E le gore o itlhahlobe, nagana ka maemo a a boikgopolelo.

Ke mang yo o naganago gore o atlegile e le ka kgonthe?

• ALEX

  Alex o na le kgwebo. O a botega, o šoma ka thata e bile o na le mekgwa e mebotse. Kgwebo ya Alex e dira tšhelete gomme ka baka la seo yena le lapa la gagwe ba phela bophelo bja manobonobo.

• CAL

  Cal o na le kgwebo e swanago, gomme o dira tšheletše e ntši go feta Alex. Lega go le bjalo, ka ge a nyaka go thopa sefoka go tša kgwebo, o ipolaiša mošomo e bile o na le malwetši a mantši.

• JANET

  Janet ke morutwana wa sekolong sa magareng yo a nago le bokgoni e bile o rata go ithuta. Ka baka leo, o hwetša dimaraka tše dibotse.

• ELLEN

  Ellen o hwetša dimaraka tšeo di fetago tša Janet e bile ke morutwana yo a thopilego sefoka sa dimaraka tše dibotse—eupša o a kopiša ditlhahlobong gomme ga a kgahlegele dithuto tša gagwe gakaalo.

Ge e ba o itše Cal le Ellen—goba batho ba ka moka ba bane—ba atlegile, o ka ba o ela katlego ka dipoelo feela, go sa šetšwe gore di hweditšwe ka ditsela dife.

Ka lehlakoreng le lengwe, ge e ba o kgethile Alex le Janet feela, go ka direga gore o ela katlego ka dika tša motho le mokgwa woo a šomago ka wona. Go a kwagala ge o dira bjalo. Ela hloko mehlala e latelago.

• O nagana gore ke’ng seo se ka holago Janet nakong e tlago—gore a hwetše dimaraka tša godimo goba a hlagolele lerato la go ithuta?

• O nagana gore se bohlokwa ke’ng baneng ba Alex—gore ba be le dilo ka moka tšeo di rekwago ka tšhelete goba ba be le tate yoo a bontšhago gore o rata go fetša nako a na le bona?

Therešo e sa fetogego: Katlego yeo e sego ya kgonthe e theilwe dilong tšeo di bonwago ka mahlo; mola katlego ya kgonthe yona e theilwe ditekanyetšong tše di nepagetšego.