Sehlopha sa borathutamahlale se dumela gore mediro ya batho e ka ba e bakile tšhišinyego ya lefase ya 2011 kua Lorca, ka borwa bja Sepania, yeo e bolailego batho ba senyane gomme ya gobatša ba bantši. Borathutafase ba lemogile gore tšhišinyego yeo e kotsi e bakilwe ke go ntšhwa ga meetse a mantši a ka tlase ga lefase ao a bego a dirišetšwa go nošetša.

Ka 2012 baeti ba tšwago China ba šomišitše dibilione tše 918 tša diranta ba etela dinaga tše dingwe. Go ya ka Mokgatlo wa Baeti wa Lefase wa UN, China e bile maemong a pele gare ga dinaga tšeo di dirišitšego tšhelete e ntši go etela dinaga tše dingwe, e lego seo se bolelago gore e fetile Jeremane le United States. Bao ba etelago dinageng tše dingwe go tšwa Jeremane le United States ba dirišitše dibilione tše 756 tša diranta.

Nyakišišo e nngwe yeo e begilwego makasineng wa Brithania wa tša kalafo wo o bitšwago BMJ, e ile ya hlahloba bophelo bja batho ba 68 000 kua Japane ka nywaga e ka bago e 23. Banyakišiši ba hweditše gore basadi bao ba belegwego magareng ga 1920 le 1945 bao ba thomilego go kgoga ba na le nywaga e 20, bophelo bja bona bo ile bja fokotšega ka nywaga e lesome ge ba bapetšwa le bao ba sa kgogego; bophelo bja banna bo ile bja fokotšega ka nywaga e seswai.

Go reka mekotlana ya dipolasitiki, go e dira le go e šomiša go thibetšwe ka ge go šireletšwa diphedi tša ka meetseng le diphoofolo tša naga, tšeo di ka bolawago ke go ja mekotlana ya dipolasitiki. Go e na le moo mmušo o kgothaletša gore go dirišwe mehuta e mengwe ya mekotlana.

Mekgatlo ya diinšorense e lefelela mo e ka bago dibilione tše 450 tša diranta ka baka la dikotsi tša boemo bja leratadima. Ditshenyagalelo tše bjalo di hlatlogile go feta gabedi nywageng e mengwe le mengwe e lesome ga e sa le go tloga ka bo-1980.