Re ka Hwetša Tlhahlo Kae?

KE MANG yo a ka re šupago tsela yeo e išago katlegong ya kgonthe—e sego katlego go ya ka kgopolo ya batho eupša katlego go ya ka motho ka boyena? Go etša ge go boletšwe sehlogong se se fetilego, katlego ya kgonthe, e swanetše gore bonyenyane e tswalanywe le melao ya motheo e kwagalago ya boitshwaro le morero o hlomphegago bophelong—e lego dilo tšeo di sa ithekgago ka botumo, lehumo goba matla.

Re ka hwetša kae melao ya motheo e kwagalago le dikarabo tša dipotšišo tša mabapi le morero wa bophelo? Na ke ka go itebelela? Therešo ke gore—bjalo ka batho bao ba sa phethagalago, re sekametše go beng le dikganyogo tše di fošagetšego tšeo di ka re lebišago tseleng e fošagetšego. (Genesi 8:21) Ka baka leo, ba dimilione ba tšwela pele ba phegelela mafeela ao Beibele e a hlalosago e le “kganyogo ya nama le kganyogo ya mahlo le pontšho ya bompogeng ya dilo tša motho tša boiphedišo.” (1 Johane 2:16) Yeo ga se katlego ya kgonthe eupša ke bofora bjo bo lebišago manyaming le go se beng le lethabo. Ka baka leo, ba bantši ba na le lebaka le lebotse la go tsoma dikarabo go Mmopi wa rena mabapi le dipotšišo tše di tseneletšego kudu tša bophelo. *

Na re Swanetše go Botšiša Modimo?

Ke ka baka la’ng go kwagala go botšiša Mmopi wa rena? O a tseba gore ke ka baka la eng a re bopile, gomme ka baka leo, o tseba gore morero wa rena e swanetše go ba ofe bophelong. E bile o tseba kamoo a re bopilego ka gona—mmeleng, monaganong le maikwelong. Ka gona, Modimo o tseba melao ya motheo e phalago yohle yeo batho ba ka phelago ka yona. Go feta moo, Modimo ke mohlala o mogolo kudu wa lerato gomme ka go rialo o nyaka gore re thabe e le ka kgonthe le go atlega. (1 Johane 4:8) Re ka leba kae gore re hwetše tlhahlo ya gagwe e lerato? Re ka leba Beibeleng e Kgethwa, yeo Modimo a re hlametšego yona a diriša bangwadi ba batho ba 40. * (2 Timotheo 3:16, 17) Lega go le bjalo, re ka holofela bjang tlhahlo e hwetšwago ka pukung yeo?

Moemedi yo mogolo wa Modimo e lego Jesu Kriste o boletše gore “bohlale bo hlatselwa gore bo lokile ke mediro ya bjona,” goba mafelelo. (Mateo 11:19; Johane 7:29) Bohlale bjo bo theilwego melaong ya motheo ya Modimo bo re sepediša tseleng e lebišago katlegong le lethabong le le swarelelago—“tšohle ditsela tše boló”—mola bohlale bja batho bja go hlokomologa Modimo bo dira gore motho a palelwe goba a se ke a thaba.—Diema 2:8, 9; Jeremia 8:9.

Ela hloko mehla ya mahiphi yeo e tšweletšego lefaseng ka bo-1960. Ge a gana ditekanyetšo le bolaodi bja moloko wa kgale, tše dingwe tša dilo tšeo mahiphi a mantši a ilego a di kgothaletša e be e le go diriša dihlare-tagi, filosofi ya gore motho o swanetše go phelela lehono feela le tokologo ya go ba le dikopano tša botona le botshadi. Eupša na tsela yeo ya go phela e bontšha bohlale bja kgonthe? Na e ile ya dira gore batho ba be le morero wa kgonthe bophelong le go ba le ditekanyetšo  tša boitshwaro tšeo di bego di kgothaletša khutšo ya kgonthe ya ka gare le lethabo le le swarelelago? Histori e bontšha gore ga se ya dira gore batho ba kaonefale eupša e ile ya tlaleletša boitshwarong bja batho bjo bo tšwelago pele bo phuhlama.—2 Timotheo 3:1-5.

Ka go fapana le difilosofi tša batho, bohlale bjo bo lego ka Beibeleng bo ile bja itlhatsela e le bjo bo holago ka mehla. (Jesaya 40:8) Ge o dutše o bala sehlogo se se latelago, mohlomongwe o tla bona lebaka, ka gobane se hlalosa melao ya motheo ya Beibele e tshela yeo e thušitšego batho ba dimilione, go tšwa mo e ka bago ditšhabeng ka moka, gore o thabe e le ka kgonthe le go atlega—go sa šetšwe maemo a tša boiphedišo goba maemo setšhabeng.

[Mengwalo ya tlase]

[Lepokisi go letlakala 23]

DITUMELO TŠEO DI FOKOTŠAGO KHOLOFELO YA KATLEGO

Batho ba bantši ba bolela gore Modimo ga a gona le gore bophelo bo bile gona ka tlhagelelo e sa naganego. Ge e ba pono ye e be e le therešo, bophelo bo be bo tla ba bo tletše ka lelokelelo la dikhemikhale le dikotsi tša thutaphedi gomme go tsoma ga rena morero le melao ya motheo ya legohle go be go ka se be le morero le gatee.

Ba bangwe ba dumela gore Modimo o re bopile gomme a re lahla. Ge e le gabotse, pono ye e tšweletša kgopolo ya gore re ditšhiwana tša moya gomme ga re na morero wa kgonthe bophelong gotee le ditekanyetšo. Hlokomela: Modimo o neile phoofolo e nngwe le e nngwe bohlale bjo bo nyakegago gore e phethagatše morero wa yona tlholong. Ka baka leo, bohlale bja gagwe bjo bogolo bo bonagatšwa lefaseng leo le re dikologilego. Na Mmopi yena yoo a ka re bopa gomme a re tlogela re hlahlatha lefsifsing? Le gatee!—Baroma 1:19, 20.

Ge bo-radifilosofi bao e lego baila-modimo ba bolela gore go tsoma ga rena morero le melao ya motheo ya legohle ke ga lefeela, ba dira gore kholofelo ya gore re tla atlega e fokotšege.

[Seswantšho go letlakala 23]

Bohlale bjo bo hwetšwago ka Beibeleng bo hlatselwa e le bjo bo kwagalago ka mafelelo a bjona a mabotse