HENOGE o phetše nako e telele. Go ka ba thata gore re nagane ka seo, eupša mengwaga ya bophelo bja monna yoo e bile e 365​—e lego tekanyo ya ge batho ba bane ba phetše nako e telele mehleng yeno! Lega go le bjalo, mehleng ya gagwe o be a tloga a se a tšofala. Ka nako yeo, mengwagakgolong e fetago e 50 e fetilego, batho ba be ba phela nako e telele kudu go feta lehono. Adama yo e lego motho wa pele, o be a šetše a phetše mengwaga e fetago e 600 ge Henoge a be a belegwa. Le gona Adama o phetše mengwagakgolo e mengwe e meraro ka morago ga moo! Ditlogolo tše dingwe tša Adama di phetše nako e telele go feta moo. Ka gona ge Henoge a be a na le mengwaga e 365, a ka no ba a be a sa na le mafolofolo, a swana le motho yo a bego a sa dutše a letetše go gontši bophelong bja gagwe. Lega go le bjalo, ga se gwa ka gwa ba bjalo.

Go bonagala Henoge a be a le kotsing e kgolo. Akanya ka yena a tšhaba, a sa kgone go lebala kamoo batho bao a bego a sa tšwa go ba botša molaetša o tšwago go Modimo ba arabetšego ka gona. Difahlego tša bona di be di tuka bogale. Batho bao ba be ba mo hloile. Ba be ba nyatša molaetša wa gagwe e bile ba hloile le Modimo yo a bego a mo romile. Ba be ba ka se kgone go hlasela Modimo wa Henoge e lego Jehofa, eupša ba be ba ka hlasela monna yo! Mohlomongwe Henoge o be a ipotšiša ge e ba a be a tla ka a bona lapa la gagwe gape. Na o be a nagana ka mosadi wa gagwe le barwedi ba gagwe goba a nagana ka morwa wa gagwe Methusela goba ka motlogolo wa gagwe e lego Lamege? (Genesi 5:21-23, 25) Na a e be e le ona mafelelo a gagwe?

Henoge ke motho yo a makatšago yo go bolelwago ka yena ka Beibeleng. Go bolelwa ka yena ka botlalo dikarolong tše tharo feela tše kopana ka Beibeleng. (Genesi 5:21-24; Baheberu 11:5; Juda 14, 15) Lega go le bjalo, tšona ditemana tše ge e le gabotse di hlalosa ka mo go lekanego ka monna yo wa tumelo e matla. Na le wena o hlokometše lapa? Na o kile wa lebeletšana le boemo bjo go bjona o ilego wa swanelwa ke go emela seo o tsebago gore se nepagetše? Ge e ba go le bjalo, o ka ithuta mo gontši tumelong ya Henoge.

Ge Henoge a belegwa, boemo bja batho bo be bo sa kgahliše. E be e le moloko wa bošupa lešikeng la Adama. Ke therešo gore batho ba be ba sa le kgauswi le phethego yeo e bego e lahlegetše Adama le Efa. Ke ka lebaka leo batho ba bego ba sa dutše ba phela nako e telele kudu. Lega go le bjalo, ba be ba le boemong bjo bo sa kgahlišego boitshwarong le tswalanong ya bona le Modimo. Bošoro bo be bo tletše gohle. Bošoro bjoo bo thomile molokong wa bobedi, nakong ya ge Kaine a be a bolaya ngwanabo e lego Abele. Go bonagala yo mongwe wa ditlogolo tša Kaine a be a ikgantšha kudu ka go ba yo šoro le yo a itefeletšago go feta Kaine! Molokong wa boraro, go ile gwa tšwelela bobe bjo bongwe. Batho ba ile ba thoma go bitša leina la Jehofa, eupša e sego bakeng sa go le godiša borapeding. Go bonagala ba be ba diriša leina la Modimo le lekgethwa ka tsela ya go le rogaka le ya go le hlompholla.​—Genesi 4:8, 23-26.

Go bonagala mohuta woo wa bodumedi bjo bo gobogilego o be o atile mehleng ya Henoge. Ka gona, ge Henoge a le gare a gola, o ile a swanelwa ke go dira kgetho. Na o be a tla ya le mogofe? Go ba na o be a tla tsoma Modimo wa therešo e lego Jehofa, yo a dirilego magodimo le lefase? O swanetše go ba a ile a kgomega kudu ge a be a ithuta ka Abele, yoo e bilego mohwelatumelo ka ge a be a rapela Jehofa ka tsela yeo e kgahlago Jehofa. Henoge  o ile a kgetha go latela mohlala o swanago. Genesi 5:22 e re botša gore: “[Henoge o ile] a sepela le Modimo wa therešo.” Mantšu ao a kgahlišago a hlaola Henoge e le monna yo a boifago Modimo lefaseng leo le sa boifego Modimo. Ke motho wa pele yoo Beibele e mo hlalosago ka tsela yeo.

