NGWAGA o mongwe le o mongwe, batho bao ba fetago dimilione tše tshela ba tšea leeto la go ya sethokgweng sa dihlare tša metsedara seo se lego lekatana Pheninsuleng ya Shima kua Japane. Ba ya Lefelong le Lekgethwa la borapedi la Ise, moo modimogadi wa letšatši wa bodumedi bja Boshinto, yoo a bitšwago Amaterasu Omikami, a bego a dutše a rapelwa gona ka mengwaga e ka bago e dikete tše pedi. Barapedi ba thoma pele ka go itlhwekiša ka go hlapa matsogo le melomo. Ke moka, ba ema pele ga holo ya borapedi (haiden) gomme ba latela moetlo wa go inama, go phaphatha matsogo le go rapela modimogadi yoo. * Bodumedi bja Boshinto bo dumelela balatedi ba bjona go tsenela madumedi a mangwe, le gona Mabuddha a mangwe, batho bao ba ipitšago Bakriste le ba bangwe ga ba bone go na le bothata ge ba latela meetlo ya Boshinto lefelong le la borapedi.

Madumedi a mantši a magolo lefaseng a na le mafelo a makgethwa a borapedi, * gomme batho ba dimilionemilione ba ya mafelong a bjalo go rapela. Dinageng tša batho bao ba ipitšago Bakriste, go na le dikereke tše dintši le mafelo a makgethwa ao go ona ba rapelago Jesu, Maria le bakgethwa. A mangwe a go swana le wona a mafelong ao ditiragalo tša ka Beibeleng di diragetšego go ona goba moo go thwego go diregile mehlolo ya morago bjale gaešita le mo go bewago mašaledi a dilo tša bodumedi. Batho ba bantši ba rapela mafelong a makgethwa ka ge ba dumela gore dithapelo tša bona di tla kwewa bokaone ge ba le moo. Ba bangwe ba fihla lefelong leo le lekgethwa ka morago ga gore ba tšee leeto le letelele e le ge ba bontšha gore ba ineetše gakaakang bodumeding.

Na dithapelo le ditopo di tla kwewa gakaone ge di rapelwa lefelong le lekgethwa? Na Modimo o tla thabišwa ke boineelo bja bao ba tšeago maeto a go ya mafelong a makgethwa a borapedi? Na Bakriste ba swanetše go rapela mafelong a makgethwa? Dikarabo tša dipotšišo tše di ka se re botše feela kamoo re swanetšego go lebelela taba ya go rapela mafelong a makgethwa, eupša di tla re thuša le go kwešiša mohuta wa borapedi bjo Modimo a bo amogelago.

Poledišano yeo Jesu a bilego le yona le mosadi wa Mosamaria e bontšha ka moo Modimo a lebelelago batho ba go rapela mafelong a makgethwa. Jesu o be a le leetong a phatša Samaria gomme a khutša sedibeng sa kgauswi le motse wa Sikara. O ile a thoma poledišano le mosadi yo a bego a tlile go ga meetse sedibeng seo. Ge ba le gare ba boledišana, mosadi yoo o ile a bontšha phapano e kgolo ya bodumedi gare ga Bajuda le Basamaria. Mosadi yoo o itše: “Borakgolokhukhu ba rena ba be ba rapela thabeng ye; eupša lena le re Jerusalema ke lefelo leo batho ba swanetšego go rapela go lona.”—Johane 4:5-9, 20.

 Thaba yeo mosadi wa Mosamaria a bego a bolela ka yona e be e le ya Geritsima, yeo e lego mo e ka bago dikhilomithara tše 50 ka leboa la Jerusalema. Gona moo Basamaria ba kile ba ba le tempele yeo ba bego ba keteka meletlo ya go swana le Paseka. Go e na le gore Jesu a bolele kudu ka phapano yeo e bego e le gona gare ga Bajuda le Basamaria, o ile a re go mosadi yoo: “Ntumele, wena mosadi ge ke re: Go tla nako yeo ka yona le ka se kego la rapela Tate thabeng ye goba Jerusalema.” (Johane 4:21) A karabo e kgahlišago gakaakaang, kudukudu ka ge e be e etšwa go Mojuda! Ke ka baka la’ng batho ba be ba ka se sa rapela tempeleng ya Modimo kua Jerusalema?

Jesu o tšwetše pele ka gore: “Nako e a tla le bjale ke yona, yeo ka yona barapedi ba kgonthe ba tlago go rapela tate ka moya le ka therešo, gobane ruri tate o nyaka ba bjalo gore ba mo rapele.” (Johane 4:23) Ka mengwaga e mentši, Bajuda ba be ba lebelela tempele e botse ya Jerusalema e le lefelo la borapedi bja bona. Ba be ba eya moo gararo ka ngwaga go yo direla Jehofa Modimo wa bona dihlabelo. (Ekisodo 23:14-17) Eupša Jesu o itše tše ka moka di be di tlo fetoga le gore “barapedi ba kgonthe” ba tla rapela “ka moya le ka therešo.”

