Gwerana le Batho ba Mehuta ka Moka
Bothata bja go se Gwerane le Batho ba Mehuta ka Moka
Ge e ba re sa nyake go gwerana le batho ba morafo o mongwe wo re sa o ratego, re tla be re dira gore kgethollo ya rena e gole le go feta. Le gona, ge e ba re gwerana feela le batho bao ba swanago le rena, re ka nagana gore tsela yeo re naganago ka yona, re ikwago ka yona le yeo re dirago dilo ka yona, ke yona feela e amogelegago.
Seo Beibele e se Rutago
BAKORINTHE BA BOBEDI 6:13 e re: ‘Katološang lerato leo le lego dipelong tša lena.’
Lengwalo le le ra gore’ng? Le ra gore ‘dipelo’ tša rena di ka hlaloswa e le tsela yeo re ikwago ka yona goba yeo re ratago batho ba bangwe ka yona. Ge e ba re no gwerana feela batho bao ba swanago le rena, re ka se gwerane le batho ba bangwe. Ka gona, re swanetše go leka ka thata go gwerana le batho ba mehuta ka moka.
Go Gwerana le Batho ba Mehuta ka Moka go ka re Thuša Bjang?
Ge re thoma go tseba batho ba merafo e mengwe gabotse goba bao ba sa swanego le rena, re tlo thoma go kwešiša gore go re’ng ba dira dilo go se swane le rena. Le gona, ge segwera sa rena se dutše se gola, re tlo bona gore ge e le gabotse, batho ba ga ba fapane le rena. Re tlo ba tšea e le ba bohlokwa kudu, seo sa dira gore ge ba thabile re thabe le bona, gomme ge ba lla ra lla le bona.
Ka mohlala, nagana ka mosadi yo mongwe yoo a bitšwago Nazaré. O kile a ba le bothata bja go kgetholla batho bao ba bego ba hudugetše nageng ya gabo. O re botša seo se ilego sa mo thuša gore a se sa ba kgetholla. O re: “Ke ile ka fetša nako e ntši ke phela le bona e bile ke šoma le bona. Batho ba bantši ba moo ke dulago gona ba be ba bolela dilo tše dintši tša go se kgahliše ka morafo woo. Eupša ke ile ka iponela ka a ka mahlo gore ge e le gabotse, ba be ba ba senya maina. Ge o thoma go gwerana le batho ba merafo e mengwe, ga o sa ba ahlola go ya ka ponagalo ya bona. E bile o kgona go bona gore ka moka ga bona ga ba swane, gomme se se go dira gore o ba rate kudu.”
Seo o ka se Dirago
Leka go boledišana le batho bao ba tšwago dinageng tše dingwe, ba morafo o mongwe goba bao ba bolelago leleme le lengwe. O ka dira seo bjang?
-
O ka ba kgopela gore ba go botše se sengwe ka bona.
-
Ba meme go tlo ja le wena.
-
Theetša ge ba go botša gore nageng ya gabo bona ba phela bjang, gomme o leke go tseba dilo tšeo di lego bohlokwa go bona.
Ge e ba o leka go kwešiša dilo tšeo di ba diragaletšego maphelong a bona, o tlo kgona go bona gore go re’ng ba phela ka tsela yeo ba phelago ka yona.
You May Also Like
BAFSA BA A BOTŠIŠA
Na Nka Oketša Bagwera ba ka?
O ka ikwa o thabela go phela o na le sehlopha se itšego sa bagwera eupša ga se ka mehla o tlago go holega. Ka baka la’ng?
