Mogato 2

Agang Legae le le Nago le Lerato

Ke ka baka la’ng le swanetše go gata mogato wo? Bana ba nyaka lerato gomme ga ba gole gabotse ka ntle le lona. Ka bo-1950, seithuti sa setšo le ditswalano tša batho M. F. Ashley Montagu se ngwadile gore: “Seo motho a se nyakago gore a gole ke go fepša ka lerato; mothopo wa bophelo bjo bobotse ke lerato, kudu-kudu nywageng ya pele e tshela ya bophelo.” Banyakišiši ba lehono ba dumelelana le mantšu a mafelelo a boletšwego ke Montagu a gore “bana ba ba le mafelelo a sa thabišego ge ba le boemong bja go se bontšhwe lerato le le lekanego.”

Tlhohlo: Go phela lefaseng le le se nago lerato la boithati go fokodiša ditlemo tša lapa. (2 Timotheo 3:1-5) Banyalani ba ka hwetša gore mathata a tša ditšhelete le kgateletšego ya maikwelo tšeo di sepedišanago le go godiša bana di dira gore mathata a lenyalo ao a lego gona a oketšege. Ka mohlala, go ba le pono e sa swanego tabeng ya go laya le go putsa bana go ka gakatša mathata a banyalani bao ba šetšego ba e-na le bothata bja go boledišana.

Tharollo: Rulaganyang go fetša nako gotee le le lapa. Banyalani ba swanetše go rulaganya gore ba fetše nako ba le gotee. (Amosi 3:3) Dirišang nako ya lena ka bohlale ka morago ga ge bana ba robetše. Le se dumelele thelebišene e le tšeela nako ye ya bohlokwa. Bolokang lerato le tuka lenyalong la lena ka gore ka mehla le botšane kamoo le ratanago ka gona. (Diema 25:11; Sefela sa Difela 4:7-10) Go e na le go “nyaka diphošo” ka mehla, nyaka ditsela tšeo o ka retago molekane wa gago ka tšona letšatši le letšatši.—Psalme 103:9, 10, NW; Diema 31:28.

Botšang bana ba lena gore le a ba rata. Jehofa Modimo o beetše batswadi mohlala ka go bolela maikwelo a gagwe ka Morwa wa gagwe, Jesu. (Mateo 3:17; 17:5) Fleck, tate yo a dulago Austria o re: “Ke bone gore bana ba nyakile ba swana le matšoba. Go etša ge letšoba le ka retologela letšatšing gore le hwetše seetša le borutho, bana ba retologela go batswadi ba bona bakeng sa lerato le go kgonthišetšwa gore ke ditho tša bohlokwa tša lapa.”

Go sa šetšwe gore o lenyalong goba o motswadi yo a se nago molekane, ge e ba o thuša lapa la gago gore le ratane le go rata Modimo, lapa la gago le tla atlega.

Lega go le bjalo, Lentšu la Modimo le re’ng ka go diriša matla a taolo a botswadi?

[Mantšu a ipiletšago a tsopotšwego go letlakala 4]

“Lerato . . . ke setlemo se se phethagetšego sa botee.” —Bakolose 3:14