Tempele ya Bajuda e be e le moago wo o ka bonwago wo o bego o le lefelong le itšego. Eupša moya le therešo ga se dilo tšeo di ka bonwago, gape ga di lefelong le itšego. Ka gona, Jesu o be a hlalosa gore borapedi bja Bokriste bja therešo bo be bo ka se ithekge ka gore ba rapela ba le moagong goba lefelong lefe, e ka ba Thabeng ya Geritsima, tempeleng ya Jerusalema goba lefelong le ge e le lefe le lekgethwa.

Ge a be a boledišana le mosadi wa Mosamaria, Jesu gape o ile a bolela gore “nako” ya phetogo ye borapeding bja Modimo e be e tlo “tla.” E be e tlo tla neng? Nako yeo e ile ya fihla ge Jesu, ka lehu la gagwe la sehlabelo, a fediša tsela ya Bajuda ya borapedi yeo e bego e theilwe Molaong wa Moshe. (Baroma 10:4) Lega go le bjalo, Jesu gape o itše: “Le bjale ke yona.” Ke ka baka la’ng a ile a re’alo? Ka gobane ka ge e le Mesia, o be a šetše a kgoboketša barutiwa bao ba bego ba tlo latela taelo yeo a e boletšego ka morago, yeo e rego: “Modimo ke Moya gomme bao ba mo rapelago ba swanetše go mo rapela ka moya le ka therešo.” (Johane 4:24) Ka gona, go rapela Modimo ka moya le ka therešo go bolela eng?

Ge Jesu a be a bolela ka go rapela ka moya, o be a sa bolele gore batho ba be ba tlo tsenwa ke moya o itšego goba go rapela ka moya o mafolofolo. Go e na le moo, o be a bolela gore moya o mokgethwa wa Modimo o be o tla re hlahla, go akaretša go re thuša go kwešiša Mangwalo. (1 Bakorinthe 2:9-12) Le gona, therešo yeo Jesu a boletšego ka yona ke tsebo e nepagetšego ya seo Beibele e se rutago. Ka gona, borapedi bja rena bo tla amogelwa ke Modimo ge e ba bo dumelelana le seo  Beibele e se rutago le go hlahlwa ke moya o mokgethwa, go e na le go swarelwa lefelong le lekgethwa.

Bakriste ba swanetše go lebelela bjang taba ya go rapela mafelong a makgethwa le go tšea maeto a go ya moo? Ge re ela hloko taelo ya Jesu ya gore barapedi ba therešo ba swanetše go rapela Modimo ka moya le ka therešo, re ka kgona go bona gabotse gore Tatago rena wa magodimong ga a kgahlišwe ke borapedi bjo bo dirwago mafelong a makgethwa. Go tlaleletša go seo, Beibele e re botša kamoo Modimo a lebelelago taba ya go rapela medimo ya diswantšho. E re: “Tšhabang borapedi bja medimo ya diswantšho” gomme le “itišeng go medingwana.” (1 Bakorinthe 10:14; 1 Johane 5:21) Ka gona, Mokriste wa therešo a ka se rapele lefelong leo le lebelelwago e le le lekgethwa goba leo le kgothaletšago batho go rapela medimo ya diswantšho. Ka baka la ge mafelo a makgethwa a borapedi a kgothaletša dilo tšeo Modimo a sa di nyakego, Bakriste ba therešo ga ba rapele go ona.

Lega go le bjalo, se ga se re gore Lentšu la Modimo le thibela batho go ba le mafelo ao ba a ratago a go rapela, go ithuta goba go naganišiša. Lefelo la go swarela diboka leo le rulagantšwego gabotse le leo le hlomphegago le re thuša go ithuta le go ahlaahla dilo tšeo di tšwago ka Beibeleng. Le gona ga se phošo go beela motho yo a hwilego leswika. Se e ka fo ba mokgwa wa go mo gopola goba go bontšha lerato. Eupša, go tšea lefelo leo e le le lekgethwa goba go bea diswantšho goba mašaledi a dilo tša bodumedi moo, go tla be go ganetšana le mantšu a Jesu.

Ka gona, ga go hlokagale gore o ye lefelong le lekgethwa e le ge o holofetše gore Modimo o tla kwa dithapelo tša gago bokaone ge o le moo. Le gona o ka se thabiše Modimo goba a go nea ditšhegofatšo tše di kgethegilego ge o tšea leeto la go ya lefelong le lekgethwa. Beibele e re botša gore Jehofa Modimo, e lego “Morena wa legodimo le lefase, ga a dule ditempeleng tše di dirilwego ka diatla tša batho.” Eupša se ga se re gore Modimo o kgole le rena. Re ka kgona go mo rapela kae le kae mo re lego gona gomme a kgona go re kwa ka gobane “ga a kgole le yo mongwe le yo mongwe wa rena.”—Ditiro 17:24-27.