Bophelo bjo bo Phethagetšego​—Ga se Toro Feela!

Lefase leo le phethagetšego​—le bolela eng go wena? Anke o nagane ka lekoko la batho leo go lona go se nago ntwa, go dirišwa gampe ga dihlare-tagi, tlala, bodiidi goba go hloka toka. Ka moka ba thabela bophelo bjo bobotse ma-​ikwelong le mmeleng. Ga go na manyami goba go hloka lethabo ka gobane gaešita le lehu le fedišitšwe. Na ke mo go nago le tlha-​ologanyo go hlologela lefase le bjalo?

LE GE ba sa tšeele fase tšwelopele ya tša thutamahlale le ya tša thekinolotši, batho ba bantši ba tloga ba sa dumele gore bohlale bja batho goba tsebo di tla tliša lefase le le phethagetšego leo go lona bohle ba tla dulago ka khutšo le ka lethabo. Ka lehlakoreng le lengwe, tshekamelo ya batho ka mo go sa ganetšegego ke ya go nyaka go kaonefatša dilo le go phošolla go se phethagale. Ee, go lora feela moo e sego ga kgonthe go ka se ke gwa thuša bao ba se nago magae le badiidi, e bile go ka se kgotsofatše bao ba golofetšego le balwetši bao ba hlologetšego go imollwa matshwenyegong a bona. Lefase leo le phethagetšego le ka se ke la fo tlišwa ke bokgoni bja batho bja go hlama dilo. Lega go le bjalo, go sa šetšwe manyami a gona bjale le kgateletšo, go na le mabaka a kwagalago bakeng sa go dumela gore lefase leo o tla le bitšago leo le phethagetšego ge e le gabotse le kgaufsi kudu.

Ge o nagana ka bophelo bjo bo phethagetšego, o ka nagana ka bophelo bja Jesu Kriste. Jesu e be e se yena feela motho yo a phethagetšego yo a kilego a phela lefaseng. Adama le Efa, bao ba bego ba bopilwe ka seswantšho sa Modimo, ba ile ba thabela bophelo bjo bo phethagetšego paradeiseng. Lega go le bjalo, ba ile ba lahlegelwa ke boemo bjo bjo bobotse kudu ka baka la borabele bja bona bja go rabela malebana le Tatago bona wa legodimong. (Genesi 3:1-6) Le gona, Mmopi o tsentše kganyogo ya go phela ka mo go sa felego bathong. Mmoledi 3:11 e kgonthišetša seo ka gore: “Tšohle [Modimo] ó di dirile xore di kxahlê ka mohla wa tšôna; le tša neng le neng [“bosafelego,” PK] o di beile dipelong tša bôná. Fêla, tirô ye Yêna Modimo a e diraxo, mathômô le mafêlô a yôna, motho xa a e lemoxe.”

Ka ge go se phethagale le sebe di ile tša lebiša batho bophelong bja “lefêla” le “bohlankeng bya thsenyêxô,” ela hloko mantšu a moapostola Paulo a homotšago a rego: “Le yôna thloloxêlô ya dibopya ké xo letêla kutollô yeo ya bana ba Modimo. Xobane dibopya di imêlwa ke lôna lefêla dì sa le rate: di  na le e a di rwešitšexo; e le xore xo bê le kholofêlô ya xore le tšôna dibopya di tlo hunollwa bohlankeng bya thsenyêxô, di be le tokoloxô ya xe bana ba Modimo bà e-ya letaxong.” (Ba-Roma 8:19-21) Beibele e bea ka mo go kwagalago gore ditokišetšo tša Modimo bakeng sa go tsošološa bophelo bjo bo phethagetšego bja batho di hwetšagala ka Jesu Kriste.​—Johane 3:16; 17:3.

Go tlaleletša kholofelong ye e kgahlišago ya bokamoso, ka moka ga rena re ka kgona go tšwela pele moyeng, ra dira gore tšwelopele ya rena e bonagale le mo nakong ye.

