Hulda o Ile a Fihlelela Pakane ya Gagwe
GE E BA o ile wa etela sehlakahlaka se senyenyane sa Sangir Besar kua Indonesia mengwaga e sa tšwago go feta, o ka ba o ile wa bona dikgaetšedi tša borena tše tharo di dutše lebopong. Ba tsebega ka go bolela ditaba tše dibotse le go thuša batho gore ba kwešiše Beibele. Eupša ka nako yeo ba be ba dira mošomo o fapanego.
Sehlakahlaka sa Sangir Besar kua leboa la Indonesia
Ba be ba tsena ka meetseng, ba hwetša maswika a magolo gomme ba a rwala ba eya le ona lebopong. Maswika a mangwe a be a ka lekana le kgwele ya maoto ka bogolo. Ka morago ba be ba dula godimo ga ditulo tšeo di dirilwego ka lepolanka gomme ba diriša hamola go kgatla maswika ao, moo a ka bego a feleletša a lekana le lee. Ke moka ge ba fetša ba be ba a lokela ka gare ga pakete, ba a rwala ba eya le ona mo ba bego ba dula gona. Ge ba feditše ba be ba lokela maswika ao ka gare ga mokotla ke moka ba ya go a laiša ka morago ga koloi ke moka a dirišetšwa go lokiša tsela.
Hulda o kgoboketša maswika lebopong
Yo mongwe wa dikgaetšedi tšeo e be e le Hulda. Maemo a gagwe a be a mo dumelela gore a fetše nako e ntšhi a dira mošomo woo go feta ba bangwe. O be a diriša tšhelete yeo a bego a e hwetša moo go hlokomela dinyakwa tša letšatši le letšatši tša lapa la gabo. Eupša ga bjale o be a nyaka go dira selo se sengwe. O be a nyaka go reka thabolete gore a kgone go tsena go JW Library®. Hulda o be a tseba gore dibidio le dilo tše dingwe tšeo di lego go JW Library® di tlo mo thuša ge a le tšhemong le go mo thuša gore a kwešiše Beibele.
Hulda o be a šoma diiri tše pedi mesong e mengwe le e mengwe, a kgatla maswika gore a lekane ka gare ga koloi e nyenyane. O ile a feleletša a hweditše tšhelete e lekanego gore a reke thabolete.
Hulda o swere thabolete ya gagwe
Hulda o re: “Le ge ke be ke lapile e bile ke ekwa bohloko ka baka la go kgatla maswika, ke ile ka lebala dilo tšeo ka moka ge ke be ke hwetša thabolete yeo e ilego ya nthuša ge ke le tšhemong le go lokišeletša diboka gabonolo.” O boletše le gore thabolete yeo e mo thušitše kudu ge leuba ka bolwetši bja Covid-19 le be le thoma ka gobane diphuthego ka moka di be di swara diboka ka bidio. Re thaba le Hulda ka ge a fihleletše pakane ya gagwe.