Temana yona yeo ya Beibele e re Henoge o ile a dula a sepela le Jehofa le ka morago ga gore a belegelwe morwa yo a bitšwago Methusela. Ka gona re bona Henoge e le monna wa lapa ge a be a na le mengwaga e ka bago e 65. O be a na le mosadi, yoo leina la gagwe le sa bolelwego ka Mangwalong, e bile a na le “barwa le barwedi” bao palo ya bona e sa bolelwego ka Beibeleng. Ge e ba tate a nyaka go sepela le Modimo mola a godiša bana le go hlokomela lapa, gona o swanetše go leka ka gohle go hlokomela lapa la gagwe ka tsela yeo e kgahlago Modimo. Henoge o ile a kwešiša gore Jehofa o be a letetše gore a kgomarele mosadi wa gagwe ka go botega. (Genesi 2:24) Ga go pelaelo gore o ile a dira sohle se a ka se kgonago go ruta bana ba gagwe ka Jehofa Modimo. Mafelelo e bile a fe?

Beibele ga e bolele kudu tabeng yeo. Ga e bolele selo ka tumelo ya morwa wa Henoge e lego Methusela, yoo a phetšego nako e telele go feta batho ka moka bao go bolelwago ka bona ka Beibeleng. Methusela o hweletše ngwageng wa Meetsefula. Lega go le bjalo, Methusela o ile a belegelwa morwa yo a bitšwago Lamege. Lamege o phetše nakong e tee le rakgolo’agwe Henoge ka mengwaga e fetago e lekgolo. Le gona Lamege o ile a gola a bontšha tumelo e makatšago. Jehofa o ile a budulela Lamege gore a bolele boporofeta ka morwa wa gagwe e lego Noa. Boporofeta bjoo bo ile bja phethagala ka morago ga Meetsefula. Noa ka go swana le rakgolokhukhu wa gagwe e lego Henoge, o ile a hlaolwa e le monna yo a bego a sepela le Modimo. Noa ga se a ka a bona Henoge. Eupša Henoge o tlogetše bohwa bjo bo humilego. Noa a ka ba a ithutile ka bohwa bjoo go tatagwe e lego Lamege, goba go rakgolo wa gagwe e lego Methusela goba mohlomongwe go Jarede, e lego tatago Henoge, yo a hwilego ge Noa a be a na le mengwaga e 366.​—Genesi 5:25-29; 6:9; 9:1.

Nagana ka phapano yeo e lego gona magareng ga Henoge le Adama. Le ge Adama a be a phethagetše, o ile a direla Jehofa sebe gomme a tlogelela ditlogolo tša gagwe bohwa bja borabele le manyami. Henoge yena le ge a be a se a phethagala, o ile a sepela le Modimo gomme a tlogelela ditlogolo tša gagwe bohwa bja tumelo. Adama o hwile ge Henoge a na le mengwaga e 308. Na lapa la Adama le ile la llela rakgolokhukhu yo wa moithati? Ga re tsebe. Go sa šetšwe seo, Henoge o ile “[a dula] a sepela le Modimo wa therešo.”​—Genesi 5:24.

Ge e ba o hlokomela lapa, ela hloko seo o ka ithutago sona tumelong ya Henoge. Le ge go le bohlokwa gore o hlokomele ba lapa la gago ka dilo tša nama, ga go na se bohlokwa kudu go feta go ba hlokomela ka thuto ya Modimo. (1 Timotheo 5:8) Ga o dire seo ka go fo bolela eupša o se dira ka go tšea kgato. Ge e ba o kgetha go sepela le Modimo go etša Henoge, gomme o dumelela melao ya Modimo yeo e buduletšwego gore e hlahle bophelo bja gago, le wena o tla nea ba lapa la gago bohwa bjo bo humilego, e lego mohlala o mobotse kudu wo ba ka o ekišago.

