Ke ka Baka La’ng Modimo a Dumelela Tlaišego?

KA DINAKO tše dingwe motho yo a botšišago potšišo e rego “Ke ka baka la’ng?” o nyaka khomotšo gotee le dikarabo, ka gobane ge potšišo e rotoga ka baka la gore motho a lahlegetšwe o šoro, motho yo bjalo ruri o tloga a nyaka khomotšo. Na Beibele e nea khomotšo e bjalo? Ela hloko ditherešo tše tharo tše bohlokwa tša Beibele tšeo di nyalelanago le taba ye.

Ya pele, go botšiša lebaka leo ka lona Modimo a dumelelago tlaišego ga se phošo. Batho ba bangwe ba nagana gore ge ba botšiša potšišo e bjalo, seo se bontšha go hloka tumelo go Modimo goba go se mo hlomphe. Ka mo go fapanego, ge e ba o botšiša potšišo ye go tšwa pelong, o yo mongwe wa batho ba botegago. Moporofeta yo a botegago Habakuku o ile a botšiša Modimo gore: “Ke ka baka la’ng o ntesa ke bogela go hloka toka mo go šoro gakaakaa? Ke ka baka la’ng o dumelela gore bošoro, go hloka molao, bosenyi le sehlogo di ate gohle?” (Habakuku 1:3, Contemporary English Version) Jehofa Modimo ga se a ka a omanya Habakuku. Go e na le moo, o dirile gore potšišo ya monna yoo yo a botegago e ngwalwe gore ka moka ga rena re kgone go e bala.—Baroma 15:4.

Ya bobedi, go bohlokwa go kwešiša gore Modimo o go kwela bohloko ge o le tlalelong. Ga a kgole e bile ga se yo a sa tsebjego; O “rata tša tokô” e bile o hloile bokgopo le tlaišego yeo bo e bakago. (Psalme 37:28; Diema 6:16-19) Morago kua mehleng ya Noa, Modimo o ile a “nyama pelo” ka baka la bošoro bjoo bo bego bo tlala lefase. (Genesi 6:5, 6) Modimo ga a fetoga; ga a ikwe ka tsela e fapanego ka seo se diregago lehono.—Maleaki 3:6.

Ya boraro, le ka mohla Modimo ga se mothopo wa bokgopo. Beibele e dira gore ntlha ye e kwagale gabotse. Batho bao ba rego Modimo ke yena a bakago dilo tše swanago le polao le botšhošetši ba mmolela gampe. Ela hloko seo Jobo 34:10 e se bolelago: “Modimo ó kxolê le bokxôpô; Yo-matla-ohle ó kxolê le xo foša.” Ka mo go swanago, Jakobo 1:13 e re: “A go se be le yo a rego ge a le molekong a re: ‘Ke lekwa ke Modimo.’ Gobane Modimo a ka se ke a lekwa ka dilo tše mpe le gona yena ga a leke motho le ge e le ofe.” Ka gona ge e le gore o ile wa tlaišega, kgonthišega gore Modimo ga se sebaki sa tlaišego yeo.

Ke Mang yo a Bušago Lefase?

Se go boletšwego ka sona ka mo godimo se sa re šia le potšišo e rego, Ge e ba Modimo a e-na le lerato, a lokile e bile a e-na le matla, ke ka baka la’ng go tletše bobe? Go na le kgakanego e tlwaelegilego yeo e swanetšego go rarollwa pele. Batho ba bantši ba nagana gore Modimo  yo Matla-ohle ke mmuši wa lefase le, yoo a laolago dilo ka moka ka go lebanya. Mopresitente wa seminari e nngwe ya thutabodumedi o boletše gore: “Ga go athomo e tee goba molekule legohleng woo o sa laolwego ke yena.” Na Beibele ruri e ruta seo?

Ga go bjalo le gatee. Batho ba bantši ba makatšwa ke seo ge e le gabotse Beibele e se bolelago mabapi le yoo a bušago lefase. Ka mohlala, 1 Johane 5:19 e re: “Lefase ka moka le rapaletše matleng a yo kgopo.” Yo kgopo yo ke mang? Jesu Kriste o ile a mo šupa e le Sathane Diabolo, yoo a ilego a re ke “mmuši wa lefase.” (Johane 14:30) Ka gona-ge, na seo ga se kwagale? Sathane ke moradia, yo a fora-foretšago e bile o tletše lehloyo—e lego dika tšeo di bakago tlaišego e ntši ya batho. Lega go le bjalo, ke ka baka la’ng Modimo a dumelela Sathane a buša?

