Pejana re ile ra bolela ka kanegelo ya Croesus yo a ilego a forwa ke sedupe sa Delphi, moo a ilego a feleletša a fentšwe ke kgoši ya Peresia. Ka lehlakoreng le lengwe, Beibele e bolela ka boporofeta bjo bo makatšago bja mabapi le kgoši ya Peresia bjo bo ilego bja phethagala ka mo go feletšego.

Mo e ka bago mengwaga e 200 pele ga moo, e lego nako e telele pele ga ge kgoši yeo e ka belegwa, moporofeta wa Moheberu e lego Jesaya o ile a bolela ka leina Korese gomme a bolela le kamoo a bego a tla fenya motse o matla wa Babilona ka gona.

Jesaya 44:24, 27, 28 e re: “Se ke seo Jehofa . . . a se boletšego, . . . ‘Yo a rego go bodiba: “Pšhaa; dinoka tša gago ka moka ke tla di gopiša”; Yo a bolelago ka Korese, a re: “Ke modiši wa ka gomme o tla phetha ka botlalo tšohle tše di nkgahlago”; le seo ke se bolelago ka Jerusalema, ka re: “E tla agwa lefsa.” Ka ba ka bolela ka tempele, ka re: “Motheo wa gago o tla thewa.”’”

Go ya ka radihistori wa Mogerika e lego Herodotus, madira goba mašole a Korese a ile a aroša meetse a Noka ya Eforate yeo e bego e elela go phatša motse wa Babilona. Leano la Korese le ile la dira gore madira a gagwe a tsene motseng ka go tshela noka. Ka morago ga go thopa motse, Korese o ile a lokolla Bajuda bao ba bego ba le bothopša Babilona gomme ba boela morago go yo aga lefsa motse wa Jerusalema wo o bego o sentšwe mengwageng e 70 pele ga moo.

Jesaya 45:1 e re: “Se ke seo Jehofa a se boditšego motlotšwa wa gagwe, Korese, yoo ke swerego seatla sa gagwe sa le letona, gore ke fenye ditšhaba tšeo di lego pele ga gagwe, e le gore ke amoge dikgoši matla; gore ke mmulele mabati ao a nago le karolo ya ka godimo le ya ka fase, e le gore dikgoro di se ke tša tswalelwa.”

Baperesia ba ile ba tsena motseng woo ka mojako wa mabati a mabedi ao ka go se šetše a bego a tlogetšwe a butšwe. Ge nkabe Bababilona ba ile ba tseba ka leano la Korese, nkabe ba ile ba tswalela dikgoro ka moka tšeo di bego di bulegela ka nokeng. Eupša motse o be o sa šireletšega.

Boporofeta bjo bjo bo makatšago ke e nngwe ya diporofeto tše dintši tšeo di hwetšwago ka Beibeleng tšeo di ilego tša phethagala ka mo go feletšego. a Ka go fapana le dipolelelopele tša batho tšeo gantši di theilwego medimong ya maaka, diporofeto tša ka Beibeleng di tšwa go: “Yo a bolelago go tloga mathomong dilo tša mafelelo, le yo a bolelago go tloga kgale dilo tšeo di sešogo tša dirwa.”​—Jesaya 46:10.

Ke Modimo wa nnete feela, yo leina la gagwe e lego Jehofa yo a ka bolelago seo. Leina leo le bolela  gore “Yo a Bakago go ba Gona.” Le šupa go bokgoni bja gagwe bja go tseba le go rulaganya dilo tšeo di sa tlago ka go dumelelana le thato ya gagwe. Le re tiišetša gore o tlo phethagatša dilo ka moka tšeo a di tshepišitšego.

Na o ka rata go tseba seo diporofeto tša Beibele di se bolelago ka mehla ya rena? Mengwageng e ka bago e 2 000 e fetilego, Beibele e ile ya bolela e sa le pele gore “mehleng ya bofelo” go tlo ba le “dinako tše di hlobaetšago tšeo go lego thata go lebeletšana le tšona.” Ke mehla ya bofelo bja eng? E sego bofelo bja lefase goba batho, eupša bja dintwa, kgatelelo le tlaišego tšeo di bego di dutše di tlaiša batho ka mengwaga e mentši kudu. Anke re bolele ka diporofeto tše sego kae tšeo di bontšhago gore ke ‘mehla ya bofelo.’

