Pono ya Beibele

Jesu o Belegwe Neng?

PEGO ya Encyclopedia of Early Christianity e re, “ga go yo a tsebago letšatši-kgwedi le le nepagetšego la matswalo a Kriste.” Lega go le bjalo, batho ba dimilione bao ba ipolelago gore ke Bakriste lefaseng ka bophara ba keteka matswalo a Jesu ka December 25. Eupša, ga go na moo letšatši-kgwedi le le tšwelelago gona ka Beibeleng. Na ruri Jesu o belegwe ka December?

Gaešita le ge Beibele e sa re nee letšatši-kgwedi le itšego ka go lebanya e le la matswalo a Jesu, e re nea bohlatse bja gore ga se a belegwa ka December. Le gona, go ya ka bohlatse bjo bo tšwago methopong ya lefase re ka bona lebaka leo ka lona December 25 e kgethilwego e le letšatši-kgwedi la go keteka matswalo a gagwe.

Ke ka Baka La’ng go ka se Direge Gore o Ile a Belegwa ka December?

Jesu o belegetšwe motseng wa Judea wa Betlelehema. Ebangedi ya Luka e bega gore: “Nageng yona yeo go be go bile go e-na le badiši bao ba bego ba dula merakeng ba dišitše mehlape ya bona bošego.” (Luka 2:4-8) Se e be e se selo se se sa tlwaelegago. Puku ya Daily Life in the Time of Jesus e re, “Mehlape e be e swanetše go fetša nako e ntši ya ngwaga e le ka ntle.” Eupša badiši ba be ba ka ba ka ntle bjang le mehlape ya bona bošegong bjo bo tonyago bja December? Puku e bolela gore: “Ba be ba fetša marega ba le lefelong le le šireletšegilego; go tšwa go se se nnoši ruri go ka bonwa gore letšatši-kgwedi le le tlwaelegilego la Keresemose leo e lego la marega, ruri go ka se direge gore e be e le le le nepagetšego, ka ge Ebangedi e bolela gore badiši ba be ba le merakeng.”

Phetho ye e thekgwa ke ntlha e nngwe go tšwa pegong ya Ebangedi ya Luka e rego: “Mehleng yeo gwa tšwa taelo go Kesara Augustose ya gore lefase ka moka le go agilwego go lona le ngwadišwe; (go ngwadišwa mo ga pele go dirilwe nakong ya ge Kirenio e be e le mmuši wa Siria;) gomme batho ka moka ba sepela gore ba ye go ngwadišwa, yo mongwe le yo mongwe a ya motseng wa gabo.”—Luka 2:1-3.

Mohlomongwe Augustose o ile a laela go ingwadišetša go balwa ga batho e le gore go ka kgoboketšwa tsebišo yeo e tlago go dirišwa mabapi le go ntšha motšhelo le go ingwadišetša ditirelo tša bohlabani tša kgapeletšo. Ka go kwa taelo yeo, Maria o ile a sepela le monna wa gagwe, Josefa, leetong leo e ka bago la dikhilomithara tše 150 go ya Betlelehema gaešita le ge e be le moimana yo a  lego kgaufsi kudu le go belega. Bjale akanya ka se. Na go kwagala e le ga tlhaologanyo gore Augustose—mmuši yoo e lego ka sewelo a bego a tsena-tsenana le ditaba tša mmušo wa lefelong leo—a nyake gore batho bao ba bego ba šetše ba sekametše go rabeleng ba sepele leeto le letelele gakaakaa marega?

Sa bohlokwa kudu ke gore bo-radihistori ba bantši le diithuti tša Beibele ba gana December 25 bjalo ka letšatši-kgwedi leo Jesu a belegwego ka lona. Ga go pelaelo gore o tla hwetša tsebišo e bjalo saeklopedieng yeo e hwetšagalago lefelong la gabo lena. Our Sunday Visitor’s Catholic Encyclopedia e bolela gore: “Go na le tumelelano ya kakaretšo ya gore Jesu ga se a belegwa ka December 25.”

Lebaka Leo ka Lona December 25 e Kgethilwego

Nywageng e makgolo ka morago ga lehu la Jesu, December 25 e ile ya kgethwa bjalo ka letšatši-kgwedi la matswalo a gagwe. Ka baka la’ng? Bo-radihistori ba bantši ba dumela gore nako ya ngwaga yeo e ilego ya fetoga sehla sa Keresemose ge e le gabotse e be e le nako yeo menyanya ya boheitene e bego e ketekwa ka yona.