Kgang Yeo e Tsošitšwego Kua Edene

Motswadi yo a nago le lerato le yo a nago le boikarabelo o be a tla ikwa bjang ge e ba a be a latofatšwa phatlalatša gore o fora bana ba gagwe, gore o diriša matla a gagwe a taolo gampe le gore o ba kuna dilo tše dibotse? Na o be a ka bontšha ditatofatšo tšeo tša bothomeletši e le maaka ka go itia yoo a mo latofatšago? Ga go bjalo le gatee! Ge e le gabotse, ge a arabela ka tsela e bjalo, a ka dira gore ditatofatšo di bonale eka ke therešo.

Papišo ye e re thuša go hlalosa tsela ya Jehofa Modimo ya go swaragana le kgang yeo a ilego a hlohlwa ka yona mathomong a histori ya batho lefelong leo le bitšwago Edene. Modimo moo o ile a tsebiša batho ba babedi ba mathomo, e lego Adama le Efa, ka modiro o makatšago bakeng sa bana ba gagwe ba lefaseng. Ba be ba swanetše go tlala lefase, ba le fenye gomme ba le fetoše paradeise ya lefase ka moka. (Genesi 1:28) Go oketša moo, dimilione tše makgolo tša barwa ba Modimo ba moya di be di kgahlegela modiro wo woo o kgahlišago.—Jobo 38:4, 7; Daniele 7:10.

Ka ge e le Modimo yo a nago le seatla se se bulegilego, Jehofa o ile a fa Adama le Efa legae le lebotse la serapa le e-na le dienywa tša lona ka moka tše dibose. Ba be ba ileditšwe sehlare se tee feela—“sehlare sa xo tseba botse le bobe.” Ka go se je dienywa tša sehlare se, Adama le Efa ba be ba tla bontšha gore ba bota Tatago bona ka mo go feletšego gomme ba lemoga gore o na le tshwanelo ya go direla bana ba gagwe phetho ya seo se lokilego le se sa lokago.—Genesi 2:16, 17.

Lega go le bjalo, ka manyami yo mongwe wa barwa ba Modimo ba moya, a tutueditše ke kganyogo ya go nyaka go rapelwa, o ile a botša Efa gore ge a be a ka ja seenywa seo se ileditšwego, o be a ka se hwe. (Genesi 2:17; 3:1-5) Ka go rialo, morongwa yo yo kgopo, e lego Sathane, o ile a ganetša Modimo ka go lebanya gomme ge e le gabotse a re ke moaketši! Sathane o ile a tšwela pele a latofatša Modimo ka gore o kuna Adama le Efa tsebo e bohlokwa. Sathane o be a e ra gore batho ba be ba ka kgona go itirela phetho ya seo se lokilego le se sa lokago. Ge e le gabotse, Sathane o latofaditše Modimo ka gore ke Mmuši le Tate yo a sa swanelegego gomme a re yena, Sathane, o swanelega kudu.

Ka go diriša maaka a bjalo a boradia le a matala, morongwa yo o ile a itira Sathane Diabolo. Maina a a ra gore “Moganetši” le “Mothomeletši.” Ke’ng seo Adama le Efa ba ilego ba se dira? Ba ile ba tšea lehlakore la Sathane gomme ba hlanogela Modimo.—Genesi 3:6.

Jehofa nkabe a ile a fediša marabele ao le semeetseng. Eupša bjalo ka ge go boletšwe papišong ya rena, dikgang tše bjalo di ka se rarollwe ka go itefeletša ka bošoro. Gape gopola gore ge Sathane a be a hlohla Modimo, barongwa ba dimilione ba be ba theeditše. Ge e le gabotse, ka morago palo e lemogegago eupša e sa tsebjego ya barongwa e ile ya tlatša Sathane borabeleng bja gagwe, ya itira batemona.—Mareka 1:34; 2 Petro 2:4; Juda 6.