2 Timotheo 3:1-5 e re: “Mehleng ya bofelo . . . batho e tla ba baithati, barati ba tšhelete, ba go ikgantšha, ba ikgogomošago, barogaki, ba go se kwe batswadi, ba go se leboge, ba go se botege, ba ba se nago lerato la tlhago, ba ba sa ikemišetšago go amogela tumelelano le ge e le efe, bathomeletši, ba se nago boitshwaro, ba bogale, ba go se rate go loka, baeki, ba hlogothata, ba tletšego boikgantšho, ba ratago maipshino go e na le go rata Modimo, bao ba bonagalago eka ke barapedi ba Modimo eupša ba latola matla a borapedi bjoo maphelong a bona.”

Na ga o dumele gore batho ba bantši ba itshwara bjalo lehono? Na o lemogile gore re dikologilwe ke batho bao ba ithatago kudu, ba ratago tšhelete le bao ba ikgogomošago? Na o lemogile gore batho ba nyaka dilo ka kgang e bile ke bao ba sa ikemišetšago go dumelelana le batho ba bangwe? Ga go pelaelo gore o a bona gore bana ba bantši kudu ga ba kwe batswadi gomme le batho ka kakaretšo ba rata maipshino go e na le go rata Modimo. Maemo a a gakala letšatši le lengwe le lengwe.

Mateo 24:6, 7 e re: “Le tla kwa ka dintwa le dipego tša dintwa . . . Setšhaba se tla tsogela setšhaba gomme mmušo wa tsogela mmušo.”

Go naganelwa gore palo ya mahu ao a bakilwego ke dintwa ga e sa le go tloga ka 1914 e feta kgole dimilione tše 100, e lego palo yeo e fetago palomoka ya badudi ba dinaga tše dintši. Nagana kamoo seo se bakilego megokgo, manyami le tlaišego ka gona. Na ditšhaba di ile tša ithuta se sengwe tabeng ye gomme tša fediša dintwa?

Mateo 24:7 e re: “Go tla ba le tlhaelelo ya dijo.”

Lenaneo la Lefase la Kabo ya Dijo le itše: “Lefaseng le leo re tšweletšago dijo tše di ka lekanago motho yo mongwe le yo mongwe, batho ba dimilione tše 815, e lego motho o tee go ba senyane, ba robala ka tlala. Go oketša moo, motho o tee go ba bararo o na le mohuta o itšego wa phepompe.” Go akanyetšwa gore bana ba e ka bago ba dimilione tše tharo ba a hwa ka baka la tlala ngwaga o mongwe le o mongwe.

Luka 21:11 e re: “Go tla ba le ditšhišinyego tše dikgolo tša lefase.”

Ngwaga le ngwaga, go ba le ditšhišinyego tše dikgolo tša lefase tše e ka bago tše 50 000 tšeo batho ba kgonago go di kwa. Tše e ka bago tše 100 di baka tshenyo e kgolo meagong. Le gona, ngwaga le ngwaga go ba le tšhišinyego e kgolokgolo ya lefase. Go ya ka kakanyetšo e nngwe, ditšhišinyego tša lefase di bolaile batho ba 471 000 magareng ga ngwaga wa 1975 le wa 2000.

Mateo 24:14 e re: “Ditaba tše tše dibotse tša Mmušo di tla bolelwa lefaseng ka moka gore e be bohlatse go ditšhaba tšohle, ke moka bofelo bo tla tla.”

Dihlatse tša Jehofa tšeo di fetago dimilione tše seswai di ruta batho ebangedi ya Mmušo wa Modimo dinageng tše e ka bago tše 240. Di bolela ebangedi dinageng tša kgole le kgauswi. Boporofeta bo re botša gore ge modiro wo o feditšwe gomme Modimo a kgotsofetše, “bofelo bo tla tla.” Seo se ra go re’ng? Se ra gore pušo ya batho e tla fela gomme gwa tla Mmušo wa Modimo. Ke ditshepišo dife tšeo di tlo phethagalago ka tlase ga Mmušo wa Modimo? Tšwela pele o bala gore o hwetše dikarabo.