Ke be ke le Morwa wa Lehlaswa

KA GE GO ANEGA MEROS WILLIAM SUNDAY

Ke be ke rutilwe go rata Modimo go tloga bjaneng, eupša ge ke e-na le nywaga e 18, ke ile ka rabela gomme ka tloga gae. Ke phetše nywaga e 13 ke le bjalo ka morwa wa lehlaswa wa seswantšhong sa Jesu. (Luka 15:11-24) Ke ile ka ba morekiši wa dihlare-tagi moo go nyakilego go senya bophelo bja-ka. Ere ke go botše seo se lebišitšego go fetošeng tsela ya-ka ya bophelo le go boeng ga-ka bjalo ka morwa wa lehlaswa.

KE BELEGWE ke batswadi ba Bakriste ka 1956, ke le wa bobedi go bana ba senyane. Re be re dula Ilesha, toropo ya ka borwa-bodikela bja Nigeria. Tate o godišitšwe e le Mokatholika, eupša ka 1945 rangwane’agwe o ile a mo fa puku ya The Harp of God. * Ka morago ga go e bala, Tate o ile a ikopanya le Dihlatse tša Jehofa. Ka 1946 o ile a kolobetšwa, gomme nakwana ka morago ga moo Mma le yena a kolobetšwa.

Ke sa dutše ke gopola kamoo Jehofa e bego e le wa kgonthe ka gona go nna ge ke be ke sa le yo monyenyane le kamoo ke bego ke tšea karolo ka gona ka mafolofolo bodireding le batswadi ba-ka. Tate o ile a ithuta Beibele le nna. Ka dinako tše dingwe, Alice Obarah, yoo monna wa gagwe e bego e le molebeledi wa mosepedi tikologong ya rena, le yena o be a ithuta Beibele le nna. Batswadi ba-ka ba be ba nyaka gore ke be modiredi wa nako e tletšego. Lega go le bjalo, Mma o ile a šišinya gore ke hwetše thuto ya sekolo se phagamego pele.

Lega go le bjalo, ka ngwaga wa bo-16 ge ke se no thoma, ka bošilo ke ile ka dira segwera le bao ke tsenago le bona sekolo bao ba bego ba sa hlomphe melao ya motheo ya Beibele. Seo e bile phošo ya bošilo gakaakang! Go se go ye kae, ke ile ka thoma go kgoga le go itshwara ka tsela e gobogilego. Ke ile ka lemoga gore tsela ya-ka ya bophelo e be e sa dumelelane le tlhahlo yeo ke bego ke e hwetša dibokeng tša Bokriste, ka gona ke ile ka kgaotša go ya dibokeng le go tšea karolo bodireding bja ntlo le ntlo. Batswadi ba-ka ba ile ba nyamišwa ke seo, eupša ke be ke sa hlwe ke tshwenyega ka maikwelo a ba bangwe.

Ke Tloga Gae

Ka morago ga nywaga e mebedi feela ya sekolong se phagamego, ke ile ka tloga lapeng lešo gomme ka thoma go phela le bagwera ba kgaufsi le gagešo. Ka dinako tše dingwe ke be ke boela gae ke khukhuna, ke tšee dijo le ge e le dife tšeo ke bego nka kgona go di tšea gomme ke tšhabe. A gateletšegile, Tate o ile a kgaotša go ntefelela ditefo tša sekolo, a holofela gore ke tla fetoga.

Lega go le bjalo, mo e ka bago ka nako e swanago ke ile ka newa thušo ya tša ditšhelete. Mothekgi wa-ka o be a ntefelela ditefo tša-ka tša sekolo a le Scotland gomme ka dinako tše dingwe o be a nneela dimpho go akaretša le tšhelete. Ge nako e dutše e e-ya, mogolo’ake le moratho’ake le bona ba ile ba kgaotša go kopanela le Dihlatse tša Jehofa gomme tše ka moka tša nyamiša batswadi ba-ka o šoro. Mma o ile a ntelela ka makga a  mmalwa. Le ge se se ile sa ntira gore ke ikwe ke nyamile, ga se ka fetoša ditsela tša-ka.

