Matlafatša Boikemišetšo bja Gago

“Boikemišetšo bjo bo tseneletšego bja go gata megato ya go kgaotša ke seka se bohlokwa kudu sa bakgogi bao ba atlegago go kgaotša go kgoga.”—“Stop Smoking Now!”

GE E bewa ka go lebanya, ge e ba o nyaka go kgaotša go kgoga, bonyenyane, o swanetše go ba le boikemišetšo bjo matla bja go dira bjalo. O ka matlafatša boikemišetšo bja gago bjang? Lebaka le lengwe ke gore o ele hloko gore o tla ba kaone gakaaka’ng ge e ba o kgaotša go kgoga.

O tla boloka tšhelete. Lepokisana ka letšatši le ka bitša diranta tše dikete tše masome ka ngwaga. “Ke be ke sa lemoge gore ke be ke senya tšhelete e kaaka’ng ka motšoko.”—Gyanu, Nepal.

O swanetše go hwetša lethabo le le oketšegilego bophelong. “Bophelo bja-ka bo thomile ge ke be ke kgaotša go kgoga, gomme bo kaonefala letšatši le letšatši.” (Regina, Afrika Borwa) Ge batho ba kgaotša go kgoga, dihlaa tša bona le matla a bona a go dupa di kaonefala kudu, le gona gantši ba ba le matla a oketšegilego le ponagalo e kaone.

Boemo bja gago bja tša maphelo bo ka kaonefala. “Go kgaotša go kgoga go na le mehola e megolo le ya kapejana ya tša maphelo go banna le basadi ba nywaga ka moka.”—The U.S. Centers for Disease Control and Prevention.

O tla godiša boikholofelo bja gago. “Ke kgaoditše go kgoga ka gobane ke sa nyake go bušwa ke motšoko. Ke be ke nyaka gore mmele wa-ka o bušwe ke nna.”—Henning, Denmark.

Ba lapa la gago le bagwera ba tla holega. “Go kgoga . . . go gobatša boemo bja tša maphelo bja bao ba go dikologilego. . . . Dinyakišišo di bontšha gore muši wa motšoko wo o tšwago mothong yo mongwe o bolaya batho ba dikete ngwaga o mongwe le mongwe ka kankere ya maswafo le bolwetši bja pelo.”—American Cancer Society.

O tla kgahla Mmopi wa gago. “Baratiwa, a re itlhwekišeng ditšhila tšohle tša nama le tša moya.” (2 Bakorinthe 7:1) “Le neele mebele ya lena e le sehlabelo se . . . se sekgethwa, se se amogelegago go Modimo.”—Baroma 12:1.

“Ge ke be ke kwešiša gore Modimo ga a amogele dilo tšeo di šilafatšago mmele, ke ile ka dira phetho ya go kgaotša go kgoga.”—Sylvia, Sepania.

Lega go le bjalo, gantši go ba le boikemišetšo feela ga se gwa lekana. Re ka swanelwa ke go nyaka thušo ya ba bangwe, go akaretša ba lapa le bagwera. Ke’ng seo ba ka se dirago?