Dikanegelo tša Malapa a Lenyalo la Bobedi ao a Ilego a Atlega

GA RE SA FO BA BATHO BAO BA DULAGO MMOGO

Morwedi wa Philip wa nywaga e 20 e lego Elise, o be a dula ka gae gomme a šetše a dira mešongwana e mentši ya ka gae. Ka morago ga gore Philip a nyale Louise, na go be go ka kgonega gore mma yo le morwedi yo bao ba sa tswalanego ka madi ba kwane?

Louise: Go be go le thata kudu mathomong. Ke rata go dula ka gae e bile ke be ke nyaka go bontšha gore ke kgona go ba mosadi wa lapa.

Elise: Louise o ile a fetoša dilo ka ntlong gomme a lahla dilo tše dintši tšeo re bego re na le tšona. Nkile ka re ke hlwekiša ka bea dilo lefelong le le fošagetšego ka ge ke be ke se sa tseba gore di dula kae. Se se ile sa galefiša Louise, nna le yena re ile ra botšana tše re di jelego ka mohla wa tlala gomme ra fetša beke re sa boledišane.

Louise: Nkile ka re go Elise: “Ga ke tsebe gore nna le wena re tlo feleletša kae, eupša tša mohuta wo nka se di kgone.” O ile a tla go nna mantšiboeng ao a kgopela tshwarelo. Ke ile ka mo gokarela gomme ra lla.

Elise: Louise o ile a tlogela tše dingwe tša dinepe tša ka lebotong mola Tate le yena a sa ka a tloša mabone ao ke a beilego ka phapošing ya bodulo. O ka e nyatša eupša go tlogela dilo tšeo go ile gwa nthuša go bona gore legae le e sa le la gešo. E bile ke leboga kamoo Louise a hlokomelago moratho wa ka ge a tlile ka mo gae. Go šetše go fetile nywaga e mebedi gomme ke thoma go bona Louise e le setho sa kgonthe sa lapa lešo.

Louise: Ke kwa eka nna le Elise ga re sa fo ba batho bao ba dulago mmogo, re bagwera ba paale.

 “SA BOHLOKWA KUDU KE BOTEE”

Ge Anton le Marelize ba be ba nyalana nywageng e tshelelago e fetilego, yo mongwe le yo mongwe wa bona o ile a tla le bana ba bararo.

Anton: Re dira dilo tše bjalo ka go tšea maeto re le lapa gomme re fetša nako re na le ngwana yo mongwe le yo mongwe a nnoši. Go re tšere nywaga e mmalwa gore re be ngatana eupša bontši bja mathata a rena a lapa a šetše a rarolotšwe.

Marelize: Re nagana gore go bohlokwa go lebelela bana ba e le ba “rena,” e sego “ba ka le ba gago.” Ke sa gopola ke nyaka go tsoša mmudubudu ge ke be ke nagana gore Anton ga se a swara morwa wa ka gabotse ge a be a re morwedi wa gagwe a dule setulong sa ka pele sa koloi. Ke ile ka lemoga gore sa bohlokwa kudu ke botee bja lapa e sego setulo sa ka pele. Re leka go ba le tekatekano le ge re ka se nape re kgona go swara yo mongwe le yo mongwe ka go lekana.

Ke phema go bolela ka dinako tše di thabišago tše re bilego le tšona lapeng lela la pele, ka ge bao ba bego ba se moo ba ka nagana gore re rata lapa leo kudu go feta la bjale. Eupša ke bontšha gore ke thabela lapa leo re lego go lona ga bjale.

“RE THOMA KA GO RETANA”

Francis o nyetše Cecelia nywageng e mene e fetilego. Lapa la bona le akaretša bana ba bararo ba mma yo le morwa yo a lego mahlalagading wa tate yo.

Francis: Ke leka go batamelega le go phema go galefa gabonolo. Re dula re eja re le mmogo gomme re diriša nako ye re boledišana re le lapa. E bile ke kgothaletša bohle go phetha mešongwana ya ka gae ka ge se se thuša lapa ka moka.

Cecelia: Ke fetša nako le ngwana yo mongwe le yo mongwe wa rena gomme ka theetša dilo tšeo di mo tshwenyago. Ge re kopane re le lapa, re thoma ka go retana ke moka ra kgothaletša gore go kaonefatšwe karolong e itšego. Ke moka ge ke dira diphošo, ke a di dumela gomme ka kgopela tshwarelo go tšwa pelong.

 KE GODIŠITŠWE KE BATSWADI BA E SEGO BA MADI

Yuki wa nywaga e 20, o be a na le nywaga e mehlano ge a bona tatagwe la mafelelo. Ka morago mmagwe o ile a nyalwa ke Tomonori, eupša mmagwe a hlokofala ge Yuki a be a na le nywaga e lesome. Ka morago ga nywaga e mehlano, tatagwe yo e sego wa madi o ile a nyala Mihoko gomme Yuki a ikhwetša a phela le batswadi bao e sego ba madi.

Yuki: Ge tate yo e sego wa madi a be a dira phetho ya go nyala, ka kgopolong ke ile ka re: “Ga ke nyake mma yo mongwe. Diphetogo tše ke bilego le tšona bophelong di lekane.” Ke ile ka gana go mo amogela gomme ka mmethiša ka moya.

Mihoko: Le ge monna wa ka a sa ka a nkgapeletša gore ke rate morwa wa gagwe go swana le yena, ke ile ka ikemišetša go leka go ikagela segwera le Yuki. Re ile ra katanela go dira dilo ka tsela yeo a di tlwaetšego ka yona, go akaretša le tša moya, boithabišo le go ja mmogo mantšiboeng a mangwe le a mangwe gomme ka morago ga moo ra boledišana. Ke ile ka mo kwešiša gakaone kudu ka morago ga gore a mpotše kamoo mmagwe a hlokofetšego ka gona.

Ge ke be ke ima, re be re tshwenyegile ka Yuki e bile re nyaka gore a se boife gore re tla mo hlokomologa ka lapeng. Re ile ra kgopela Yuki gore a ješe ngwana le go mo hlapiša le go fetoša mengato gomme re be re reta Yuki pele ga ba bangwe ka baka la thušo ya gagwe. Itsuki yo monyenyane o ile a rata Yuki kudu. O ile a kgona go bitša lentšu niinii—buti—le pele a ka kgona go bitša “papa” goba “mama.”

Yuki: Ke ga tlhago go lewa ke bodutu ge o le ngwana yo e sego wa madi. Le ge o leka go hlalosetša ba bangwe, ba bonagala ba sa go kwešiše. Eupša ke thabela gore Bakristegotee le nna ba nthekgile e le ruri. Ga ke sa na bothata ka mma wa ka yo mofsa. O mpha dikeletšo tše dibotse e bile ke kgona go mo ntšhetša sa mafahleng.

[Ntlhakgolo go letlakala 9]

O se ke wa fela pelo! Malapa a lenyalo la bobedi a ka thaba le go atlega