1, 2. Ke ka baka la’ng Dihlatse tša Jehofa di tšeela godimo tsela yeo di aparago ka yona? (Bona seswantšho se se lego ka mo godimo.)

KURANTA e nngwe ya se-Dutch e ile ya bega ka seboka seo baetapele ba dikereke ba bilego le sona. E itše: “Bontši bja bona ba be ba se ba apara ka tsela yeo e hlomphegago, kudukudu ge go be go fiša. Lega go le bjalo yona kuranta yeo e begile gape gore “Seo ga se bjalo ka kopano ya Dihlatse tša Jehofa. . . . Bašemane le banna ba apara baki le thai mola dikhethe tša banenyana le basadi e le tša botelele bjo bo lekanego . . . tšeo di lego maemong a mabotse e bile e le tša mehleng yeno.” Ke therešo gore Dihlatse tša Jehofa di dula di retwa ka baka la go ikgabiša “ka moaparo o rulagantšwego gabotse, ka go se solege le ka go hlaphogelwa ga monagano ka tsela e swanelago [batho] bao ba ipolelago gore ba ineetše go Modimo.” (1 Tim. 2:9, 10.) Moapostola Paulo o be a bolela ka basadi, eupša melao e swanago e šoma le go banna ba Bakriste.

² Melao ya maleba ya go apara e bohlokwa go rena bjalo ka ge re le batho ba Modimo, e bohlokwa le go Modimo yo re mo rapelago. (Gen. 3:21) Seo Mangwalo a se bolelago ka moaparo le go itokiša se bontšha gore Mmuši wa legohle o na le tsela yeo a letetšego gore barapedi ba gagwe ba apare ka yona. Ka baka leo, ga se ra swanela go  kgetha go apara le go itokiša go ithekgile feela ka seo rena re se thabelago. Re swanetše go nagana le ka seo se kgahlišago Mmuši Morena Jehofa.

3. Re ka ithuta’ng ka moaparo go tšwa Molaong wo Modimo a bego a o neile Baisiraele?

³ Ka mohlala, Modimo o be a neile Baisiraele melao yeo e bego e ba šireletša boitshwarong bjo bobe bja ditšhaba tšeo di bego di ba dikologile. Molao woo o be o bontšha kamoo Jehofa a bego a ikwa ka gona mabapi le moaparo woo o bego o dira gore go se bonale phapano magareng ga monna le mosadi. (Bala Doiteronomio 22:5.) Go ya ka tlhahlo yeo Modimo a e boletšego mabapi le moaparo, re bona gabotse gore Modimo ga a kgahlišwe ke diaparo tšeo di dirago gore banna ba bonagale okare ke basadi, tšeo di dirago gore basadi ba bonagale okare ke banna goba diaparo tšeo di dirago gore go be thata go tseba gore motho ke monna go ba ke mosadi.

4. Ke’ng seo se ka thušago Bakriste go dira phetho e botse mabapi le kamoo ba aparago ka gona?

⁴ Lentšu la Modimo le na le melao ya motheo yeo e thušago Bakriste go dira diphetho tše dibotse ka moaparo. Seo se bjalo go sa šetšwe moo ba dulago gona, setšo sa bona goba boemo bja leratadima. Ga re hloke lenaneo leo le re botšago ka moaparo wo o amogelegago le wo o sa amogelegego. Go e na le moo, re hlahlwa ke melao ya motheo ya Mangwalo ge re ikgethela diaparo tšeo re di ratago. Anke re eleng hloko melao e mengwe ya motheo ya Beibele yeo e ka re thušago go tseba “thato e botse le e amogelegago le e phethegilego ya Modimo” ge re kgetha seo re tlago go se apara.​—Baroma 12:1, 2.

5, 6. Moaparo wa rena o swanetše go kgoma batho ba bangwe ka tsela efe?

⁵ Moapostola Paulo o ile a budulelwa go gatelela bohlokwa bja molao wa motheo wo o hwetšwago go 2 Bakorinthe 6:4. (Bala.) Ponagalo ya rena e bolela go gontši ka rena. Batho ba bantši ba ka phetha ka gore re batho ba mohuta ofe go ithekgile ka “ponagalo ya [rena ya] ka ntle.” (1 Sam. 16:7) Ka gona, bjalo ka badiredi ba Modimo, re a kwešiša gore ga se ra swanela go apara diaparo tšeo di ratwago ke rena feela. Melao ya motheo yeo re e hwetšago ka Lentšung la Modimo e swanetše go re tutueletša go se apare diaparo tšeo di re swarago, tšeo di bontšhago tša ka gare goba tšeo di tsošago dikganyogo tša thobalano. Seo se bolela gore re ka se apare diaparo tšeo di ntšhetšago ditho tša bong kgakala. Ga go na motho yo a swanetšego go ikwa a sa lokologe go re lebelela goba a tlamega go lebelela ka thoko ge a bona ka mokgwa wo re aperego ka wona.