Ke ka Baka La’ng Modimo a se a Tsena Ditaba Gare?

Ka go fora-foretša Adama le Efa gore ba kgethe tsela ya go ipuša ntle le Mmopi wa bona, mafelelong Sathane o ile a hloma lapa leo ge e le gabotse le sa ipušego, eupša le lego ka tlase ga taolo ya gagwe. Le šušumeditšwe, le tseba goba le sa tsebe, ke “tatago” lona e lego Diabolo, lapa le le be le tla ipeela dipakane gotee le ditekanyetšo tša lona tša boitshwaro. (Johane 8:44) Eupša na tsela yeo ya bophelo e be e tla ba nea tokologo ya kgonthe gotee le lethabo leo le swarelelago? Jehofa o tsebile gabotse kudu gore e be e ka se ke.  Lega go le bjalo, o ile a dumelela marabele go tšwela pele ka tsela ya ona ya boipušo, gobane ye e be e tla ba tsela e nnoši yeo ka yona dikgang tšeo di tsošitšwego kua Edene di ka rarollelwago sa ruri.

Gona bjale ka morago ga nywaga e fetago e 6 000, batho ba agile tshepedišo ya dilo ya lefase, ba leka mehuta ka moka ya mebušo gotee le melao ya boitshwaro. Na o thabela mafelelo a seo? Na ruri lapa la batho ke leo le thabilego, le nago le khutšo le leo le nago le botee? Go molaleng gore karabo ke aowa! Go e na le moo, moloko wa batho o hlasetšwe ke dintwa, ditlala, dikotsi tša tlhago, bolwetši le lehu gomme di baka “lefeela,” “bohloko” le go “tsetsela,” bjalo ka ge Beibele e bolela.—Baroma 8:19-22; Mmoledi 8:9.

Lega go le bjalo, ba bangwe ba ka botšiša gore, ‘Ke ka baka la’ng Modimo a se a thibela masetlapelo?’ Seo ruri e tla ba go hloka toka e bile go tla bipa kgang ka go dira gore go bonale eka go rabela malebana le Modimo ga go na ditla-morago. Ka baka leo, Jehofa ga se a ka a leka go laola ditiragalo bakeng sa go thibela bosenyi le masetlapelo ka moka ao a tlišwago ke go se mo kwe, e ka ba ka go lebanya goba ka go se lebanye. * Jehofa le ka mohla a ka se thekge maaka a gobatšago a gore tshepedišo ya Sathane e ka atlega le gore e hweditše senotlelo sa lethabo! Lega go le bjalo, Jehofa ga se a ka a hlokomologa ditiragalo. Ge e le gabotse, o ile a tšwela pele a šoma ka mafolofolo, bjalo ka ge re tla bona seo gona bjale.

“Tate o Tšwetše Pele a Šoma”

Mantšu ao a Jesu a bontšha gore Modimo o be a se a fo dula a sa dire selo, a lebeletše ge dilo di direga. (Johane 5:17) Go e na le moo, o ile a dula a swaregile kudu ga e sa le go tloga borabeleng  bja kua Edene. Ka mohlala, o ile a budulela bangwadi ba Beibele go bega kholofetšo ya gagwe ya gore, “peu” ya nakong e tlago e tlo pšhatla Sathane le bao ba lego ka lehlakoreng la gagwe. (Genesi 3:15) Go oketša moo, a diriša yona Peu yeo, Modimo o be a tla hloma Mmušo, Mmušo wa legodimong, woo o tlago go šegofatša batho bao ba kwago gomme wa fediša dibaki ka moka tša tlaišego gaešita le lehu.—Genesi 22:18; Psalme 46:9; 72:16; Jesaya 25:8; 33:24; Daniele 7:13, 14.

