Beibele e bolela gore bophelo bo ‘tletše ka pherekano [goba mathata].’ (Jobo 14:1) Motho yo mongwe le yo mongwe lehono o welwa ke dikotsi tša mehutahuta. Eupša batho ba bangwe ga ba sa na kholofelo ka bophelo, tše nkego dilo di ka se tsoge di lokile, goba ga go na tebelelo ya bokamoso bjo bokaone. Na le wena o ikwa ka tsela yeo? Ge e ba go le bjalo, kgonthišega gore Beibele e nea kholofelo ya kgonthe—go batho ka moka, e sego go wena feela. Ka mohlala:

• Beibele e ruta gore Jehofa Modimo o re reretše selo se sekaonekaone.—Genesi 1:28.

• Jehofa Modimo o re holofetša gore o tla dira lefase la rena paradeise.—Jesaya 65:21-25.

• Go phethagala ga kholofetšo yeo go kgonthišeditšwe. Kutollo 21:3, 4 e re:

  “Tente ya Modimo e bathong, o tla dula le bona gomme e tla ba batho ba gagwe. Modimo ka noši o tla ba le bona. O tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.”

Kholofelo yeo ga e fo ba ya boikgopolelo. Jehofa Modimo o rera go phethagatša kholofetšo yeo, e bile o na le matla le kganyogo ya go dira bjalo. Kholofelo yeo Beibele e e neago e ka botwa, gomme e araba ka mo go kwagalago potšišo e rego, “Ke Phelela Eng?”

GOPOLA SE: Gaešita le ge maikwelo a gago a ka ya godimo le fase go swana le sekepe seo se akgaakgwago ke maphoto a matla a lewatle, molaetša wa Beibele wa kholofelo o swana le tshetledi yeo e go thušago go ema o tiile.

SEO O KA SE DIRAGO LEHONO: Thoma go hlahloba seo Beibele e se rutago ka kholofelo ya kgonthe ya bokamoso. Dihlatse tša Jehofa di tla thabela go go thuša. O ka ikopanya le tšona lefelong la geno goba wa ikhweletša tsebišo e bohlokwa Wepesaeteng ya tšona ya jw.org/nso. *