⁶ Ge re hlwekile, re apere ka go se solege gomme re itokišitše gabotse, batho ba tla re hlompha gomme ba lemoga gore re badiredi ba Mmuši Morena Jehofa. Ba ka ba ba ikwa ba rata Modimo yo re mo rapelago. Go oketša moo, moaparo wa rena wa bothakga o tla dira gore batho ba hlomphe mokgatlo woo re o emelago. Mafelelong, batho ba bangwe ba ka rata go theetša molaetša wa rena wo o phološago maphelo.

7, 8. Ke neng ka mo go kgethegilego moo re nyakago go apara diaparo tša bothakga?

⁷ Re iša tumišo go Modimo wa rena yo mokgethwa, go bana babo rena le dikgaetšedi gaešita le go batho ba tšhemong ya gabo rena ge re apara diaparo tšeo di dirago gore molaetša wo re o bolelago o be le seriti le tšeo di neago Jehofa letago. (Baroma 13:8-10) Go bjalo kudukudu ge re dira mediro ya Bokriste, e bjalo ka go ya dibokeng goba ge re eya tšhemong. Re swanetše go apara ka “tsela e swanelago [batho] bao ba ipolelago gore ba ineetše go Modimo.” (1 Tim. 2:10) Ke therešo gore diaparo tšeo di lebelelwago e le tše di swanetšego lefelong le lengwe, di ka lebelelwa e le tše di sa swanelago go le lengwe. Ka baka leo, batho ba Jehofa lefaseng ka  bophara ba apara go ya ka setlwaedi sa lefelo leo ba lego go lona e le gore ba se ke ba baka dikgopišo.

⁸ Bala 1 Bakorinthe 10:31. Ge re eya dikopanong tše dikgolo le tše dinyenyane moaparo wa rena o swanetše go ba o swanelegago le wa bothakga, o se ke wa bontšha mekgwa e feteletšego ya go apara ya lefase. Re swanetše go phema go apara diaparo tše sa bontšhego bothakga goba tša bošaedi ge re le lefelong la marobalo, ge re iketlile pele le ka morago ga lenaneo. Ka baka leo re tla thabela go tsebiša batho gore re Dihlatse tša Jehofa. Go oketša moo, re ka se be le dihlong tša go nea bohlatse ge sebaka se bulega.

9, 10. Bafilipi 2:4 e ka re thuša bjang go apara gabotse?

⁹ Bala Bafilipi 2:4. Ke ka baka la’ng Bakriste ba swanetše go ela hloko kamoo moaparo wa bona o ka kgomago barapedigotee? Lebaka le lengwe ke gore batho ba Modimo ba šoma ka thata go kwa taelo ya Beibele yeo e rego: “Bolayang mekgwa ya lefase yeo e lego dithong tša mebele ya lena, e lego bootswa, go se hlweke, kganyogo e fošagetšego ya go robala ga monna le mosadi.” (Bakol. 3:2, 5) Ruri ga re nyake go thatafaletša badumedigotee le rena go kwa taelo yeo. Bana babo rena le dikgaetšedi bao ba tlogetšego go itshwara ka tsela e gobogilego ba ka ba ba sa lwantšhana le mekgwa yeo e mebe. (1 Bakor. 6:9, 10) Ruri ga re nyake go dira gore ntwa yeo ya bona e thatafe le go feta.

¹⁰ Mokgwa wa rena wa go apara ge re le gare ga bana babo rena le dikgaetšedi, o swanetše go thuša gore phuthego e be lefelo leo le hlwekilego boitshwarong. Se se bjalo go sa šetšwe gore re dibokeng goba re dipokanong tša segwera. Re na le tokologo ya go kgetha seo re nyakago go  se apara. Go sa dutše go le bjalo, ka moka ga rena re na le boikarabelo bja go apara diaparo tšeo di dirago gore go be bonolo go ba bangwe go dula ba hlwekile monaganong, polelong le boitshwarong ka go boloka ditekanyetšo tša Modimo tše kgethwa. (1 Pet. 1:15, 16) Lerato la kgonthe “ga le dire tša go leša dihlong, ga le nyake tša go ikhola.”—1 Bakor. 13:4, 5.

