekaterini ka 1966

[Seswantšho go letlakala 26]

Lapa la-ka ka 1996, (go tloga ka go le letshadi go ya ka go le letona, ka morago) Gregory, Christos, Toula; (ka pele) Lakes, Ekaterini le nna