“Re Ile ra Kgongwa ke go Bona Lerato le Bjalo”
KA Mokibelo wa di-25 tša April 2015, tšhišinyego ya lefase ya bogolo bja 7,8 e ile ya šišinya Nepal, e lego naga yeo e apareditšwego ke dithaba ka leboa la India. Tšhišinyego yeo e ile ya hlasela bokgoleng bja dikhilomithara tše 80 ka leboabodikela bja motsemošate wo o bitšwago Kathmandu. Ka manyami, batho ba fetago ba 8 500 ba ile ba loba maphelo kotsing yeo, e lego batho ba bantši kudu bao ba ilego ba bolawa ke kotsi ya tlhago nageng yeo. Metse e fetago seripagare sa milione e ile ya senyega. Go na le Dihlatse tša Jehofa tše 2 200 kua Nepal, gomme bontši bja tšona bo be bo dula karolong ye yeo e hlasetšwego ke kotsi ya tlhago. Ka manyami, go ile gwa hlokofala mosadi o tee wa Hlatse le bana ba gagwe ba babedi.
Hlatse yeo e bitšwago Michelle e itše: “Tšhišinyego yeo e diregile nakong ya ge diphuthego [tša Dihlatse tša Jehofa] tša karolong yeo di be di swere diboka tša tšona tša Bokriste. Ge nkabe e direge nakong ya ge ba bantši ba be ba le magaeng, ga go pelaelo gore nkabe ba bantši ba gobetše le go hlokofala.” Ke ka baka la’ng bao ba bego ba le dibokeng ba ile ba šireletšega? Lebaka e be e le tsela yeo Diholo tša Mmušo di hlamilwego ka yona.
“BJALE RE BONA MEHOLA!”
Diholo tša Mmušo tša mehleng yeno tša Nepal di hlamilwe ka tsela yeo di ka se kego tša senywa gabonolo ke tšhišinyego ya lefase. Man Bahadur, yo a agago Diholo tša Mmušo, o re: “Batho ba be ba fela ba re botšiša lebaka leo ka lona re theago metheo e tiilego gakaakaa bakeng sa meago e menyenyane. Bjale re bona mehola!” Ka morago ga tšhišinyego ya lefase, go ile gwa dumelelwa gore Diholo tša Mmušo e be mafelo a bodulo. Go sa šetšwe gore go be go na le ditšhišinyego tše dinyenyane tša ka morago ga tšhišinyego e kgolo, Dihlatse tša Jehofa le baagišani ba tšona ba ile ba ikwa ba šireletšegile Diholong tša Mmušo.
Dihlatse tša Jehofa le baagišani ba tšona ba tšhabetše Diholong tša Mmušo
Bagolo ba diphuthego tša Dihlatse tša Jehofa ba ile ba thoma go tsoma ditho tša diphuthego tšeo ba bego ba sa tsebe moo di lego gona. Hlatse yeo e bitšwago Babita e itše: “Bagolo ba be ba tshwenyegile kudu ka tšhireletšego ya ditho tša phuthego go e na le tšhireletšego ya bona. Re ile re kgongwa ke go bona lerato le bjalo.” Letšatši ka morago ga tšhišinyego ya lefase, ditho tše tharo tša komiti yeo e okamelago modiro wa Dihlatse tša Jehofa kua Nepal gotee le balebeledi ba basepedi, goba balebeledi ba tikologo, ba ile ba thoma go etela diphuthego e le gore ba tsebe dinyakwa tša tšona le go thekga bagolo ba diphuthego tšeo.
Gary Breaux, yo a tšwago ntlongkgolo ya lefase ya Dihlatse tša Jehofa, o ile a etela bao ba wetšwego ke tšhišinyego ya lefas
Matšatši a tshela ka morago ga tšhišinyego ya lefase, Gary Breaux, yo a tšwago ntlongkgolo ya lefase ya Dihlatse tša Jehofa kua United States, o ile a etela Nepal a na le mosadi wa gagwe, Ruby. Reuben yo e lego setho sa komiti yeo e okamelago modiro wa Dihlatse tša Jehofa kua Nepal o itše: “Re be re sa kgodišege ge e ba Ngwanabo rena Breaux a be a tla kgona go fihla Kathmandu, ka ge go be go na le kgakanego le ditšhišinyego tše dinyenyane tšeo di bago gona ka morago ga tšhišinyego e kgolo. Ka ge a be a ikemišeditše go tla, o ile a fihla! Dihlatse tša moo di ile tša leboga ketelo ya gagwe kudu.”
‘RE IKWA RE BATAMELANE GO FETA PELENG’
Silas, yo a šomago ofising ya Dihlatse tša Jehofa kua Nepal, o itše: “Ka morago ga gore difouno tša rena di loke, di ile tša thoma go lla bošego le mosegare! Dihlatsegotee le rena lefaseng ka moka di be di tshwenyegile ka rena. Gaešita le ge tše dingwe di be di bolela maleme ao re sa a tsebego, re ile ra lemoga kamoo di bego di re rata ka gona e bile di nyaka go re thuša.”
Sehlopha sa tša kalafo sa Dihlatse tša Jehofa tšeo di tšwago Yuropa se ile sa thuša bao ba gobaditšwego ke tšhišinyego
Lebakeng la matšatši a sego kae ka morago ga tšhišinyego, Dihlatse tša lefelong leo di ile tša iša dijo Diholong tša Mmušo gore di abelane le bao ba bego ba se na tšona. Go oketša moo, go ile gwa hlongwa Komiti ya tša Tlhakodišo, gomme go se go ye kae ke ge go tlišwa dilo tšeo di bego di nyakega, gomme bontši bja tšona di etšwa Bangladesh, India le Japane. Matšatšing a sego kae, go ile gwa fihla sehlopha sa tša kalafo sa Dihlatse tšeo di tšwago Yuropa gomme sa hloma lefelo la sona la kalafo go e nngwe ya Diholo tša Mmušo. Gateetee sehlopha seo se ile sa thoma go hlahloba batho le go ba thuša go lebeletšana le go tshwenyega le ge e le gofe maikwelong.
Mosadi yo a bitšwago Uttara ge a hlalosa kamoo ba bantši ba bego ba ikwa ka gona o itše: “Tšhišinyego ya lefase e be e tšhoša kudu. Eupša ka morago ga moo re ile ra ikwa re batamelane le bana babo rena ba Dihlatse go feta peleng.” Tšhišinyego yeo ya lefase ga se ya fokodiša lerato leo batho ba Jehofa ba mo ratago ka lona le leo ba ratanago ka lona. Go e na le moo, e ile ya matlafatša lerato leo.
You May Also Like
DIPOTŠIŠO TŠEO DI BOTŠIŠWAGO KUDU
Na Dihlatse tša Jehofa di Thuša ka go Hlakodiša ge go na le Dikotsi?
Ithute kamoo re thušago badumedigotee le rena le batho ba bangwe ge go na le dikotsi.
DITABA TŠE DI LOKOLOTŠWEGO
Dihlatse tša Jehofa di Rulaganya Modiro wa Tlhakodišo Nageng ya Nepal
Dihlatse tša Jehofa go tšwa dinageng tše tshela go akaretša le Komiti ya Tlhakodišo ya Nepal, ba nea thušo ka dilo tšeo ba di hlokago, thušo ya maikwelo le go kgothatša bao ba phologilego ka Beibele.
