Molao wa lapa ke gore megalathekeng e swanetše go tingwa ka iri ya senyane bošego, eupša gabedi mo bekeng ye o tantše morwedi wa gago a romela melaetša bošegogare. Morwa wa gago o swanetše go boa gae ka iri ya lesome bošego, eupša maabane o boile bošego gape ka morago ga iri ya bo-11.

Ngwana wa gago yo a lego mahlalagading a ka dira bokaone. Eupša sa pele o swanetše go tseba gore ke ka baka la’ng ngwana wa gago a bonagala eka o nyatša melao ya gago. Ke eng seo se ka go makatšago? Selo seo se bonalago e le go nyatša melao ya gago ka go lebanya e ka ba e le sa go se tshwenye.

Mellwane e sa kwagalego. Bafsa ba bangwe ba hlokomologa melao e le ge ba nyaka go bona gore go tla direga eng. Ka mohlala, ge e ba motswadi a re ge go ka tshelwa molao o itšego go tla ba le ditlamorago tše itšego, ngwana a ka tshela mellwane e le ge a leka go bona ge e ba motswadi a tla dira seo a se boletšego. Na bafsa bao ba fetoga marabele ao a feteletšego? Ga se gore go bjalo. Ntlha ke gore, bafsa ba ka no se latele melao ge e ba batswadi ba se ba ema ba tiile ka seo ba bego ba itše ba tla se dira goba ge e ba mellwane e sa hlaloswa ka tsela e kwagalago.

Go se kobakobege. Batswadi ba bangwe ba leka go laola bana ba bona bao ba lego mahlalagading ka go ba beela melao ya go se fele. Ge bafsa ba tshela melao, batswadi ba a galefa gomme ba bea melao e mentši le go feta. Lega go le bjalo, gantši seo se gakatša boemo. Puku ya Parent/Teen Breakthrough e hlalosa gore: “Ge o dutše o leka go laola ngwana wa gago yo a lego mahlalagading, ke moo a tlago go tšwela pele a ngangabala,” gomme e oketša ka gore: “Mokgwa wa go leka go mo laola o ba bjalo ka go leka go tlotša potoro e tonyago borothong bjo boleta: e fo ngwathaganya borotho bjoo, gomme go e tlotša ka matla ga se tharollo.”

Tayo e swanetšego e ka thuša. Go fapana le “kotlo”—yeo e bolelago go kweša motho yo mongwe bohloko—“tayo” ge e le gabotse e bolela go ruta. Ka gona o ka ruta bjang ngwana wa gago yo a lego mahlalagading go dumelelana le melao ya gago?

Bea taba ka tsela e kwagalago. Bafsa ba swanetše go tseba gabotse seo se letetšwego go bona le gore tayo ya go se kwe e tla ba efe.—Molao wa motheo wa Beibele: Bagalatia 6:7.

Tšhišinyo: Ngwala tatelano ya melao ya lapa la gago. Ke moka o ipotšiše gore: ‘Na ke beile e mentši kudu? Na ke beile e sego kae kudu? Na e mengwe ga e sa nyakega? Na ke swanetše go dira diphetogo tšeo di sepedišanago le boikarabelo bjoo ngwanaka yo a lego mahlalagading a bo bontšhitšego?’

Dira dilo ka tsela e swanago. Bafsa ba ka ikwa ba tlaletšwe ge e ba ba ile ba fegwa mogwapa bekeng e fetilego eupša ba hwetša kotlo bekeng e latelago ka go dira phošo e swanago.—Molao wa motheo wa Beibele: Mateo 5:37.

Tšhišinyo: Leka go nea tayo e sepedišanago le “bosenyi” bjoo. Ka mohlala, ge e ba ngwana wa gago yo a lego mahlalagading a boa gae ka morago ga nako e beilwego, go mmeela nako ya go boa gae kapejana e tla ba ditlamorago tša seo.

Eba le tekatekano. Eba motswadi yo a fetofetogago le maemo ka go nea ngwana wa gago yo a lego mahlalagading tokologo e mo swanetšego.—Molao wa motheo wa Beibele: Bafilipi 4:5.

Tšhišinyo: Dula fase gomme o boledišane le ngwana wa gago yo a lego mahlalagading ka melao e ka bewago. O ka ba wa re e be yena a bolelago gore ditlamorago e ka ba dife bakeng sa go tshela melao e itšego. Ga se gantši bafsa ba ka tshelago melao yeo ba tsentšego letsogo ge e bewa.

Aga semelo sa ngwana wa gago. Pakane ya gago ga se feela gore ngwana wa gago yo a lego mahlalagading a kwe melao eupša ke go mo thuša gore a be le letswalo le lebotse—e lego go tseba se se nepagetšego le seo se fošagetšego. (Bona lepokisi leo le rego “Aga Dika tše Dibotse Ngwaneng wa Gago.”)—Molao wa motheo wa Beibele: 1 Petro 3:16.

Tšhišinyo: Nyaka thušo ya Beibele. Ke mothopo o kaonekaone wa “tayo yeo e neago temogo,” gomme bohlale bja yona bo ka “[nea] yo a se nago temogo bohlale gomme [bja nea] mofsa tsebo le tlhaologanyo.”—Diema 1:1-4.