Ka 2011 kua Italy, thekišo ya dipaesekela e ile ya feta thekišo ya dikoloi. Gare ga mabaka ao a neilwego ao a ka bago a bakile seo ke mathata a tša boiphedišo, theko ya makhura a dinamelwa le ditshenyagalelo tša go hlokomela dikoloi. Ka lehlakoreng le lengwe, go hlokomela dipaesekela ga go bitše kudu ge go bapišwa le dikoloi, go bonolo go di diriša e bile di a hola.

Kgoro ya Yuropa ya Ditshwanelo tša Batho (European Court of Human Rights [ECHR]) e ahlotše ka gore mmušo wa Armenia o gataketše ditshwanelo tša masogana a 17, ao ka moka e lego Dihlatse tša Jehofa, ao a ilego a golegwa ka morago ga go gana go dira tirelo e itšego yeo e sego ya bohlabani a hlokometšwe ke balaodi ba tša bohlabani. Mmušo o ile wa swanelwa ke go lefa ditshenyagalelo le ditefišo tša molao go bao ba 17.

Go bana bao ba ilego ba hlaselwa ke ditiro tša bosenyi tšeo go tšona Diwepesaete tša go dira bagwera ka Inthanete di kgathilego tema, 63 lekgolong ya bona e be e se ya ka ya lemošwa ke batswadi ka dikotsi tšeo di ka bago gona mekerong yeo. Go melato e 599 yeo e hlahlobilwego, 74 lekgolong ya bao go thwego ke disenyi ba dumetše gore morero wa bona wa go diriša Diwepesaete tše e be e le go ba le thobalano le bana bao.

E le ge e leka go kaonefatša pitlagano ya dinamelwa, metse e megolo e lekanyetša palo ya dikoloi tše difsa tšeo di ngwadišwago. Ka mohlala, Beijing e ka se ngwadiše dikoloi tše ka godimo ga tše 240 000 ka ngwaga. Ka August 2012, batho ba e ka bago ba 1 050 000 ba ile ba tsenela matengwa ao a bego a ntšha mangwalo a 19 926 a bohlatse bja gore motho o ngwadišitše, e lego seo se bolelago gore go atlegile motho o 1 feela go ba 53 bao ba dirilego dikgopelo.