Ka mohlala, Encyclopædia Britannica e bolela gore: “Tlhaloso e nngwe e phatlaletšego ka gohle ya mabapi le mathomo a letšatši-kgwedi le ke gore December 25 e bile go fetošetšwa Bokristeng ga dies solis invicti nati (‘letšatši la matswalo a letšatši leo le sa fenywego’), e lego letšatši la maikhutšo le le tumilego Mmušong wa Roma leo ka lona go bego go ketekwa letšatši la mafelelo la marega le le bjalo ka leswao la go tswalwa gape ga letšatši, go lahlwa ga marega le go tsebatšwa ga go tswalwa gape ga seruthwane le selemo.”

The Encyclopedia Americana e re botša gore: “Lebaka la go hlongwa ga December 25 e le Keresemose ke leo le sa kwagalego gabotse ka tsela e itšego, eupša go dumelwa gore gantši letšatši leo le ile la kgethwa gore le dumelelane le menyanya ya baheitene yeo e bego e dirwa gona nakong yeo ya seremo sa letšatši sa marega, ge nako ya mosegare e be e thoma go telefala, e le go keteka ‘go tswalwa gape ga letšatši.’ . . . Saturnalia ya Roma (monyanya o bego o direlwa Saturn, modimo wa temo le bakeng sa matla a mpshafaditšwego a letšatši), le yona e be e dirwa nakong yeo.” Menyanya e bjalo gantši e be e akaretša boitshwaro bjo bo gobogilego bja batšea-karolo, bao ba bego ba kopanela meletlong ya boithabišo e sa laolegego le ya mašata. Ka mo go lemogegago, boitshwaro bjo bjalo bo bonagala meletlong e mentši ya Keresemose.

Kamoo re Swanetšego go Godiša Kriste ka Gona

Ba bangwe ba nagana gore go sa šetšwe gore letšatši-kgwedi la kgonthe ke lefe, Bakriste ba sa dutše ba swanetše go gopola matswalo a Jesu. Ba nagana gore go ketekwa mo go bjalo ge go dirwa ka seriti, ke tsela e swanetšego ya go godiša Kriste.

Ka kgonthe, go belegwa ga Jesu ke tiragalo ya bohlokwa pegong ya Beibele. Beibele e bolela gore ge Jesu a be a belegwa, gatee-tee lešaba le legolo la barongwa le ile la tšwelela gomme ka lethabo le legolo la tumiša Modimo, la re: “Letago a le ye go Modimo magodimo-dimong, gomme lefaseng a go be le khutšo bathong bao a ba amogelago.” (Luka 2:13, 14) Lega go le bjalo, re a lemoga gore Beibele ga e nee gaešita le tšhišinyo ya gore letšatši la matswalo a Jesu le swanetše go ketekwa. Ka mo go fapanego, go na le taelo e lebanyago bakeng sa go gopola lehu la gagwe, e lego seo Dihlatse tša Jehofa di se dirago gatee ka ngwaga. (Luka 22:19) Yeo ke tsela e nnoši ya go godiša Jesu.

Bošegong bja mafelelo bja bophelo bja gagwe e le motho, Jesu o itše: “Lena le bagwera ba-ka ge e ba le dira seo ke le laelago sona.” (Johane 15:14) Le gona o itše: “Ge e ba le nthata, le tla boloka ditaelo tša-ka.” (Johane 14:15) Ruri ga go na tsela e kaone ya go godiša Jesu Kriste go feta go ithuta ka dithuto tša gagwe le go di latela.

NA O ILE WA IPOTŠIŠA?

▪ Ke ka baka la’ng go ka se direge gore Jesu o ile a belegwa ka December?—Luka 2:1-8.

▪ Ke’ng seo e lego sa bohlokwa kudu go feta letšatši la motho la matswalo?—Mmoledi 7:1.

▪ Ke tsela efe e di phalago tšohle yeo re ka godišago Jesu ka yona?—Johane 14:15.

[Ntlhakgolo go letlakala 11]

Beibele e nea bohlatse bja gore Jesu ga se a belegwa ka December

[Seswantšho go letlakala 10]

Na badiši ba be ba ka dula le mehlape ya bona bošego ba le ka ntle lehlweng?

[Mothopo]

Todd Bolen/Bible Places.com