Batho bao ba ilego ba bala pego ye ba ka ba ba ile ba ipotšiša potšišo ye. Eupša ditemaneng tše go bolelwa ka bo Mefiboshethe ba babedi, le gona re ka ithuta se sengwe ka go bona seo se diragetšego.

Kgoši ya Isiraele e lego Saulo o be a na le barwa ba šupa le barwedi ba babedi. Ngwana wa mathomo wa Saulo e be le Jonathane. Ka morago mosadi yo mongwe wa Saulo yo a bitšwago Ritsipa o ile a mmelegela morwa gomme ba mo reela leina la Mefiboshethe. Eupša Jonathane le yena o ile a ba le ngwana yo a bitšwago Mefiboshethe. Ka gona, Kgoši Saulo o be a na le morwa yo a bitšwago Mefiboshethe le setlogolo seo se bitšwago Mefiboshethe.

Ka nako e nngwe Kgoši Saulo o ile a nyaka go lwa le Bagibeoni bao ba bego ba dula gare ga Baisiraele le go ba fediša. O ile a bolaya ba bangwe ba bona. Go dira bjalo e be e le phošo. Ka baka la’ng? Ka gobane mehleng ya Joshua, dikgošana tša Isiraele di ile tša dira kgwerano ya khutšo le Bagibeoni.—Joshua 9:3-27.

Kgwerano yeo e be e sa šoma le mehleng ya Kgoši Saulo. Taba ya gore Kgoši e be e nyaka go fediša Bagibeoni e be e sa dumelelane le kgwerano yeo. Seo se ile sa dira gore ‘Saulo le ba ntlo ya gagwe ba be le molato wa madi.’ (2 Samuele 21:1) Mafelelong Dafida o ile a ba kgoši. Bagibeoni bao ba phologilego ba ile ba botša Dafida ka bothata bjoo. Dafida o ile a botšiša Bagibeoni gore a ka dira eng gore molato wa Saulo o lefelelwe, ke moka Jehofa a kgone go šegofatša naga. Go e na le gore Bagibeoni ba kgopele tšhelete, ba ile ba kgopela gore barwa ba šupago ba monna yo a ilego a ba ‘logela maano a go ba fediša’ ba bolawe. (Num. 35:30, 31)Dafida o ile a dumelelana le bona.—2 Sam. 21:2-6.

Saulo le morwa wa gagwe Jonathane ba ile ba hwela ntweng, eupša morwa wa Jonathane e lego Mefiboshethe o be a sa phela. O ile a golofala e sa le yo monyenyane. Go molaleng gore ga se a kgona go yo thuša rakgolo wa gagwe ge a be a yo hlasela Bagibeoni. Dafida o ile a dira kgwerano le Jonathane, yeo e bego e tlo hola bana ba bona go akaretša le Mefiboshethe. (1 Sam. 18:1; 20:42) Beibele e re: “Kgoši [Dafida] ya šokela Mefiboshethe morwa wa Jonathane morwa wa Saulo ka baka la keno yeo Dafida le Jonathane morwa wa Saulo ba ilego ba e dira ka leina la Jehofa.”—2 Sam. 21:7.

Dafida o ile a kwa seo Bagibeoni ba bego ba se kgopela. O ile a ba nea barwa ba babedi ba Saulo, yo mongwe wa bona e be e le Mefiboshethe, le ditlogolo tša Saulo tše hlano. (2 Sam. 21:8, 9) Seo Dafida a ilego a se dira se ile sa fediša molato wa madi nageng.

Tiragalo ye ga e no ba pego feela ya ka Beibeleng, e ka re ruta se sengwe. Molao wa Modimo o be o kwagala ge o re: “Bana ba se ke ba bolawa ka baka la botatago bona.” (Doit. 24:16) Ge nkabe barwa ba babedi ba Saulo le ditlogolo tša gagwe tše hlano di be di se na molato, Jehofa o be a ka se dumelele gore ba bolawe. Molao wo o tšwela pele ka gore: “Yo mongwe le yo mongwe a bolaelwe sebe sa gagwe.” Go bonagala barwa ba babedi ba Saulo le ditlogolo tša gagwe tše hlano ba hwile ka baka la ge ba ile ba thuša Saulo go hlasela Bagibeoni. Ka gona ba ile ba hwa ka baka la molato wa bona.

Pego ye e re bontšha gore motho a ka se ikemelele ka gore o dirile phošo ka ge a be a no dira seo a se laetšwego. Mongwadi yo mongwe yo bohlale wa diema o ngwadile gore: “Batalatša tsela ya lenao la gago, le gona anke ditsela tša gago ka moka di tsepame.”—Die. 4:24-27; Baef. 5:15.