Ge e ba Modimo e se yena a dirago gore re tlaišege, ke eng seo se dirago gore batho ba bantši ba hloke dijo, bodiidi bo se fele, go be le dintwa tše šoro, malwetši ao a golofatšago batho le dikotsi tša tlhago? Beibele e bolela ka dilo tše tharo tše dikgolo tšeo di bakago tlaišego:

1. Go se Naganele Batho ba Bangwe, Megabaru le Lehloyo. “Motho [o] buša yo mongwe gore a mo gobatše.” (Mmoledi 8:9) Gantši batho ba tlaišwa ke batho ba babe bao ba sa naganelego batho ba bangwe.

2. Nako le Ditiragalo Tšeo di sa Letelwago. Gantši batho ba tlaišega “ka gobane nako le ditiragalo tšeo di sa letelwago di ba wela ka moka.” (Mmoledi 9:11) Seo se ra gore batho ba ikhwetša ba le lefelong leo le fošagetšego ka nako yeo e fošagetšego, dikotsi di no direga re sa letela, batho ba dira diphošo goba ba dira dilo ntle le go hlokomela.

3. Mmuši yo Mobe wa Lefase. Beibele e hlalosa gabotse lebaka le legolo leo le dirago gore batho ba tlaišege. E re: “Lefase ka moka le rapaletše matleng a yo kgopo [goba yo mobe].” (1 Johane 5:19) “Yo kgopo” ke Sathane Diabolo, e lego sebopiwa se se nago le matla sa moya seo mathomong e bego e le morongwa wa Modimo. Eupša morongwa yoo “ga se a ka a ema a tiile therešong.” (Johane 8:44) Barongwa ba bangwe le bona ba ile ba šala Sathane morago, ba tlogela go kwa Modimo gomme ba phela ka tsela yeo ba e ratago, ke moka ya ba batemona. (Genesi 6:1-5) Ga e sa le Sathane le batemona ba gagwe ba tlogela go kwa Modimo, ba hlohleletša batho go dira dilo tše mpe. Le lehono go sa le bjalo. Ga bjale, Sathane o galefile kudu e bile ‘o timetša lefase ka moka,’ gomme seo se feleleditše ka gore go be le ‘madimabe lefaseng.’ (Kutollo 12:9, 12) Ruri Sathane ke mmuši yo mobe. O thabela go bona batho ba tlaišega. Sathane ke yena a dirago gore batho ba tlaišege, e sego Modimo.

NAGANA KA TABA ŠE: Sathane, yo a se nago kwelobohloko, ke yena a tlaišago batho. Go fapana le Sathane, “Modimo ke lerato.” (1 Johane 4:8) Ge Beibele e bolela ka tsela yeo Modimo a nago le lerato ka yona, e re: “Go dira tše kgopo a go be kgole le Modimo wa therešo, le go dira ka go hloka toka a go be kgole le Ramatlaohle!”​—Jobo 34:10.

Ka gona, o ka ipotšiša gore: ‘Modimo Ramatlaohle o tlo dumelela Sathane gore a buše batho go fihlela neng?’ Modimo o hloile dilo tše mpe, gomme o kwa bohloko ge re tlaišega. Go oketša moo, Beibele e re: “[Lahlelang] dipelaelo tša lena ka moka go yena, gobane o a le hlokomela.” (1 Petro 5:7) Modimo o a re rata e bile o na le matla a go fediša tlaišego ka moka le go hloka toka. Sehlogo se se latelago se tla hlalosa taba ye. *