BA BANGWE BA RE GA E ŠOME. Ngaka e nngwe e boletše gore go diriša Beibele bakeng sa tlhahlo go swana le go ruta batho ka dikhemikhale o diriša puku ya bo-1920. Motho yo a sa hlomphego Beibele a ka ba a go botšiša ge e ba o ka diriša puku ya tlhahlo ya khomphutha yeo e šiilwego ke nako go go hlahla go diriša khomphutha yeo e lego nakong. Ka mantšu a mangwe, ba bangwe ba lebelela Beibele e le yeo e šiilwego ke nako kudu.

Na go na le motho yo a bego a ka diriša puku ya kgale gakaalo lefaseng la mehleng yeno la thekinolotši ya maemo a godimo? Go ba gona, diwepesaete tše dintši kudu le di-blog di dula di ntšha keletšo le thlahlo e lego nakong. Thelebišeneng go na le mananeo a mantši ao a nago le keletšo yeo e tšwago go ditsebi tše dintši tša monagano, ditsebi tšeo di eletšago batho gore ba phele bjang gotee le ya bangwadi. Le gona mabenkele a dipuku a rekiša dipuku tše dintši kudu tšeo di neago batho keletšo, gomme seo se dira gore kgwebo ye e dire tšhelete e ntši kudu.

Ka ge go na le tsebišo e ntši yeo e lego nakong, gore’ng re ka diriša Beibele, e lego puku yeo e ngwadilwego mengwageng e ka bago e 2 000 e fetilego? Na batho bao ba sa hlomphego Beibele ba tla be ba sa nepa ge ba bolela gore go diriša puku ya kgale gakaalo go swana le go diriša puku ya dikhemikhale goba puku ya kgale ya thlahlo ya go diriša khomphutha? Ge e le gabotse, go nagana ka tsela yeo go fošagetše. Thutamahlale le thekinolotši di dula di fetoga ka lebelo, eupša na dilo tšeo ka tlhago batho ba di nyakago di fetogile? Batho ba sa dutše ba nyaka go tseba morero wa bophelo le go thaba ka tekanyo e itšego, go šireletšega, go ba le ditswalano tše dibotse tša lapa gotee le segwera se se thabišago.

Le ge Beibele e le ya kgale, e bolela ka dinyakwa tšeo le dilo tše dingwe. Gape e bolela gore e buduletšwe ke Mmopi wa rena. E bolela gore e ka re thuša dikarolong ka moka tša bophelo le go re hlama gore re kgone go lebeletšana le bothata le ge e le bofe. (2 Timotheo 3:16, 17) Gape e bolela gore e nea keletšo yeo e sa šiiwego ke nako le ka mohla. Beibele ka boyona e re: “Lentšu la Modimo le a phela.”—Baheberu 4:12.

Na ruri Beibele e ka ba e bolela nnete? Na e šiilwe ke nako goba ge e le gabotse ke puku yeo e nago le mohola go phala dipuku ka moka, yona puku e phelago? Morero wa kgatišo ye ya Morokami yeo e lego ya mathomo lelokelelong la dikgatišo tšeo di kgethegilego ke go go thuša gore o hwetše dikarabo tša dipotšišo tšeo.