Re Mohuta o Nago le Tumelo

Go Nea Molaetša wa Khomotšo Italy

JEHOFA ke “Modimo wa khomotšô yohle.” Ka go ithuta go mo ekiša, bahlanka ba gagwe ba kgona go ‘homotša bohle ba ba lego mahlokong ohle.’ (2 Ba-Korinthe 1:3, 4; Ba-Efeso 5:1) Bjo ke bjo bongwe bja maikemišetšo a magolo a modiro wa boboledi wo o dirwago ke Dihlatse tša Jehofa.

Go Thuša Mosadi yo a Nyakago Thušo

Kudu-kudu nywageng ya morago bjale bodiidi, ntwa le kganyogo ya go hwetša bophelo bjo bokaone di ile tša dira gore ba bantši ba hudugele dinageng tše di humilego kudu. Eupša go tlwaelana le tikologo e mpsha ga go bonolo. Manjola o be a dula le ma-Albania a gabo Borgomanero. Ka ge Manjola a be a sa dule Italy ka tsela ya molao, o be a dika-dika go boledišana le Wanda, yo e lego yo mongwe wa Dihlatse tša Jehofa. Lega go le bjalo, mafelelong Wanda o ile a rulaganya go kopana le Manjola, yo kapejana a ilego a bontšha kgahlego e kgolo go ithuteng Lentšu la Modimo, gaešita le ge lepheko la leleme le ile la dira gore se se be thata. Lega go le bjalo, ka morago ga diketelo tše sego kae, Wanda o be a se sa hlwa a hwetša motho gae. Go be go diregile’ng? Wanda o ile a lemoga gore badudi ka moka bao ba bego ba dula ka ntlong yeo ba tšhabile ka gobane yo mongwe wa bona​—lesogana la Manjola​—o be a nyakwa ka baka la polao!

Ka morago ga dikgwedi tše nne, Wanda o ile a kopana le Manjola gape. Wanda o a gopola: “O be a bonagala a sehlefetše e bile e le yo mosesane gomme a bonagala e le motho yo a tlogago a be a e-na le mathata.” Manjola o ile a hlalosa gore yo e bego e le lesogana la gagwe o be a le kgolegong gomme bagwera bao a ilego a ya go bona bakeng sa gore ba mo thuše ba be ba mo nyamišitše o šoro. Ka baka la tlalelo, o ile a rapela Modimo bakeng sa thušo. Ka morago o ile a gopola ka Wanda, yo a ilego a bolela ka Beibele. Manjola o ile a thaba gakaakang ge a bona Wanda gape!

Thuto ya Beibele e ile ya tsošološwa, gomme go se go ye kae Manjola o ile a thoma go ba gona dibokeng tša Bokriste. Manjola o ile a atlega go hwetša tumelelo ya molao ya go dula Italy. Ka morago ga ngwaga, Manjola o ile a ba Hlatse e kolobeditšwego. Ka ge a be a homoditšwe ke dikholofetšo tša Modimo, o ile a boela Albania go yo abelana le magagabo molaetša wa Beibele o homotšago.

Go Nea Bohlatse Lefelong la Kampa ya Bafaladi

Diphuthego tše dintši tša Italy di ile tša dira dithulaganyo tša go nea bohlatse go bafaladi ba swanago le Manjola. Ka mohlala, phuthego kua Florence e ile ya dira dithulaganyo tša go etela lefelo la kampa ya bafaladi ka mehla. Badudi ba mo kampeng​—bao ba bantši  ba bona ba tšwago Yuropa Bohlabela, Matsedonia le Kosovo​—ba be ba e-na le mathata a fapa-fapanego. Ba bangwe ba be ba e-na le mathata ka dihlare-tagi goba dino tše di tagago. Ba bangwe ba be ba iphediša ka go utswa dilo tše dinyenyane.

Go dira boboledi setšhabeng se e be e le tlhohlo. Lega go le bjalo, moebangedi wa nako e tletšego yo leina la gagwe e lego Paola mafelelong o ile a ikopanya le Jaklina, mosadi wa Matsedonia. Ka morago ga dipoledišano tše sego kae, Jaklina o ile a kgothaletša mogwera wa gagwe Susanna gore a hlahlobe Beibele. Ka morago, Susanna o ile a bolela le ba bangwe ba leloko. Go se go ye kae, ba bahlano ka lapeng ba be ba ithuta Beibele ka mehla, ba e-ba gona dibokeng tša Bokriste gomme ba diriša seo ba bego ba ithuta sona. Go sa šetšwe mathata ao ba bego ba swanelwa ke go lebeletšana le ona, ba hweditše khomotšo e tšwago go Jehofa le Lentšung la gagwe.

Moitlami wa Mosadi o Amogela Khomotšo e Tšwago go Jehofa

Toropong ya Formia, moebangedi wa nako e tletšego yo leina la gagwe e lego Assunta o ile a boledišana le mosadi yo a bego a e-na le mathata. Mosadi e be e le moitlami yo e bego e le wa sehlopha sa bodumedi bjo bo thušago batho ba babjago le ba fokolago ba ba lego dipetlele gotee le ka gae.

Assunta o ile a botša moitlami wa mosadi gore: “Le wena o a tlaišega, na ga go bjalo? Ka mo go nyamišago ka moka re na le mathata ao re swanetšego go lebeletšana le ona.” Lebakeng leo moitlami wa mosadi o ile a lla gomme a hlalosa gore o be a e-na le mathata a magolo a tša maphelo. Assunta o ile a mo kgothatša, a mmotša gore Modimo wa Beibele a ka mo homotša. Moitlami wa mosadi o ile a amogela dimakasine tšeo di theilwego Beibeleng tšeo Assunta a ilego a mo nea tšona.

Poledišanong ya bona e latetšego, moitlami wa mosadi, yo leina la gagwe e lego Palmira, o ile a dumela gore o be a tlaišega o šoro. O ile a phela lefelong leo le laolwago ke baitlami ba basadi ka lebaka le letelele. Ge a be a swanelwa ke gore a tloge lebakanyana ka mabaka a tša maphelo, ga se a ka a dumelelwa gore a boe. Lega go le bjalo, Palmira o ile a ikwa a ikarabela go Modimo ka baka la dikeno tšeo a di dirilego e le moitlami wa mosadi. O ile a ya go bafodiši bakeng sa “kalafo” eupša o be a gateletšegile monaganong ka baka la seo se mo wetšego. Palmira o ile a dumela go ithuta Beibele, gomme o bile gona dibokeng tša Bokriste mo e ka bago ka lebaka la ngwaga. Ke moka o ile a hudugela lefelong le lengwe, gomme Hlatse e ile ya se sa kgona go ikgokaganya le yena. Go ile gwa feta nywaga e mebedi pele Assunta a hwetša Palmira gape. Palmira o ile a lebeletšana le kganetšo e šoro e tšwago ka lapeng le go baruti. Lega go le bjalo, o ile a tsošološa thuto ya gagwe ya Beibele, a dira tšwelopele ya moya gomme a kolobetšwa e le yo mongwe wa Dihlatse tša Jehofa.

Ee, ba bantši ba kgothatšwa ke molaetša wa ‘Modimo yo a neago khomotšo.’ (Ba-Roma 15:4, 5) Ka baka leo, Dihlatse tša Jehofa tša Mataliana di ikemišeditše go tšwela pele di ekiša Modimo ka go nea ba bangwe molaetša wa gagwe o kgahlišago wa khomotšo.