“Ka motho o tee sebe se tsene lefaseng gomme lehu la tsena ka sebe, ka go re’alo lehu le aparetše batho bohle.”—BAROMA 5:12.

Modimo o bopile batswadi ba rena ba mathomo e lego Adama le Efa ba se na sebe e bile ba sa lwale. Le gona o ile a ba bea serapeng se sebotse sa Edene. O ile a ba botša gore ba be ba ka ja dienywa tša mehlare ka moka ka ntle le dienywa tša mohlare o tee feela. Eupša Adama le Efa ba ile ba kgetha go ja dienywa tša mohlare woo. Seo e be e le sebe. (Genesi 2:15-17; 3:1-19) Ka ge ba ile ba se kwe Modimo, Modimo o ile a ba raka serapeng seo ke moka bophelo bo ile bja thoma go ba thatafalela. Ge nako e dutše e eya, ba ile ba ba le bana. Le bona bana bao, bophelo bo ile bja ba thatafalela. Ka moka ga bona ba ile ba tšofala gomme ba hlokofala. (Genesi 3:23; 5:5) Gona bjale re a babja, re a tšofala e bile re a hlokofala ka baka la Adama le Efa.

“Lefase ka moka le rapaletše matleng a yo kgopo.”—1 JOHANE 5:19.

“Yo kgopo” ke Sathane. Ke morongwa yo mobe yoo a ilego a hlanogela Modimo. (Johane 8:44; Kutollo 12:9) Ge nako e dutše e eya, barongwa ba bangwe le bona ba ile ba mo latela. Ba bitšwa batemona. Barongwa ba ba babe ba diriša matla a bona go fora batho le go ba dira gore ba se kwe Mmopi.  Ba hlohleletša batho ba bantši gore ba dire dilo tše mpe. (Psalme 106:35-38; 1 Timotheo 4:1) Sathane le batemona ba gagwe ba kgahlwa ke ge batho ba tlaišega.

“Se sengwe le se sengwe seo motho a se bjalago, ke sona seo a tlago go se buna.”—BAGALATIA 6:7.

Ka moka ga rena re tlaišwa ka ditsela tše di fapafapanego ka baka la sebe seo re belegwego re na le sona le ka baka la gore lefase le bušwa ke Sathane. Eupša ka dinako tše dingwe batho ba dira diphetho tše mpe tšeo di feleletšago di dira gore ba tlaišege. Bjang? Ge batho ba dira diphetho tše mpe goba tša bošilo gantši ba buna ditlamorago tše mpe. Eupša bao ba dirago dilo tše dibotse, ba buna dilo tše dibotse. Ka mohlala, monna yo a nyetšego e bile a na le bana, yo a botegago, a šomago ka thata e bile a rata lapa la gagwe, o tlo buna dilo tše dibotse gomme a dira gore lapa la gagwe le thabe. Eupša monna wa setagwa yo a petšhago e bile a tšwafa, a ka dira gore lapa la gagwe le diile. Ka gona re bontšha bohlale ge re ekwa mmopi wa rena. O nyaka gore re bune dilo tše dintši tše dibotse go akaretša le khutšo.”—Psalme 119:165.

“Mehleng ya bofelo . . . , batho e tla ba baithati, barati ba tšhelete, . . . ba go se kwe batswadi, . . . ba se nago boitshwaro, ba bogale, ba go se rate go loka.”—2 TIMOTHEO 3:1-5.

Lehono, batho ba bantši ba phela ka tsela yeo e hlalositšwego lengwalong le. Tsela yeo ba phelago ka yona e hlatsela gore re phela “mehleng ya bofelo”. Mangwalo a boletše gape gore ge re bona dintwa, tlhaelelo ya dijo, ditšhišinyego tše dikgolo tša lefase le malwetši, re tsebe gore re phela “mehleng ya bofelo.” (Mateo 24:3, 7, 8; Luka 21:10, 11) Dilo tše di dira gore re tlaišege le go hwa.