Henoge a ka ba a be a lewa ke bodutu ka ge e be e le monna wa tumelo lefaseng leo le se nago tumelo. Na Modimo wa gagwe e lego Jehofa o ile a mo šetša? Ee, o be a mo šeditše. Go ile gwa fihla letšatši leo ka lona Jehofa a ilego a boledišana le mohlanka yo wa gagwe yo a botegago. Modimo o ile a nea Henoge molaetša wo a bego  a swanetše go o botša batho ba mehleng ya gagwe. Ka go re’alo, o ile a dira Henoge moporofeta wa mathomo yoo molaetša wa gagwe o utolotšwego ka Beibeleng. Re tseba se ka gobane Juda, e lego ngwanabo Jesu ka motswadi o tee, o ile a budulelwa gore a ngwale mantšu a Henoge a boporofeta ka morago ga mengwaga e makgolo. *

Boporofeta bja Henoge bo be bo re’ng? Bo be bo re: “Bonang! Jehofa o tlile le diketekete tša barongwa ba gagwe ba bakgethwa, go tlo phetha kahlolo go bohle le go bea bohle ba sa boifego Modimo molato mabapi le ditiro tšohle tša bona tša go se boife Modimo tše ba di dirilego ka tsela ya go se boife Modimo, le mabapi le dilo tšohle tše di tšhošago tšeo badiradibe ba sa boifego Modimo ba di boletšego ka yena.” (Juda 14, 15) Bjale, selo sa pele seo o ka se elago hloko ke gore Henoge o hlalositše dilo go le bjalo ka ge eka Modimo o šetše a dirile seo boporofeta bo se bolelago. Wo e bile mokgwa woo diporofeto tše dintši tša ka morago di ilego tša o latela. Kgopolo ke gore: Moporofeta o bolela ka selo seo a kgodišegilego gore se tlo direga moo e lego gore se ka hlaloswa go le bjalo ka ge e ka se šetše se diregile!​—Jesaya 46:10.

Henoge o kwele go le bjang go bolela molaetša woo, mohlomongwe a o botša batho ka moka bao ba bego ba tla mo theetša? Ela hloko kamoo molaetša woo o bego o le matla ka gona; o dirišitše ka makga a mane polelwana bao “ba sa boifego Modimo” bakeng sa go sola batho, ditiro tša bona le tsela yeo ba bego ba dira ditiro tšeo ka yona. Ka baka leo, boporofeta bjoo bo be bo lemoša batho ka moka gore lefase leo ba le agilego go tloga mola batho ba rakwago tšhemong ya Edene, e be e le le lebe ka mo go feletšego. Lefase leo le be le tla lebana le phedišo e šoro ge Jehofa a etla le “diketekete tša barongwa ba gagwe ba bakgethwa,” e lego madira a matla a barongwa bao ba hlametšwego ntwa, ge ba tliša phedišo. Henoge o ile a bolela temošo yeo ya Modimo ka sebete, a dira seo a nnoši! Mohlomongwe Lamege yo monyenyane o be a bogetše seo, a makaletše sebete sa rakgolo’agwe. Ge e ba go le bjalo, gona re ka kgona go kwešiša lebaka la seo gabotse.

Tumelo ya Henoge e ka re tutuetša gore re ipotšiše ge e ba re lebelela lefase leo re phelago go lona ka tsela yeo Modimo a le lebelelago ka yona. Kahlolo yeo Henoge a e boletšego ka sebete e sa dutše e le gona; e šoma le lefaseng la mehleng yeno go etša ge e be e šoma lefaseng la mehleng ya Henoge. Ka go dumelelana le temošo ya Henoge, Jehofa o ile a tliša Meetsefula lefaseng leo le sa boifego Modimo la mehleng ya Noa. Eupša phedišo yeo ke mohlala wa phedišo e kgolo ya nakong e tlago. (Mateo 24:38, 39; 2 Petro 2:4-6) Lehono, Modimo a na le madira a gagwe a makgethwa, o ikemišeditše go tliša kahlolo ya go loka lefaseng leo le sa boifego Modimo, go etša mehleng e fetilego. Yo mongwe le yo mongwe wa rena o swanetše go ela hloko temošo ya Henoge gomme a e botše ba bangwe. Ba lapa le bagwera ba ka no se eme le rena. Ka dinako tše dingwe re ka ikwa eka re lahlegile. Eupša Jehofa le ka mohla ga se a ka a lahla Henoge; le lehono a ka se lahle bahlanka ba gagwe bao ba botegago!

Mafelelo a Henoge e bile afe? Ka tsela e itšego, lehu la gagwe ke leo le makatšago kutšwanyana le go tlaba go feta bophelo bja gagwe. Pego ya Genesi e re: “Henoge [o ile a dula] a sepela le Modimo wa therešo. Ke moka a se sa hlwa a eba gona, gobane Modimo a mo tšere.” (Genesi 5:24) Modimo o tšere Henoge bjang? Moapostola Paulo o ile a hlalosa ka morago gore: “Ka tumelo Henoge o ile a tlošwa e le gore a se bone lehu, gomme o be a sa hwetšagale felo gobane Modimo o be a mo tlošitše; eupša pele ga go tlošwa ga gagwe o ile a hlatselwa gore o kgahlišitše Modimo gabotse.” (Baheberu 11:5) Paulo o be a e ra gore’ng ka polelwana e rego “a tlošwa e le gore a se bone lehu”? Diphetolelo tše dingwe tša Beibele di re Modimo o išitše Henoge legodimong. Eupša ga go bjalo. Beibele e bontšha gore Jesu Kriste ke yena wa mathomo wa go tsošetšwa legodimong.​—Johane 3:13.

