Pono ya Beibele

Go Dula o Botega Lenyalong​—Ge e le Gabotse go Bolela’ng?

Batho ba bantši ba letetše gore balekane ba lenyalo ba botegelane ditabeng tša tša botona le botshadi. Pono ye ya go botegelana lenyalong e dumelelana le seo Beibele e se bolelago ge e re: “Lenyalo a le hlomphege go bohle, gomme malao a lenyalo a se be le ditšhila.”—Baheberu 13:4.

NA GO botegelana lenyalong go bolelwa feela ke go phema go ba le kopano ya botona le botshadi le balekane ba bangwe? Go thwe’ng ka dikakanyo tša dikopano tša botona le botshadi le motho yo mongwe yo e sego molekane wa gago wa lenyalo? Na go gwerana kudu le motho yo mongwe wa bong bjo bo fapanego e ka ba tsela ya “go se botegelane”?

Na Dikakanyo tša Dikopano tša Botona le Botshadi di Kotsi?

Beibele e bontšha gore dikopano tša botona le botshadi ke tša tlhago e bile ke karolo e botse ya bophelo bja lenyalo, mothopo wa lethabo le kgotsofalo. (Diema 5:18, 19) Eupša ditsebi tše dintši tša mehleng yeno di dumela gore ke mo go tlwaelegilego—e bile ke mo gobotse—gore motho yo a lego lenyalong a akanye a e-ba le dikopano tša botona le botshadi le balekane ba bangwe. Na dikakanyo tše bjalo ga di kotsi ge feela motho a sa di phethagatše?

Dikakanyo tša dikopano tša botona le botshadi ge e le gabotse di lebiša tlhokomelo go ikgotsofatšeng. Boitshwaro bjo bjalo bja boithati ga bo dumelelane le keletšo ya Beibele bakeng sa batho ba lego lenyalong. Lentšu la Modimo le bolela mabapi le dikopano tša botona le botshadi gore: “Mosadi ga a laole mmele wa gagwe, eupša ke monna wa gagwe yo a o laolago; ka mo go swanago monna ga a laole mmele wa gagwe, eupša ke mosadi wa gagwe yo a o laolago.” (1 Bakorinthe 7:4) Go latela keletšo ya Beibele go thibela kopano ya botona le botshadi go ba tiro e dirwago ka kganyogo e feteletšego le boithati tšeo di gakatšwago ke go akanya kudu ka yona. Ka go rialo, banyalani ka bobedi ba tla ba le lethabo le legolo.—Ditiro 20:35; Bafilipi 2:4.

Go akanya ka dikopano tša botona le botshadi tša ka ntle ga lenyalo go akaretša go boeletša ka monaganong ditiro tšeo di ka tlišago bohloko bjo bogolo maikwelong a molekane wa gago ge e ba di ka dirwa. Na go akanya ka dikopano tša botona le botshadi go ka godiša kgonagalo ya gore motho a dire bohlotlolo? Karabo e bonolo ya potšišo ye ke ee. Beibele e bontšha kgokagano magareng ga dikgopolo le ditiro ka gore: “Yo mongwe le yo mongwe o lekwa ka go gogwa le go goketšwa ke kganyogo ya gagwe. Ke moka kganyogo ge e emere e tswala sebe; sebe le sona ge se dirilwe, se tšweletša lehu.”—Jakobo 1:14, 15.

Jesu o itše: “Yo mongwe le yo mongwe yo a tšwelago pele a lebeletše mosadi e le gore a mo kganyoge o šetše a hlotlotše le yena pelong ya gagwe.” (Mateo 5:28) Ka go gana go dula o akanya ka bohlotlolo, o “diša pelo y’axo” e bile o šireletša lenyalo la gago.—Diema 4:23.

Ke ka Baka La’ng o Swanetše go Dula o Botega Maikwelong?

Lenyalo le le atlegilego le nyaka gore o ‘ineele ka mo go feletšego’ go molekane wa gago. (Sefela sa Difela 8:6, NW; Diema 5:15-18) Se se bolela’ng? Gaešita  le ge go ba le bagwera ba bong bjo bo swanago le bjo bo sa swanego ka ntle ga lenyalo e le ga tlhago, molekane wa gago o na le tshwanelo ya go ba wa pele ge go tliwa nakong ya gago, tlhokomelong le maikwelong. Tswalano le ge e le efe yeo e amogago molekane wa gago seo se mo swanetšego gomme ya se nea motho yo mongwe ke sebopego se sengwe sa “go se botege,” gaešita le ge dikopano tša botona le botshadi di sa akaretšwe. *

