NATALYA le morwa wa gagwe wa nywaga e senyane, e lego Aslan, ba ile ba kgobokana le Zarina le morwedi wa gagwe wa nywaga e lesomepedi, e lego Anzhelika. Bana ba bangwe le batho ba bagolo ba fetago 1 000 ba be ba dutše kgauswi le bona, ba hlapeditšwe ke banna bao ba swerego dithunya.

Pejana Laboraro lona leo ka September 1, 2004, bana le batswadi ba bona ba be ba le ka ntle, ba itokišeletša go keteka letšatši la mathomo la sekolo kua Beslan, e lego toropo e nyenyane ya Alania, Russia. Gateetee, banna bao ba swerego dithunya le dipomo ba ile ba fihla go sa letelwa, ba thuntšhetša godimo gomme ba hlabile mašata. Bahlasedi bao ba fetago 30 ba ile ba tsenya lešaba leo le bego le tšhogile ka gare ga phapoši ya go itšhidulla ya sekolo gomme ba kgomaretša dipomo go e dikologa.

Ke moka go ile gwa ba le matšatši a mararo ao go bego go sa direge selo magareng ga bahlasedi le mašole a tšhireletšo. Natalya yo a bego a ithuta Beibele le Dihlatse tša Jehofa o re: “Ke ile ka rapela ke sa kgaotše.”

E be e le mafelelong a selemo, gomme phapoši ya go itšhidulla e ile ya thoma go fiša. Mesong ya letšatši la bobedi, bahlasedi ba ile ba se fe batho dijo le meetse gomme ka letšatši la boraro, e lego Labohlano, bahlaselwa ba bangwe ba ile ba thoma go nwa moroto le go ja matšoba ao bana ba bego ba a tlišeditše barutiši. Natalya o re: “Mošemane yo a bego a dutše kgauswi le rena o ile a bea letlakala la letšoba letsogong la ka. Ke ile ka le ngwathaganya gomme ka fa Anzhelika karolo e nngwe gomme e nngwe ka e fa Aslan.”

Ka moragonyana letšatšing la boraro, go ile gwa thoma masetlapelo. Natalya o re: “Ke ile ka wela fase ka baka la go thuthupa ga dipomo. Go ile gwa tlala muši gohle gomme gwa thoma go lla sethunya.” Ge mašole le batšhošetši ba dutše ba thuntšhana, Natalya le Aslan ba ile ba tšhaba ka go khukhuna. Moossetia  wa lefelong leo yo a bitšwago Alan o ile a ba gogela lefelong le le šireletšegilego. Ba bangwe ba bantši ga se ba phologa.

Bana le batho ba bagolo ba makgolo ba ile ba hwa, go akaretša le Anzhelika. Ka dibeke tše mmalwa, go be go kwala dillo le go golola ga batho kua Beslan. Lefelo leo Natalya a dulago go lona le lebane le sekolo, gomme le ka morago ga gore go agwe sekolo se sefsa kgauswi le moo, Aslan o be a palelwa ke go tsena go sona. O be a sa tšwele le ka ntle go yo bapala. Natalya o re: “Re ile ra lopa Jehofa gore a mo thuše go fenya dipoifo tša gagwe.” Ge nako e dutše e eya, o ile a ba le sebete sa go boela sekolong.

Natalya o be a tšhaba go ya dibokeng tša Bokriste Holong ya Mmušo. O anega ka gore: “Ka mehla ge ke na le batho ba bantši lefelong leo le tswaleletšwego, ke be ke tšhoga gore re ka hlaselwa. Ke be ke rapela gore seo se se direge. Ka morago, ke ile ka kgaotša go ya dibokeng. Le gona ke be ke dula ke tshwenywa ke taba ya gore batho ba bantši ba hlokofetše, mola rena re phologile.”

Natalya o re: “Ke leboga bao ka phuthegong ba ilego ba tšwela pele go nthuša. Hlatse yeo e bitšwago Tatyana o be a nketela ka morago ga matšatši a mangwe le a mangwe a mararo a sa tshediše. Ka morago o ile a tla le Hlatse e nngwe e lego Ulyana, yoo a bego a le botho, a na le temogo, a bolela ka boleta e bile a tseba Beibele gabotse. O ile a ntheta ka baka la maiteko ao ke bego ke a dira, gomme o be a ntheetša ka kelohloko ge ke bolela.

“Ulyana o ile a mpalela mantšu a moapostola wa Mokriste e lego Paulo, ao a begilwego go 2 Bakorinthe 1:9. Ka morago ga mathata ao ba bilego le ona Asia, Paulo o ile a re: ‘Re ile ra ikwa re kgodišegile gore re ahloletšwe lehu.’ Le gona o ile a mpalela Jesaya 40:31 yeo e rego: ‘Bao ba botago Jehofa ba tla boelwa ke matla. Ba tla hlatlogela godimo ka diphego go etša dintšhu.’ Mangwalo a bjalo, gotee le thekgo ya ka mehla ya Ulyana le ba bangwe, di ile tša mmatlafatša gore ke thomološe go ya dibokeng tša Bokriste le bana ba ka. Lega go le bjalo, go ba ka gare ga holo go sa mpoifiša.”

Zarina ka morago o ile a ba yo mongwe wa Dihlatse tša Jehofa gomme o fagahletše go bona Anzhelika gape ge a tsošetšwa bophelong lefaseng le lebotse, le le hlwekilego le la khutšo, leo le tlago go bušwa ke Mmušo wa Modimo. (Mateo 6:9, 10; Ditiro 24:15) Natalya le bana ba gagwe ba ile ba kolobetšwa ka 2009. Ba sa dula kgauswi le lešope la phapoši ya go itšhidulla ya sekolo eupša ba tšwela pele le bophelo. Natalya o re: “Ga bjale ke kgona go bolela ka letšatši leo ntle le go kwa bohloko goba go boifa. Modimo o re thuša go tšwela pele ka bophelo.”