Ge a gata mogato wa go phethagatša dikholofetšo tšeo tše di makatšago, Jehofa o ile a romela Yo a bego a tla ba Mmuši yo mogolo wa Mmušo woo mo lefaseng. Yo e be e le Jesu Kriste, Morwa wa Modimo. (Bagalatia 3:16) Ka go dumelelana le morero wa Modimo ka yena, Jesu o ile a tsepamišetša thuto ya gagwe Mmušong wa Modimo. (Luka 4:43) Ge e le gabotse, Kriste o ile a bonagatša ka mediro ya gagwe seo a bego a tlo se dira bjalo ka Kgoši ya Mmušo woo. O ile a fepa batho ba dikete bao ba bego ba swerwe ke tlala, a fodiša bao ba bego ba babja, a tsoša bahu a ba a bonagatša matla a gagwe a go laola dilo tša tlhago ka go homotša ledimo le lešoro. (Mateo 14:14-21; Mareka 4:37-39; Johane 11:43, 44) Beibele e bolela mabapi le Jesu gore: “Go sa šetšwe gore dikholofetšo tša Modimo ke tše dintši gakaakang, di bile Ee ka yena.”—2 Bakorinthe 1:20.

Bao ba theetšago Jesu gomme ba tšwa “lefaseng”—e lego tshepedišo ya dilo yeo e furaletšego Modimo e bile e bušwago ke Sathane—ba amogelwa ka lapeng la Jehofa. (Johane 15:19) Lapa le la lefase ka bophara la Bakriste ba therešo le hlahlwa ke lerato, le kgomaretše khutšo e bile le tsebja ka boikemišetšo bja go tomola modu le ga e le ofe wa boema-noši le go beba sefahlego gare ga lona.—Maleaki 3:17, 18; Johane 13:34, 35.

Go e na le go thekga lefase la gona bjale, Bakriste ba therešo ba thekga Mmušo wa Modimo le go bolela ka wona e le ge ba e-kwa taelo ya Jesu yeo e begilwego go Mateo 24:14. Nagana ka se: Ke bomang bao ba bolelago ‘ditaba tše dibotse tša mmušo’ lefaseng ka bophara? Ke bomang bao, bjalo ka lapa la moya la lefase ka bophara, ba gannego go tšea karolo dintweng le diphapanong tšeo di aroganyago tša setšhaba le tša selegae? Le gona ke bomang bao ba dumelelago Lentšu la Modimo le hlahla boitshwaro bja bona, go sa šetšwe gore ditekanyetšo tša lona tše phagamego di a tsebja goba go se bjalo? (1 Johane 5:3) Ba bantši ba lemogile gore Dihlatse tša Jehofa di na le mekgwa ye. Hle itlhahlobele bohlatse ka bowena.

Kgetha Mmušo wa Modimo!

Batho, bao ba aroganego le Modimo e bile ba forilwego ke Sathane, ba agile tshepedišo ya lefase ya dilo yeo e tšwelago pele e baka manyami le go hloka kholofelo. Gaešita le lefase ka bolona le a senywa! Ka lehlakoreng le lengwe, Jehofa o hlomile mmušo wa legodimong woo o  fetošitšego maphelo a dimilione tša batho ka tsela yeo e ba holago le yeo e filego yo mongwe le yo mongwe wa bona kholofelo ya kgonthe. (1 Timotheo 4:10) O tla kgetha ofe?

O swanetše go dira phetho gona bjale, ka gobane Modimo a ka se dumelele Sathane le lefase la gagwe le kgopo go tšwela pele ka mo go sa felego. Morero wa Modimo wa mathomong wa go dira lefase le paradeise ga wa fetoga. Gore o fihlelele seo, Mmušo wa gagwe le bathekgi ba wona ba tla tšwela pele ba atlega, ge lefase leo le bušwago ke Sathane le tšwela pele le welwa ke “dihlabi tša tlalelo” go ba go fihlela ge Modimo a le fediša. (Mateo 24:3, 7, 8) Ka go rialo, ge e le gore o kile wa llela Modimo ka gore “Ke ka baka la’ng?” mo theetše ka go kwa molaetša wa Beibele wa khomotšo le kholofelo. Gaešita le gona bjale, megokgo ya gago ya manyami e ka fetoga megokgo ya lethabo.—Mateo 5:4; Kutollo 21:3, 4.

[Mongwalo wa ka tlase]

[Diswantšho go letlakala 7]

Na o kgotsofetše ka mafelelo a mmušo wa batho?

[Methopo]

Baby: © J. B. Russell/Panos Pictures; crying woman: © Paul Lowe/Panos Pictures

[Seswantšho go letlakala 8, 9]

Jesu o tla tsošološa Paradeise—gaešita le bahu o tla ba tsošetša bophelong