Tswalano e bjalo e ka thoma bjang? Motho yo mongwe wa bong bjo bo fapanego a ka bonagala a kgahliša goba a e-na le kwelobohloko go feta molekane wa gago. Go fetša nako e ntši le motho yoo mošomong wa boiphedišo goba go gwerana le yena go ka feleletša ka go boledišana ka ditaba tša motho ka noši, go akaretša mathata goba manyami ao o nago le ona lenyalong la gago. O ka thoma go ithekga maikwelong ka motho yoo. Go boledišana le motho yoo ka mogala goba mokerong wa poledišano inthaneteng go ka dira gore o se sa botegela molekane wa gago. Balekane ba lenyalo ka mo go swanetšego ba letetše gore ditaba tše itšego e be bona feela bao ba boledišanago ka tšona le gore “dithopa” tša bona di se tsebje ke motho.—Diema 25:9.

O se ke wa o itokafatša ka gore ga go na maikwelo a lerato mola ge e le gabotse a ka ba a le gona! Jeremia 17:9 e re pelo ke “mmata-mano-mabe.” Ge e ba o gwerane kudu le motho yo mongwe wa bong bjo bo fapanego, ipotšiše gore: ‘Na ge ke botšišwa ka tswalano ye ke a itokafatša goba ke leka go e dira sephiri? Na ke tla lokologa ge molekane wa-ka a ka kwa ke boledišana le motho yoo? Ke be ke tla ikwa bjang ge e ba molekane wa-ka a be a ka hlagolela bogwera bjo swanago?’—Mateo 7:12.

Go ba le tswalano e sa swanelago go ka senya lenyalo, ka ge go batamelana ka maikwelo go ka feleletša ka dikopano tša botona le botshadi. Bjalo ka ge Jesu a lemošitše, “pelong go tšwa . . . bohlotlolo.” (Mateo 15:19) Lega go le bjalo, gaešita le ge bohlotlolo bo sa dirwe, go ka ba thata kudu go lokiša tshenyo e bakilwego ke go se sa botana. Mosadi yo a bitšwago Karen * o itše: “Ge ke lemoga gore Mark o be a boledišana le mosadi yo mongwe ka mogala ka sephiring ka makga a mmalwa ka letšatši, ke ile ka kwa bohloko kudu. Go thata kudu go dumela gore ga se ba ka ba ba le dikopano tša botona le botshadi. Ga ke tsebe gore na ke tla ka ka kgona go mmota gape.”

Boloka bogwera bja gago le batho ba bong bjo bo fapanego bo e-na le mellwane. O se ke wa hlokomologa maikwelo a sa swanelago goba wa lokafatša maikemišetšo a sa sekago. Ge e ba o lemoga gore tswalano yeo e bea lenyalo la gago kotsing, kapejana gata mogato wa go lekanyetša tswalano yeo goba go e fediša. Beibele e re: “Mohlale ó bôna dikotsi di s’e-tla, a khuta; ba mašilô ba a feta, ba y’o hlaka.”—Diema 22:3.

Šireletša Tswalano ya Gago ya go ba Nama e Tee

Mmopi wa rena o rerile gore lenyalo e swanetše go ba tswalano ya kgaufsi kudu magareng ga batho ba babedi. O boletše gore monna le mosadi “ba tlo ba nama e tee.” (Genesi 2:24) Tswalano ya go ba nama e tee ga e akaretše feela go ba le tswalano ya dikopano tša botona le botshadi. E akaretša go tlemagana maikwelong, moo go matlafatšwago ke go se be le boithati, go botana gotee le go hlomphana. (Diema 31:11; Maleaki 2:14, 15; Baefeso 5:28, 33) Go diriša melao ye ya motheo go tla thuša go šireletša lenyalo la gago gore le se ke la senyega ka baka la go se botege maikwelong le monaganong.

[Mengwalo ya tlase]

NA O KILE WA IPOTŠIŠA?

▪ Na dikakanyo tša dikopano tša botona le botshadi di ka lebiša ditirong?—Jakobo 1:14, 15.

▪ Na go gwerana kudu le motho yo mongwe wa bong bjo bo fapanego go ka bea lenyalo la gago kotsing?—Jeremia 17:9; Mateo 15:19.

▪ O ka matlafatša bjang tlemo ya lenyalo la gago?—1 Bakorinthe 7:4; 13:8; Baefeso 5:28, 33.

[Ntlhakgolo go letlakala 21]

“Yo mongwe le yo mongwe yo a tšwelago pele a lebeletše mosadi e le gore a mo kganyoge o šetše a hlotlotše le yena pelong ya gagwe.”—Mateo 5:28