11, 12. Ke’ng seo re ka naganago ka sona ge re kgetha seo re swanetšego go se apara?

¹¹ Ge bahlanka ba Modimo ba kgetha diaparo, ba dula ba nagana ka gore “se sengwe le se sengwe se na le nako ya sona le modiro o mongwe le o mongwe o na le nako ya wona.” (Mmo. 3:1, 17) Ka dinako tše dingwe boemo bja leratadima le go fetoga ga dihla go kgoma tsela yeo re aparago ka yona. Go bjalo le ka maemo a mangwe le mafelo ao re phelago go ona. Lega go le bjalo, ditekanyetšo tša Jehofa ga di fetoge le boemo bja leratadima.​—Mal. 3:6.

¹² Mafelong ao go fišago, go ka ba thata go kgonthišetša gore diaparo tša rena ke tšeo di hlomphegago le tšeo di kgethilwego gabotse. Ka baka leo, bana babo rena le dikgaetšedi ba leboga kudu ge re phema go apara diaparo tšeo di re swarago goba tše dikgolo go rena le tšeo di bontšhago tša ka gare. (Jobo 31:1) Go oketša moo, ge re ikhuditše mawatleng goba matangwaneng a go rutha, diaparo tšeo re ruthago ka tšona ga se tša swanela go solega. (Die. 11:2, 20) Gaešita le ge batho ba bantši lefaseng ba apara diaparo tša go rutha tše di bontšhago mmele wa motho, rena bao re hlankelago Jehofa re tshwenyegile ka go iša tumišo go Modimo yo re mo ratago.

13. Ke ka baka la’ng keletšo yeo e lego go 1 Bakorinthe 10:32, 33 e swanetše go tutuetša tsela yeo re kgethago diaparo tša rena?

¹³ Go na le molao o mongwe wa motheo woo o re thušago go kgetha diaparo tša maleba. Molao woo o dira gore re tshwenyege ka matswalo a batho ba bangwe​—go sa šetšwe gore ke Dihlatse goba go se bjalo. (Bala 1 Bakorinthe 10:32, 33.) Re swanetše go tšeela godimo boikarabelo bja rena bja go phema go apara diaparo tšeo di ka kgopišago ba bangwe. Paulo o ngwadile gore: “Anke yo mongwe le yo mongwe wa rena a kgahliše moagišani wa gagwe ka se se holago a be a mo age.” O okeditše ka gore: “Gobane gaešita le Kriste ga se a ka a ikgahliša.” (Baroma 15:2, 3) Ke therešo gore Jesu o be a etišitše dikgahlego tša ba bangwe pele ga tša gagwe, o be a lebelela go thuša batho e le lebaka le legolo la go dira thato ya Modimo. Ka baka leo, re tlo lahla diaparo goba mekgwa ya go apara yeo re e ratago eupša e le yeo e ka thibelago batho go kwa molaetša wa Mmušo woo re nyakago go ba botša wona.

14. Batswadi ba ka tlwaetša bjang bana ba bona go tumiša Modimo ka tsela yeo ba aparago ka yona?

¹⁴ Batswadi ba Bakriste ba na le boikarabelo bja go ruta bana ba bona go diriša melao ya motheo ya Beibele. Se se akaretša gore bona le bana ba bona ba leke ka thata go thabiša pelo ya Modimo ka mokgwa wa bona o mobotse wa go apara le go itokiša. (Die. 22:6; 27:11) Batswadi ba ka ruta bana ba bona mekgwa e mebotse ya go boifa Modimo ka go ba beela mohlala o mobotse le ka go ba nea tlhahlo e šomago le e lerato. Ruri ke mo gobotse ge batswadi ba ruta bana ba bona gore ba ka hwetša kae diaparo tše di swanelegago le kamoo ba ka di hwetšago ka gona! Se ga se bolele feela ka tšeo ba di ratago eupša le tšeo di tlo ba dirago gore ba kgone go rwala boikarabelo bja bona bja go emela Jehofa gabotse.

15. Ke’ng seo se ka re thušago ge re kgetha diaparo?

¹⁵ Lentšu la Modimo le nea tlhahlo yeo e ka re thušago go dira diphetho tšeo di tla neago Modimo  letago. Lega go le bjalo, seo re se aparago se bontšha gore re rata eng. Ga re rate diaparo tša go swana, go fo swana le ge re sa lekane ka ditšhelete. Eupša, ka mehla diaparo tša rena di swanetše go ba tša bothakga, tše di hlwekilego, tše di sa solegego, tše di swanelago boemo le tšeo di amogelegago lefelong la gabo rena.

