Moya wo o šilafetšego o ka bolaya diphedi tšeo di lego mo lefaseng. Go ya ka World Health Organization batho bao ba hemago moya o hlwekilego ke ba banyenyane kudu.

Go šilafatšwa ga moya go dirile gore go be le malwetši ao a dirago gore batho ba palelwe ke go hema gabotse, kankere ya maswafo le bolwetši bja pelo. Moya o šilafetšego o dira gore ngwaga le ngwaga batho ba e ka bago ba 7,000,000 ba hwe ka pela.

Lefase la rena le dirilwe ka tsela yeo e dirago gore diphedi ka moka di heme moya o hlwekilego. Eupša lefase la rena le tla kgona go dira seo ge fela batho ba ka se le šilafatše kudu. Bona mehlala e latelago.

• Re a tseba gore dithokgwa di kgona go tshwara moya o bitšwago carbon dioxide wo o lego lefaufaung. Eupša batho ba bantšhi ga ba tsebe gore mehlare yeo e melago mafelong ao a nago le monola e kgona go dira seo ga kaone. Mehlare yeo e kgona go tloša carbon dioxide e ntšhi kudu go phala le dithokgwa.

• Dinyakišišo di bontšhitše gore malele a mangwe a go swana le kelp ga a tloše fela carbon dioxide lefaufaung, eupša a e boloka go ona. Matlakala a go swana le a kelp a na le masakana ao a tletšego ka moya woo o dirago gore meetse a kgone go a iša kgole. Masakana ao a lego matlakaleng ge a le kgole le lebopo a a phantšha, ke moka kelp yeo e tletšego ka carbon dioxide ya ya ka fasefase ga lewatle, ge e le moo e kgona go dula mengwaga-ngwaga ntle le go baka kotsi.

• Ka nako ya ge batho ba be thibetšwe go dira dilo tše itšego ka baka la bolwetši bja COVID 19, go bonagetše gabotse gore lefaufau la rena le kgona go boela maemong a mabotse ka morago ga go šilafatšwa ka tsela yeo e lego kotsi. Ka ge difeketori le dikoloi di be di se sa šilafatša moya kudu ka 2020, moya o ile wa ba maemong a makaone ka pela. “2020 World Air Quality”e begile gore dinageng tše dintšhi tšeo ba ilego ba dira dinyakišišo go tšona, ba ile ba hwetša gore moya o ile wa hlweka le go feta ka moragonyana ga gore go be le dithibelo tšeo.

Mebušo e sa tšwela pele e botša borakgwebo gore ba fokotše go šilafatša moya. E bile, borasaense ba tšwela pele ba hwetša ditsela tše diswa tša kamoo ba ka dirago gore moya o se sa šilafatšwa kudu. Ka mohlala, tsela e nngwe ya go dira bjalo ke ka go diriša paketheria yeo e kgonago go fetoša dilo tšeo di šilafatšago moya gore di se sa ba kotsi. Gape, ditsebi di kgothaletša batho gore ba sepele ka maoto le go diriša dipaesekela go e na le go diriša dikoloi, e bile ba nyake ditsela tšeo ba ka fokotšago go diriša mohlagase kudu ka magaeng a bona.

Eupša dipego tšeo di hweditšwego lefaseng ka moka ka 2022 go akaretša le tša World Health Organization le World Bank di bontšha gore go sa na le mo gontšhi moo go swanetšego go dirwa.

Pego yeo e bontšhitše gore ka 2020, tšhilafatšo ya moya e be e bakwa kudu ke gore batho ba bantšhi mo lefaseng ba diriša dilo tša thekinolotši le tše dingwe tšeo di šilafatšago moya ge ba apea. Mafelong a mangwe batho bantšhi ga ba na tšhelete ya go reka ditofo tše diswa, e bile ga ba na dilo tše dingwe tšeo ba ka di dirišago go apea.

“Se ke seo se boletšwego ke Modimo wa therešo, Jehofa, Mmopi wa magodimo yena . . . yo a alago lefase le ditšweletšwa tša lona, Yo a neago batho bao ba lego go lona bophelo.” —Jesaya 42:5.

Modimo o dirile moya woo re o hemago a ba a dira gore o kgone go itlhwekiša ka tlhago, e bile o tla dula a na le matla le go re rata. Ka gona re ka tshepa gore o tla dira se sengwe go hlwekiša moya nakong e tlago. Bona sehlogo seo se rego “Modimo o re Holofetša Gore Lefase la Rena le tla Dula le le Gona”.