O ka Tseba Bokamoso!

Batho ba bantši ba nagana ka mo go tseneletšego ka bokamoso. Ba rata go rulaganya, go beeletša ka bohlale le go ikwa ba šireletšegile. Eupša, na go na le tsela yeo ka yona o ka kgonthišegago mabapi le seo bokamoso bo se huperego?

MAITEKONG a go dira se, batho ba ile ba dira boitekelo ka dilo tša mehuta ka moka. Bo-rathutamahlale ba tša leago bao ba bitšwago baboleledi ba bokamoso ba nyakišiša ditshekamelo tšeo di lego gona gona bjale gomme ba dira dipolelelo-pele tša bona ba ithekgile ka tšona. Ditsebi tša tša boiphedišo di dira ka mo go swanago ka lefapheng la tšona. Balepi ba dinaledi le didupe ba lebelela go di-​horoscope, kgwele ya legakabje ya go noga bokamoso le bonoge, e bile ba na le balatedi ba bantši. Ka mohlala, molepi wa dinaledi wa mo-Fora Nostradamus o sa tšwela pele e le yo a tumilego gaešita le ge e šetše e le nywaga-kgolo e mentši a hwile.

Ba ka moka ba bego ba ipolela e le baporofeta ba itlhatsetše e le bao ba ka se kego ba botwa le gatee le bao ba nyamišago. Ka baka la’ng? Ka gobane ba hlokomologa Jehofa Modimo le Lentšu la gagwe, Beibele. Ka baka leo ba palelwa ke go araba dipotšišo tša motheo tše bjalo ka tše: ‘Ke ka baka la’ng nka kgonthišega gore dilo tšeo di boletšwego e sa le pele ka Beibeleng di tlo direga? Di tsena bjang morerong wa Modimo bakeng sa batho? Nna le lapa la-ka re ka hwetša mohola bjang diporofetong tše?’ Beibele e araba dipotšišo tše.

Boporofeta bja Beibele gape ke bjo bo phagamego ka ditsela tše dingwe tše dintši. Ka go se swane le dipolelelo-pele tša balepi ba dinaledi, bo nea sebaka sa tokologo ya go ikgethela. Lega go le bjalo, ga go na motho yo e lego mohlaselwa wa tlholelo. (Doiteronomio 30:19) Mengwalo e bjalo ka ya Nostradamus ke yeo e sa holego ka selo boitshwarong, gomme e šireletša go se be le mohola mo ka dilo tše di sa kwešišegego le ka go tsoša maikwelo a batho. Eupša boporofeta bja Beibele bo na le motheo wa boitshwaro o tiilego. Bo hlalosa lebaka leo ka lona Modimo a tla dirago bjalo ka ge a rerile. (2 Koronika 36:15) Le ka mohla diporofeto tša Jehofa di ka se dule di sa phethagale, ka gobane ‘Modimo ke yo a sa forego.’ (Tito 1:2, bapiša le PK.) Ka gona, batho bao ba hlahlwago ke Lentšu la Modimo ba phela maphelo a edišeditšwego, a nago le morero le a lethabo ka ntle le go senya nako ya bona e bohlokwa le matlotlo a bona medirong ya lefeela.​—Psalme 25:12, 13.

Dintlha tše gotee le tše dingwe tše dintši di ile tša ahla-ahlwa Dikopanong tša Selete tša “Lentšu la Modimo la Boporofeta” tša Dihlatse tša Jehofa tšeo di bego di swerwe lefaseng ka bophara tša 1999/2000. Dipolelo, dipoledišano, dipontšho gotee le papadi ya Beibele di ile tša gogela tlhokomelo ya batheetši go bohwa bjo bo kgahlišago bja moya bjo bo thabelwago ke bao ba ithutago le go diriša lentšu la Modimo la boporofeta. Sehlogo se se latelago se tla boeletša tše dingwe tša dintlha-kgolo tše di kgahlišago tša kopano.