Leka go ba yo a Nago le Teka-tekano

Jesu Kriste o ile a lebelela taba ya phethagalo e le e bohlokwa kudu moo a ilego a ba a botša batheetši ba bantši gore: “Byalo bang ba-boló-ka-tlalô, byalo ka Tata-weno wa maxodimong e le Yo-boló-ka-tlalô.” (Mateo 5:48) Na Jesu ruri o be a letetše gore re se be le bosodi mo tshepedišong ye e kgopo ya dilo? Aowa. Ge e le gabotse re swanetše go katanela go hlagolela dika tša go fa kudu, botho le lerato go magagabo rena, fela gantši re palelwa ke go dira seo se lokilego. Gaešita le yo mongwe wa baapostola ba Jesu o ngwadile gore: “Xe re ipolêla dibe tša rena, xôna ka xe Yêna è le wa pôtêxô le tokô, ó re lebalêla dibe a re hlatswa bokxôpô ka moka. Xe re ka re: Xa r’a dira dibe,​—xôna e ka ba xo Mo dira wa maaká, xomme Lentšu la xaxwe le tla ba le se xôna mo xo rena.”​—1 Johane 1:9, 10.

Lega go le bjalo, re ka kaonefatša tsela yeo re itebelelago le go swara ba bangwe ka yona, re phema dipheteletšo. Ke mang yo a ka hwetšago tlhaloso e kaone bakeng sa go ba le semelo se se leka-lekanego go phala yeo e hwetšwago ka Lentšung la Modimo, Beibele? Go hlagolela dika tše bjalo ka lethabo le teka-tekano go tla re thuša tabeng ya go phedišana gabotse le ba bangwe mošomong, molekane wa rena wa lenyalo le batswadi ba rena goba bana. Moapostola Paulo o ile a eletša Bakriste ka gore: “Thabang Moreneng ka mehla! Ke boêla ke re: Thabang! Bolêta bya lena a bo tsebyê bathong bohle.”​—Ba-Filipi 4:4, 5. 

Mehola ya go ba Bao ba Nago le Teka-tekano

Ge e ba o le yo a bontšhago teka-tekano dilong tšeo o di letetšego gomme o phema tshekamelo ya go ikgobatša le ya go ipolaya ya go nyaka gore dilo di dirwe ka mokgwa o phethagetšego, o a ikhola gaešita le go hola ba bangwe. Go tseba bokgoni bja gago bja kgonthe go akaretša bobedi go ba yo a lebelelago dilo ka tsela ya kgonthe le go ba yo a bontšhago teka-tekano mabapi le seo o nyakago go se dira. Gopola gore Modimo o re bopetše gore re phele lefaseng gomme re hwetše kgotsofalo modirong wo o nago le morero woo o holago rena gotee le ba bangwe.​—Genesi 2:7-9.

Ge e ba o be o le yo a inyakago mo gontši kudu, ke ka baka la’ng o sa retologele go Jehofa ka thapelo? Go hwetša kgaugelo ya Modimo go tla go tlišetša kimollo e kgolo. Jehofa o tseba kagego ya rena le boemo bja rena bja go se phethagale, ka gona ga se yo a sa bontšhego teka-tekano goba yo go lego thata go mo kgotsofatša. Mopsalme o re kgonthišetša gore: “Morêna ó šôkêlwa ba ba mmoifaxo byalo ka tata xo bana xe a xauxêla bana b’axwe. Xobane Yena ó tseba lebopô le re lexo ka lôna, xa a lebale xe re le lerole.” (Psalme 103:13, 14) Re ka leboga gakaakang gore Modimo o dirišana le batho ka tsela ya kgaugelo gakaalo! O tseba mafokodi a rena, lega go le bjalo re ka ba bohlokwa mahlong a gagwe bjalo ka bana bao ba rategago.

 Go e na le go tšwela pele ka go nyaka gore dilo di dirwe ka mokgwa o phethagetšego, ke gabohlale gakaakang go hlagolela temogo ya moya le pono e leka-lekanego! Go feta moo, re ka kgonthišega gore ga go na motho le o tee yo a ka thibelago Jehofa go phethagatša morero wa gagwe wa go bušetša batho phethegong ka tlase ga Mmušo wa Modimo. Eupša ke eng seo se bolelwago ke go phethagala ga batho?

