GE BATHO BA WELWA KE MATHATA, NA O NA LE GO IPOTŠIŠA GORE: ‘MODIMO O BE A LE KAE?’ GOBA NA O KILE WA WELWA KE MATHATA GOMME WA IPOTŠIŠA GE E BA MODIMO A NA LE TABA LE WENA?

Mohlomongwe le wena o ikwa go swana le Sheila, yoo a dulago United States. Ka ge a godišeditšwe lapeng leo le ratago kereke, o re: “Ke thomile go rata Modimo ke sa le yo monyenyane ka gore ke yena a re bopilego. Eupša ke be ke se na segwera le yena. Ke be ke dumela gore o ntebeletše, eupša ke ipotša gore o kgole kudu le nna. Le ge ke be ke tseba gore ga se a ntlhoya, ke be ke sa dumele gore o a nthata.” Ke ka baka la’ng Sheila a be a sa dumele gore Modimo o a mo rata? O re: “Lapa la gešo le ile la welwa ke mathata a magolo ka go latelana, ka phetha ka gore Modimo ga a na taba le rena.”

Go swana le Sheila, le wena o ka ba o dumela gore Modimo Ramatlaohle o gona. Eupša o ka ba o nagana gore ga a na taba le wena. Seo ga se makatše. Monna wa go loka e lego Jobo, yoo a bego a dumela gore Modimo o bohlale le gore o na le matla, le yena o ile a ikwa bjalo. (Jobo 2:3; 9:4) Ka morago ga gore Jobo a welwe ke mathata a magolo ka go latelana, ao a bego a sa tshepe gore o tla tšwa go wona, o ile a botšiša Modimo a re: “Go re’ng o uta sefahlego se sa gago gomme o ntšea ke le lenaba la gago?”​—Jobo 13:24.

Beibele yona e re’ng ka taba ye? Na re swanetše go bea Modimo molato ge re welwa ke mathata? Na go na le bohlatse bjo bo bontšhago gore Modimo o na le taba le wena le batho ba bangwe? Na go a kgonega gore ka moka ga rena re tsebe ge e ba Modimo a na le taba le rena, a re kwešiša, a re kwela bohloko goba a re thuša ge re na le mathata?

Dihlogong tše di latelago, re tlo bona kamoo dilo tše Modimo a di bopilego di re bontšhago gore o na le taba le rena. (Baroma 1:20) Ka morago ga moo, re tlo bona kamoo Beibele e re bontšhago gore Modimo o na le taba le rena. Ge o ithuta ka Modimo dilong tšeo a di bopilego le ka go bala Beibele, o tlo “mo tseba” gomme wa kgodišega gore ‘o a go hlokomela’ le gore o na le taba le wena.​—1 Johane 2:3; 1 Petro 5:7.