Metseng e Megolo

Ka morago ga go fetša sekolo ka 1977, ke ile ka ya Lagos gomme ka hwetša mošomo. Kapejana ka morago ga moo, ke ile ka hwetša tšhelete ka tsela e sego ya molao ka reka thekisi. Ga bjale, ke e-na le tšhelete e oketšegilego, ke ile ka thoma go šomiša dihlare-tagi le go fetša nako e ntši ke le di-nightclub le mafelong a bagweba-ka-mmele. Go se go ye kae, bophelo bja kua Lagos bo ile bja thoma go nteša bodutu gomme ka 1981, ka hudugela London. Go tloga moo ka ya Belgium, moo ke ilego ka tsena diklase tša go ithuta Sefora e bile ke ilego ka šoma mošomo wa nakwana lebenkeleng la go jela. Lega go le bjalo, ke be ke fetša nako ya-ka e ntši ke romela dikoloi le didirišwa tša elektroniki Nigeria.

Tate o ile a ngwalela ofising ya lekala ya Dihlatse tša Jehofa ya kua Belgium, a kgopela gore ba ikgokaganye le nna gomme ba leke go ithuta le nna Beibele. Eupša nako e nngwe le e nngwe ge Dihlatse di e-tla ntlong ya-ka, ke be ke di raka. Ke ile ka thoma go tsena kereke moo re bego re tla ja, ra nwa, gape ra bapala dipapadi tše fapa-fapanego ka morago ga tirelo.

Bophelo Bjalo ka Morekiši wa Dihlare-tagi

Ka 1982, ke ile ka romela koloi e bitšago kudu ya mabonwa ka sekepe Nigeria gomme ka ya boema-kepe go kgonthišetša ka noši gore e fetile balefiši ba lekgetho. Balefiši ba Lekgetho ba Nigeria ba hweditše gore dipampiri tša bareki tša motšhelo e be e le tša bofora, ka gona ke ile ka golegwa matšatši a ka bago 40. Tate o ile a ntokolla ka peile. Ka ge ke be ke hloka tšhelete gore ke fetše molato, ke ile ka boela Belgium ke e-na le dithoto go akaretša le dikhilograma tše sego kae tša patše. Ka morago ga go lokollelwa molato wa go itirela dipampiri tša bareki tša motšhelo tša bofora, ke ile ka tsenela kgwebo ya go bapatša dihlare-tagi.

Leetong le lengwe ke ile ka golegwa Netherlands. Bahlankedi ba tša bofaladi ba ile ba nthomela morago ka go nnametša sefofane se se yago Nigeria. Ge re sa le leetong, ke ile ka kopana le barekiši ba bangwe ba dihlare-tagi gomme ra dira segwera sa go rekiša dihlare-tagi. Ka January 1984, ke ile ka hudugela nageng e nngwe ya Afrika. Ka ge ke be ke kgona go bolela Sefora, e lego leleme leo le bolelwago moo, kapejana ke ile ka kgona go dira segwera le maphodisa, mašole le bahlankedi ba tša bofaladi. Ka baka leo, re ile ra kgona go tliša dikhilograma tše dikete tša patše go tšwa ka ntle di e-tla ka nageng yeo.

Go Swarwa le go Golegwa

Ka gona ke ile ka tsena kotsing gape. Ke be ke rulagantše le molaodi wa madira gore a tlo nthuša go fetišetša dithoto tša-ka tša dihlare-tagi boema-fofaneng bja nageng yeo. Eupša o ile a se fihle ka nako gomme ka golegwa. Maphodisa a ile a mpetha leboelela gape a ntlaiša o šoro moo ke ilego ka idibala. Ba nkišitše sepetlele ba ntlogela gona moo ba nagana gore ke tla hwa. Eupša ke ile ka phela gomme go se go ye kae ka latofatšwa, ka bonwa molato ka ba ka golegwa.