Bophelo bjo bo Phethagetšego bo Kaone go Phala Tshekamelo ya go Nyaka Gore Dilo di Dirwe ka Mokgwa o Phethagetšego

Go phethega ga go bolele go ba yo a nyakago phethego. Bao ba tla bago le tokelo ya go phela Paradeiseng mo lefaseng ka tlase ga Mmušo wa Modimo ruri e ka se be batho bao ba nyakago dilo le bao ba itirago baloki. Se sengwe sa dilo tšeo di nyakegago bakeng sa go phologa masetla-pelo a magolo ke tebogo e tšwago pelong ya go leboga sehlabelo sa topollo, bjalo ka ge e bontšhitšwe ke lešaba le legolo la ditšhaba-tšhaba leo moapostola Johane a le hlalositšego ka gore: “Xo phološa ké xa Modimo wa rena e a dutšexo sedulong sa boxoši, ké xa Kwana.” (Kutollo 7:9, 10, 14) Baphologi ka moka ba masetla-pelo a magolo ao a lego kgaufsi ba tla leboga gore Kriste ka go ithatela o ile a ba hwela gotee le bohle bao ba bontšhago tumelo go yena. Sehlabelo sa gagwe sa lerato se ala motheo bakeng sa go tliša kimollo yeo e swarelelago ya go imologa go se phethagaleng ga bona le mafokoding a bona.​—Johane 3:16; Ba-Roma 8:21, 22.

Bophelo bjo bo phethagetšego bo tla ba bjang? Go e na le go ba le phadišano le go rata maemo ka boithati, lerato le botho gare ga batho di tla dira bophelo gore e be bjo bo nago le mohola, tša fediša go tshwenyega le go itšeela tlase. Lega go le bjalo, bophelo bjo bo phethagetšego e ka se be bjo bo lešago bodutu. Lentšu la Modimo ga le nee ditaba ka moka mabapi le Paradeise eupša le hlalosa mohuta wa bophelo bjoo re ka bo letelago: “Nywakô ye ba e axaxo ba tlo dula mo xo yôna; dirapa tša merara ba tlo lema ba ja kenyô tša tšôna. Ba ka se kê ba axa, xwa dula o šele; ba ka se kê ba lema xwa ja o šele; xobane matšatši a batho ba-ka a tlo lekana le matšatši a sehlare, ’me bahlaolwa ba-ka ba tlo phela ka tše ba itiretšexo tšôna, tša tlo bá tša ba ônalêla diatleng. Ba ka se itapiše, ’me ya ba lefêla; ba ka se tswale bana ba xo tlo hwa ka pela.”​—Jesaya 65:21-23.

Go e na le go ipotšiša mabapi le mohuta wa boithabišo, mafelo a mabenkele, thekinolotši, goba dinamelwa tšeo Mmušo o tla di neago, inagane o thabela phethagatšo ya mantšu a: “Phiri le kwana di tlo fula xotee; tau e tlo fula byang wa kxomo; noxa, dijo tša yôna e tlo ba lerole. Xo ka se hlwê xo senywa xo dirwa bošula thabeng e kxêthwa ya-ka yohle. Ó r’yalo Morêna.” (Jesaya 65:25) Bophelo bjo bo phethagetšego e tla ba bjo bo fapanego gakaakang le bjo o bo hwetšago lehono! Ge e ba o tla ba yo mongwe wa bao ba tla balelwago ba swanelega go phela nakong yeo, o tla ba le lebaka la go kgodišega gore Tatago yo lerato wa legodimong o tla go kgahlegela gotee le lapa la gago. “O thabêlê Morêna, ’me Yena ó tlo Xo nea tše pelo y’axo e di kxopêlaxo.”​—Psalme 37:4.

Bophelo bjo bo sa felego ga se toro feela. Morero wa Jehofa o lerato mabapi le batho o tla phethagala ka botlalo. Wena le lapa la gago le ka ba gare ga bao ba tla bušetšwago phethegong ya batho gomme la phela ka mo go sa felego lefaseng le lefsa la Modimo. Beibele e bolela e sa le pele gore: “Baloki e ba beng ba naxa, ba dula mo xo yôna ka mehla le ka mehla.”​—Psalme 37:29.

[Seswantšho go letlakala 6]

Re ka kaonefatša tsela yeo re itebelelago gotee le yeo re lebelelago ba bangwe ka yona, re phema go nyaka gore dilo di dirwe ka mokgwa o phethagetšego goba go sola-sola

[Seswantšho go letlakala 7]

Ke ka baka la’ng o sa ipone ka mahlo a kgopolo o šetše o thabela maemo a khutšo le go loka Paradeiseng?