Go Rapela go ka go Thuša Bjang?

BAPALA

Ge Pamela a be a swerwe ke bolwetši bja kankere, o ile a yo bona ngaka. Lega go le bjalo, o ile a rapela Modimo gore a mo thuše go kgotlelela bolwetši bjoo bo bego bo mo kweša bohloko. Na go rapela go ile gwa mo thuša? Ee.

Pamela o re: “Ka mehla ge ke be ke eya ngakeng gore ke alafiwe, ke be ke tšhoga kudu. Eupša ge ke be ke rapela Jehofa Modimo, o be a nthuša go iša maswafo fase. Ke sa kwa dihlabi tše bohloko tšeo di bakwago ke bolwetši bjo, eupša go rapela go nthuša gore ke kgotlelele go ena le gore ke hlwe ke nagana ka bolwetši bja ka. Seo se dira gore ge batho ba mpotšiša gore ke ikwa bjang, ke ba botše gore: ‘Ke sa babja, mara ke thabile!’”

Ke nnete gore ga se ra swanela go rapela Modimo ge feela re bona gore re na le mathata a magolo goba re babja kudu. Ka moka ga rena re kopana le mathata bophelong, e ka ba a magolo goba a manyenyane, ao re ka se kgonego go a rarolla ka borena. Na thapelo e ka re thuša go rarolla mathata a mohuta wo?

Ekwa gore Beibele e reng mo go Psalme 55:22. E re: “Lahlela maima a gago go Jehofa, gomme yena o tla go thekga. Le ka mohla a ka se dumelele gore moloki a šišinyege.” Ruri mantšu a a kgothatša! Bjale o ka ipotšiša gore, ‘Go rapela Modimo go ka nthuša bjang?’ Go rapela Modimo go ka go thuša ge feela o mo rapela ka tsela yeo a e nyakago, e bile a ka go thuša go lebeletšana le mathata a gago.—Bona lepokisi leo le rego, “ Kamoo go Rapela go ka go Thušago ka Gona.”

Kamoo go Rapela go ka go Thušago ka Gona

Go ba le khutšo ya monagano

Bafilipi 4:6,7 e re: “Tsebišang Modimo dikgopelo tša lena . . . ke moka khutšo ya Modimo yeo e fetago kwešišo yohle ya batho e tla diša dipelo tša lena le matla a lena a monagano ka Kriste Jesu.” Mantšu a a re thuša go kwešiša gore ge e ba re botša Modimo mathata a rena, o tla re thuša gore re dule re išitše maswafo fase, le gore re dire diphetho tše dibotse le ge re na le stress.

Go hwetša bohlale bjo bo tšwago go Modimo

Jakobo 1:5 e re: “Ka gona ge e ba mang le mang wa lena a hloka bohlale, a a tšwele pele a kgopela Modimo, gobane o fa bohle kudu ka ntle le go goboša; o tla bo newa.” Gantši ge re imetšwe ga re kgone go dira diphetho tše dibotse, eupša ge re ka kgopela Modimo gore a re fe bohlale, o tla re gopotša mangwalo ao a lego ka Lentšung la gagwe e lego Beibele, gore a re thuše go dira diphetho tše dibotse.

Go hwetša khomotšo le matla

Bafilipi 4:13 e re: “Dilong tšohle ke na le matla ka baka la yo a mphago matla.” Ka ge Jehofa e le Modimo Ramatlaohle, a ka go fa matla a gore o kgotlelele mathata a gago. (Jesaya 40:29) Beibele e re Jehofa gore ke “Modimo wa khomotšo yohle.” Se se no ra gore Modimo a ka re homotša “ditlaišegong tša rena ka moka.”—2 Bakorinthe 1:3, 4.

GO RAPELA GO KA GO HOLA BJANG?

Ke nnete gore Jehofa ga a go gapeletše gore o mo rapele, eupša ka ge a go rata o go mema gore o dire bjalo. (Jeremia 29:11, 12) Go thwe’ng ge e ba nakong e fetilego, o be o bona eka Modimo ga a arabe dithapelo tša gago? O se ke wa nyama goba wa lahlela toulo. Nagana ka batswadi bao ba ratago bana ba bona. Ge bana bao ba ba kgopela thušo, batswadi bao ga ba no ba thuša ka yona nako yeo, goba ba dira dilo ka tsela yeo bana ba nyakago ka yona. Mohlomongwe batswadi ba, ba naganne go direla bana ba bona dilo tše kaone go feta tšeo bana ba di kgopetšego. Eupša ka ge batswadi ba ba rata bana ba bona, ba tlo feleletša ba ba thušitše.

Go no swana le batswadi ba ba lerato, Jehofa Modimo, yoo e lego tate yo a nago le lerato go feta batswadi ka moka, le wena o nyaka go go thuša le go go fa dilo tšeo o mo kgopelago. Ge o ka ithuta ka mo go tseneletšego mangwalo ao re boletšego ka ona ka makasineng wo, gomme wa leka ka thata go diriša seo o ithutilego sona, Modimo o tlo araba dithapelo tša gago ka tsela yeo o bego o sa e letela!—Psalme 34:15; Mateo 7:7-11.

Dihlatse tša Jehofa

Go Rapela go ka go Thuša Bjang?

You May Also Like

Thapelo—Seo e ka go Direlago Sona

Thapelo—Na e tla re Thuša?

Go Rapela go ka go Thuša Bjang?

TAONELOUTA KA

You May Also Like

TAONELOUTA KA

Kgetha Leleme la Gago

Romela