 Ka gona, ke ka kgopolo efe Henoge a ilego a “tlošwa” gore a se “bone lehu”? Go ka direga gore Jehofa o tlošitše Henoge ka go mo robatša lehung, a mo dira gore a se kwe dihlabi le ge e le dife tša lehu. Pele, Henoge “o ile a hlatselwa gore o kgahlišitše Modimo gabotse.” Bjang? Pejana ga lehu la gagwe, Henoge a ka ba a ile a bona pono e tšwago go Modimo, mohlomongwe yeo e bego e mmontšha lefase e le paradeise. Henoge o ile a ithobalela lehung ka morago ga pontšho yeo e botse ya go amogelwa ke Modimo. Ge moapostola Paulo a ngwala ka Henoge le banna le basadi ba bangwe ba tumelo, o itše: “Ka moka ba ile ba hwa ba na le tumelo.” (Baheberu 11:13) Ka morago ga moo, manaba a gagwe a ka ba a ile a tsoma setopo sa gagwe, eupša a se se ‘hwetše felo.’ Mohlomongwe ka gobane Jehofa a se tlošitše gore ba se ke ba se senya goba ba se dirišetša go kgothaletša bodumedi bja maaka. *

Ka gona, re dutše re nagana ka tsela yeo ya Mangwalo, anke re lekeng go akanya kamoo bophelo bja Henoge bo ka bago bo feleleditše ka gona. Akanya ka boemo bjo, o gopola gore e no ba kgonagalo feela. Henoge o be a tšhaba, a lapile o šoro. Batlaiši ba gagwe ba be ba mo kitimiša, ba tuka bogale ka baka la molaetša wa gagwe wa kahlolo. Henoge o ile a hwetša lefelo la go ikuta le go khutša ka nakwana, eupša o be a tseba gore a ka se ba tšhabele ka nako e telele. Bjale o be a dikologwa ke lehu le šoro. O ile a rapela Modimo wa gagwe ge a le gare a khuditše. Ke moka o ile a aparelwa ke khutšo e kgolo. Henoge o ile a tlelwa ke pono yeo e bego e bonagala gabotse bjalo ka ge eka o be a le moo ka kgonthe.

Akanya a bona lefase leo le fapanego ka mo go feletšego le leo a bego a le tseba. O be a bona eka lefase leo ke le lebotse go swana le serapa sa Edene, eupša go be go se na bakerubi bao ba bego ba thibela batho go tsena go sona. Go be go na le banna le basadi ba bantši, bao ka moka ba phetšego gabotse e bile ba na le mafolofolo. Go be go buša khutšo gare ga bona. Go be go se na mohlalanyana wa lehloyo le tlaišo ya bodumedi tšeo Henoge a bego a tseba ka tšona. Ge e le Henoge, o be a ekwa kgonthišetšo ya Jehofa, lerato la gagwe le gore o a mo amogela. O be a kgodišegile gore ke lefelo leo a nyakago go ba go lona; e be e tla ba legae la gagwe. Ge a dutše a ekwa a aparelwa ke khutšo e oketšegilego, Henoge o ile a tswalela mahlo a ya le boroko, bjona boroko bja go se be le ditoro.

O sa dutše a le moo go fihla le lehono, a ithobaletše lehung, a lotegile gabotse kgopolong e sa lekanywego ya Jehofa Modimo! Go etša ge Jesu a ile a holofetša ka morago, go tla tla letšatši leo ka lona bohle bao ba lego kgopolong ya Modimo ba tlago go kwa lentšu la Kriste gomme ba tšwa mabitleng, ba bula mahlo ba le lefaseng le lefsa le lebotse la khutšo.​—Johane 5:28, 29.

Na o ka rata go ba moo? Akanya ka lethabo la ge o kopana le Henoge. Nagana ka dilo tše di kgahlišago tšeo re ka ithutago tšona go yena! A ka re botša ge e ba seo re bego re se nagana ka metsotso ya gagwe ya mafelelo e be e nyakile e le therešo. Eupša gona bjale go na le selo seo re tlogago re swanetše go ithuta sona go yena kapejana. Ka morago ga gore a bolele ka Henoge, Paulo o tšwetše pele ka gore: “Ka ntle le tumelo go kgahliša Modimo gabotse ga go kgonege.” (Baheberu 11:6) Ruri leo ke lebaka le le kwagalago la gore re ekiše tumelo ya go bontšha sebete ya Henoge