Ge ke be ke e-tšwa kgolegong, mogwera wa-ka yo ke bego ke mo kgopetše go hlokomela ntlo ya-ka o be a rekišitše thoto ya-ka ka moka gomme a tsene bjang botala. Gore ke iphediše, gatee-tee ke ile ka thoma go rekiša patše. Lega go le bjalo, matšatši a lesome ka morago ke ile ka golegwa gape gomme ka tswalelelwa dikgwedi tše tharo. Nakong ya ge ke be ke lokolotšwe, ke be ke babja kudu moo gape ke ilego ka nyaka go hwa. Ka tsela e itšego ke ile ka kgona go boela Lagos.

“Kgwebong” Gape

Ke ile ka kopana gape le ba bangwe ba badirišani ba-ka kua Lagos gomme ra ya India, moo re ilego ra reka heroin ya theko e balelwago go $600 000. Go tloga Bombay (yeo ga bjale e bitšwago Mumbai) re ile ra ya Switzerland, ka morago Portugal gomme mafelelong ra ya Sepania. Yo mongwe le yo mongwe wa rena o ile a ba le poelo ya go bonagala gomme ra boela Lagos ka ditsela tše fapanego. Mafelelong ka 1984, ke ile ka rekiša morwalo o mongwe wa dihlare-tagi. Toro ya-ka e be e le go dira ditolara tše dimilione gomme ke dudišege kua United States.

Ka 1986, ke ile ka kgoboketša tšhelete ka moka yeo ke bego ke e-na le yona ka reka heroin e sa tswakwago le selo kua Lagos. Ke ile ka e iša nageng e nngwe, eupša moo e ile ya feleletša e le ka diatleng tša mogwebi wa megabaru yo a sa kago a ntefa bakeng sa yona. E le go tšhabiša bophelo bja-ka, ke ile ka boela Lagos ntle le go bolela selo ka seo se diregilego. Ke be ke hlakotšwe bobedi go tša ditšhelete le maikwelong. E le ka lekga la pele, ke ile ka dula fase gomme ka naganišiša ka morero wa bophelo. Ke ile ka ipotšiša gore, ‘Ke ka baka la’ng ke e-ba le dinako tše tša lethabo le tša mathata?’

Go Boela go Modimo

Ka moragonyana bošegong bjo bongwe, ke ile ka rapela Jehofa gore a nthuše. Go sa letelwa, mesong e latetšego monna yo a tšofetšego le mosadi wa gagwe ba ile ba kokota mojakong wa-ka. E be e le Dihlatse  tša Jehofa. Ke ile ka ba theetša ka kelohloko gomme ka amogela makasine. Ke ile ka hlalosa gore: “Batswadi ba-ka ke Dihlatse tša Jehofa.” “Alice Obarah o be a fela a ithuta Beibele le nna.”

Mokgalabje, P. K. Ogbanefe, o ile a araba ka gore: “Re tseba ba ga-Obarah gabotse. Ga bjale ba hlankela ofising ya rena ya lekala ya Nigeria kua Lagos.” Ba ile ba nkgothaletša go ba bona. Go kopana ga-ka le ba ga-Obarah go ile gwa nkgothatša kudu. Ka morago ga moo, Ngwanabo rena Ogbanefe o ile a thoma thuto ya Beibele le nna gomme go se go ye kae ke ile ka dira diphetogo tseleng ya-ka ya bophelo e gobogilego. Se se be se se bonolo ka gobane go šomiša ga-ka dihlare-tagi ka nako e telele go be go le thata go go fenya. Lega go le bjalo, ke be ke ikemišeditše go fetoša tsela ya-ka ya bophelo.

