KE BELEGWE ka 1965 lapeng le diilago kua Ireland Leboa. Ke goletše Seleteng sa Derry mehleng ya “Mathata,” e lego ntwa ya mahlomahwibidu magareng ga Makatholika le Maprotestanta yeo e tšerego nywaga e fetago e 30. Makatholika a sego kae a be a ikwa a kgethollwa ke kereke ya Maprotestanta a mantši, a ba phara ka molato wa go sega mellwane ka tsela ya go hlalefetša, go buša ka go gatelela le go ntšha batho mešomong gotee le mekgwa e sa lokago ya go aba dintlo.

Ke be ke bona go se loke le go se lekane gohle moo ke bego ke lebelela gona. Ga ke sa gopola gore ke bethilwe gakae, ke gogetšwe ka ntle ga koloi ke šupilwe ka sethunya, goba ke botšološišwa le go phuruphutšwa ke maphodisa goba mašole. Ke be ke ikwa ke hlasetšwe gomme ka re: ‘Dikgetho ke tše pedi, nka amogela go tlaišwa ka tsela ye goba ka itwela!’

Ke ile ka tšea karolo megwantong ya 1972 yeo e bitšwago ya Bloody Sunday, ge go be go gopolwa batho ba 14 bao ba ilego ba bolawa ka go thuntšhwa ke mašole a Brithania, le megwantong ya go ngala dijo, yeo e bego e le ya go hlompha bagolegwa ba repabliki bao ka 1981 ba ilego ba ipolaiša tlala go fihlela ba ehwa. Ke be ke emiša difolaga tše di thibetšwego gomme gohle moo ke bego ke kgona ke ngwala mengwalo goba go thala diswantšho mabotong  tša go lwantšha Mabrithania. Go be go bonagala go dula go na le tiro e sehlogo goba polao yeo e bego e dira gore Makatholika a ipelaetše. Seo se bego se thoma e le mogwanto goba boipelaetšo gantši se be se feleletša e le ntwa ya mahlomahwibidu.

Ge ke sa le yunibesithing, ke ile ka tsenela ditiro tša boipelaetšo tša barutwana bakeng sa tikologo. Ka morago ke ile ka hudugela London, gomme moo ke ile ka tšea karolo megwantong ya balatedi ba bosošalise kgahlanong le ditshepedišo tša mmušo tšeo di bego di bonagala di hola ba maemo a godimo mola badiidi ba hlaka. Ke ile ka tšea karolo megwantong ya mekgatlo ya bašomi kgahlanong le go fokoletšwa megolo, ka ba ka kgatha tema mogwantong wo o lego kgahlanong le lekgetho la go ntšhwa ke motho yo mongwe le yo mongwe ka 1990, woo o ilego wa feleletša ka gore baipelaetši ba senye Trafalgar Square o šoro.

Lega go le bjalo, ke ile ka feleletša ke nyamile. Go e na le gore re fihlelele dipakane tša rena, gantši ditiro tša boipelaetšo di be di kgohletša mollo wa lehloyo.

E bile mo e ka bago ka yona nako yeo moo mogwera wa ka a ilego a ntsebiša Dihlatse tša Jehofa. Di ile tša nthuta go tšwa ka Beibeleng gore Modimo o tshwenyega ka go tlaišega ga rena le gore o tla tloša tshenyo ka moka yeo e bakilwego ke batho. (Jesaya 65:17; Kutollo 21:3, 4) Le ge batho ba ka ba ba na le maikemišetšo a mabotse, ba ka se kgone go dira gore go be le toka le tekatekano. Re nyaka tlhahlo ya Modimo le matla a gagwe gore re fenye dibaki tše di sa bonagalego tša mathata a lefase.—Jeremia 10:23; Baefeso 6:12.

Ga bjale ke ikwa eka go ipelaetša ga ka kgahlanong le go hloka toka go be go swana le go alamela mae a go bola. Ke ile ka imologa kudu ge ke be ke ithuta gore go tla nako yeo ka yona go ka se bego le go hloka toka polaneteng ye, ge ruri batho ka moka ba tla be ba lekana.