16. Ke ka baka la’ng e le mo go swanetšego go dira maiteko a go apara ka tsela e swanelegago?

¹⁶ Ga se ka mehla go lego bonolo go dira phetho yeo e bontšhago tekatekano tabeng ya go hwetša diaparo tše di sa solegego le tše di swanelegago. Mabenkele a mantši a rekiša diaparo tše di lego fešeneng, ka gona go ka tšea nako e telele le maiteko gore o hwetše dikhethe, diroko le dipolause tše di swanelegago goba disutu le marokgo tšeo di sa re swarego kudu. Le gona, ga go pelaelo gore badumedigotee ba tla lemoga gaešita le go leboga maiteko a rena a go apara diaparo tše dibotse le tšeo di swanelegago. Ge re dira maiteko a go apara ka tsela ya maleba le e swanelegago, re a kgotsofala ka gore re nea Tatago rena yo lerato wa legodimong letago.

17. Ke mabaka afe ao a ka dirago gore ngwanabo rena a be le ditedu goba a di kote?

¹⁷ Na ke mo go swanetšego gore ngwanabo rena a be le ditedu? Molao wa Moshe o be o laela banna gore ba se ke ba kota ditedu. Lega go le bjalo, Bakriste ga ba ka tlase ga Molao wa Moshe e bile ga ba tlamege go o latela. (Lef. 19:27; 21:5; Bagal. 3:24, 25) Ditšong tše dingwe, ditedu tšeo di kotilwego gabotse di ka amogelega le go hlomphega e bile seo se ka se palediše batho gore ba kwe molaetša wa Mmušo. Ge e le gabotse, ba bangwe ba bagolo le bahlanka ba bodiredi ditšong tšeo ba na le ditedu. Lega go le bjalo, bana babo rena ba bangwe ba ka kgetha go di kota. (1 Bakor. 8:9, 13; 10:32) Ka lehlakoreng le lengwe, ditšong tše dingwe banna ga se ba tlwaela go ba le ditedu e bile go letetšwe gore Bakriste ba therešo ba se ke ba ba le tšona. Ge e le gabotse, go ba le tšona go ka šitiša ngwanabo rena gore a tagafatše Modimo ka moaparo le go itokiša le ka go hloka bosodi.​—Baroma 15:1-3; 1 Tim. 3:2, 7.

18, 19. Mika 6:8 e ka re thuša bjang ge re phegelela gore mokgwa wa rena wa go apara o kgahle Modimo?

¹⁸ Ruri re a thaba ka gobane Jehofa ga a re imetše ka lenaneo la melao ya go apara le go itokiša. Go e na le moo, o re dumelela go diriša tokologo ya rena ya boikgethelo yeo e hlahlwago ke melao ya motheo ya Mangwalo. Ka gona, gaešita le ka moaparo wa rena le go itokiša, re ka bontšha gore re nyaka ‘go ba le boipoetšo ge re sepela le Modimo wa rena.’​—Mika 6:8.

¹⁹ Ge e ba re ipoetša re tla hlahloba moaparo wa rena le go itokiša ka gobane re lemoga gore Jehofa ke yo mokgethwa. Re ithekgile ka yena ka mo go feletšego ka gobane melao ya gagwe e a re hola. Le gona, boipoetšo bo akaretša go hlompha maikwelo le dipono tša batho ba bangwe. Ka baka leo, ‘re ba le boipoetšo ge re sepela le Modimo’ ka go dumelelanya maphelo a rena le ditekanyetšo tša gagwe tše di phagamego le ka go hlompha maikwelo a batho ba bangwe.

20. Batho ba bangwe ba swanetše go phetha ka go re’ng ka baka la moaparo wa rena le go itokiša?

²⁰ Diaparo tša rena ga se tša swanela go dira gore batho ba belaele gore re barapedi ba Jehofa. Bana babo rena le dikgaetšedi go akaretša le batho ba bangwe, ba swanetše go bona gabotse gore re tloga re emela Modimo wa rena wa go loka. O na le ditekanyetšo tše di phagamego gomme re thabela go di latela. Re reta bana babo rena le dikgaetšedi bao ponagalo ya bona e gogelago batho bao ba sekametšego go lokeng gore ba theetše molaetša wo o phološago maphelo gomme ba thabiše Jehofa le go mo nea letago. Ruri go dira diphetho tše dibotse mabapi le seo re se aparago go tla tšwela pele go tagafatša ‘yo a ikapešitšego seriti le letago.”​—Ps. 104:1, 2.