Lega go le bjalo, go be go e-na le diteko tše dintši le dikgateletšo! Bao e bego e le bagwera ba-ka ba be ba e-na le go tla ntlong ya-ka gomme ba dira dikholofetšo tše goketšago. Nakong e nngwe ke ile ka ba ka boela ka kgoga le go itshwara ka tsela e gobogilego. Ke ile ka tšhollela Modimo sa mafahleng ka thapelo. Go se go ye kae, ke ile ka tseba gore ka ge bagwera ba lefase ba ile ba mphapoša, nakong ye ba be ba ka se nthuše. Ke lemogile gore, e le gore ke gole moyeng ke be ke swanetše go tloga Lagos. Eupša ke be ke lešwa dihlong ke go boela gae Ilesha. Lega go le bjalo, mafelelong ke ile ka ngwalela tate le mogolo’ake lengwalo ka kgopela go boa gae.

Tate o ile a nkgonthišetša gore nka no boa gae ga go na bothata gomme mogolo’ake a re o tla nthuša ka tša ditšhelete. Ka gona, nywaga e lesome ke tlogetše batswadi ba-ka, ke ile ka boela gae. Ke ile ka amogelwa ka borutho. Mma o ile a bolela gore: “Ke a leboga, Jehofa!” Ge tate a fihla bošegong bjoo, o itše: “Jehofa o tla go thuša.” Re le lapa ka moka, o ile a rapela Jehofa gomme a Mo kgopela gore a nthuše ka ge bjale ke boile go tlo dira thato ya Gagwe.

Go Dira Seo ke Bego ke Swanetše go ba ke se Dira

Ke ile ka thomološa thuto ya-ka ya Beibele gomme ka dira tšwelopele ka go akgofa; ke ile ka kolobetšwa ka April 24, 1988. Gatee-tee ke ile ka ba mafolofolo kudu bodireding. Ka November 1, 1989, ke ile ka thoma go hlankela bjalo ka mmulamadibogo—e lego moebangedi wa nako e tletšego. Ka 1995, ke ile ka laletšwa go ba gona klaseng ya bo-lesome ya Sekolo sa Tlwaetšo ya Bodiredi kua Nigeria. Ke moka, ka July 1998, ke ile ka abelwa go ba molebeledi wa mosepedi, ke etela diphuthego tša Dihlatse tša Jehofa. Ngwaga ka morago, ke ile ka šegofatšwa ka Ruth, yo a ilego a ba mosadi wa-ka le modirišani wa-ka wa mosepedi.

Ka mo go swanago, ditho tše dingwe tša lapa lešo di dirile tšwelopele moyeng. Yo mongwe wa bagolo’ake yo le yena a bego a kgaoditše go hlankela Jehofa, o ile a boa gape borapeding bja therešo gomme a kolobetšwa. Ke thabetše gore Tate o ile a re bona re boa tseleng ya therešo. O hlanketše ka lethabo ka phuthegong e le mohlanka wa bodiredi go fihlela lehung la gagwe ka 1993 a e-na le nywaga e 75. Mma o sa tšwelapele a hlankela Jehofa ka mafolofolo kua Ilesha.

Ke ile ka sepela palo-moka ya dinaga tše 16 kua Yuropa, Asia, le Afrika ke nyakana le mahumo. Ka baka leo, ke ile ka itlhaba gohle ka mahloko a mantši. (1 Timotheo 6:9, 10) Ge ke lebelela morago, ke itshola kudu gore ke sentše nako e ntši ya mathomong a bophelo bja-ka ka dihlare-tagi le boitshwaro bjo bo gobogilego. Ke a itshola ka bohloko bjo ke bo baketšego Jehofa Modimo le lapa lešo. Lega go le bjalo, ke tloga ke leboga gore ke ile ka phela go fihlela bokgoleng bjoo ke ilego ka hlaphogelwa. Maikemišetšo a-ka ke go dula ke botegela Jehofa le go mo hlankela ka mo go sa felego.

[Mongwalo wa ka tlase]

[Seswantšho go letlakala 21]

A le mofsa yo a lego mahlalagading wa lerabele

[Seswantšho go letlakala 23]

Letšatšing la-ka la kolobetšo

[Seswantšho go letlakala 23]

Ke e-na le mosadi wa-ka, Ruth