Tumelo ya Ngwana

DUSTIN o ile a thoma go ba gona dithutong tše dingwe tša Beibele tšeo mmagwe a bego a di swarelwa ke yo mongwe wa Dihlatse tša Jehofa. Le ge a be a e-na le nywaga e 11 feela, o be a naganišiša kudu e bile a botšiša dipotšišo tše dintši tše di bontšhago gore o a nagana. Go se go ye kae o ile a ikgopelela thuto ya gagwe ka noši ya Beibele go kgaetšedi yoo e kilego ya ba moromiwa yo a bego a ithuta le mmagwe. E bile o ile a thoma go boledišana le bao a tsenago le bona sekolo ka seo a bego a ithuta sona.

Dustin o ile a thoma go ba gona dibokeng Holong ya Mmušo ya lefelong la gabo, e bile a nea dikarabo ge batheetši ba kgopelwa gore ba nee dikarabo. Ge yena le banyanana ba gagwe ba be ba etela tatagwe, tatagwe o ile a ba gapeletša gore ba ye kerekeng le yena. Dustin o ile a hlalosa gore ke ka baka la eng a rata go ya Holong ya Mmušo. Tatagwe o ile a kwešiša gomme a re o tla dumelela Dustin go ya fao.

Thapameng e nngwe ka morago ga go ba gona sebokeng Holong ya Mmušo, mmago Dustin o ile a se sa mmona. O be a boletše le molebeledi wa Sekolo sa Pušo ya Modimo ntle le go botša mmagwe, gomme a kgopetše go ngwadiša sekolong. Mmagwe o ile a dumela. Ka lethabo le legolo o be a fagahletše kabelo ya gagwe ya go bea polelo ya pele. Lega go le bjalo, ka yona nako yeo o ile a thoma go kwa bohloko bjo bogolo seropeng sa gagwe, ka baka leo a išwa go dingaka tše di fapa-fapanego gore di mo hlahlobe. Mafelelong, bošego bjo bohlokwa bja gore Dustin a bee polelo Holong ya Mmušo bo ile bja fihla. Ka nako yeo o be a sepela ka diphata. Gaešita le ge go be go le molaleng  gore o kwa bohloko, o ile a ya sethaleng a se a di swara.

Kapejana ka morago ga moo, go ile gwa hwetšwa gore Dustin o swerwe ke Ewing’s sarcoma, mohuta o sa tlwaelegago wa kankere ya marapo. O ile a fetša nako e ntši ya ngwaga o latetšego a le sepetleleng sa bana kua San Diego, California. Go alafša ka dikhemikhale, radiation le go kgaolwa ga leoto la gagwe le letona le lerapo la letheka le ka mohla ga se gwa fediša tumelo ya gagwe e tiilego le lerato la gagwe go Jehofa. Ge a be a fokola kudu mo a bego a palelwa ke go bala, mmagwe yoo a bego a dula le yena mo e ka bago dinako ka moka, o be a mmalela ka go hlaboša.

Gaešita le ge boemo bja Dustin bo ile bja gakala, ga se nke a belaela le ka mohla. O ile a dula a swaregile, a sepela-sepela ka setulo sa gagwe sa digole a kgothatša balwetši ba bangwe le batswadi ba bona go akaretša le molwetši yo e lego Hlatse. Bašomi ba sepetlele ba be ba bona gore Dustin le mofsa yoo wa Hlatse ba be ba sa swane le ba bangwe—le gore tumelo ya bona e be e ba matlafatša.

Dustin o be a nyaka go kolobetšwa. Ge a be a robetše sofeng, a fokola kudu moo a palelwago ke go dula, bagolo ba Bakriste ba ile ba ahla-ahla le yena dipotšišo tšeo di botšišwago bao ba nyakago go kolobetšwa ba Dihlatse tša Jehofa. Ka October 16, 2004, a e-na le nywaga e 12 le seripa, Dustin o ile a kolobetšwa kopanong ya tikologo.

Ge polelo ya kolobetšo e le kgaufsi le go thoma, Dustin o ile a kgorometšwa ka setulo sa gagwe sa digole tsejaneng yeo go sepelago batho e le gore a ye go dula le ba bangwe bao ba yago kolobetšong. Ge ba kgopelwa gore ba eme, Dustin o ile a emelela ka leoto la gagwe le tee, a apere sutu ya gagwe yeo a e ratago kudu, e bile a itshwareletše ka setulo bakeng sa go ithekga. O ile a araba dipotšišo tša kolobetšo ka lentšu la godimo le le le kwagalago. Ba gabo Dustin ka moka ba be ba le gona, go akaretša le tatagwe wa madi le mmagwe yo e sego wa madi. Bašomi ba sepetlele le batswadi ba bana ba bangwe ba lego sepetlele bao ba swerwego ke kankere le bona ba be ba le gona.

Letšatši ka morago ga go kolobetšwa ga Dustin, o ile a išwa sepetlele gape. Kankere e be e šetše e phatlaletše go fihla marapong ka moka a mmele wa gagwe. Ge a dutše a fokola le go feta gomme a e-kwa gore o kgaufsi le go hwa, o ile a botšiša mmagwe gore na ruri o be a le kgaufsi le go hwa. Mmagwe o ile a mmotšiša gore: “Ke ka kaba la’ng o botšiša, na o tšhaba go hwa?”

O arabile ka gore: “Aowa. Ke tlo fo tswalela mahlo a-ka, gomme ge ke a bula nakong ya tsogo, go tlo bonagala o ka re ke a tswaletše motsotswaneng o fetilego. Nka se hlwe ke e-kwa bohloko.” Ke moka o ile a hlalosa gore, “Ke no ba ke tshwenyegile ka lapa lešo.”

Dustin o ile a hwa kgweding e latetšego. Tirelong ya poloko ya gagwe go be go na le dingaka, baoki, malapa a bašomi ba sepetlele, barutiši, baagišani le ba lapa labo Dustin—ka moka bao e bego e le Dihlatse tša Jehofa le bao e bego e se tšona. Dustin o kgopetše gore ka moka bao ba bego ba tla ba gona tirelong ya gagwe ya segopotšo ba fiwe bohlatse bjo bobotse mabapi le ditumelo tša gagwe. Molebeledi wa Sekolo sa Pušo ya Modimo, yo a ilego a mo abela polelo feela yeo a ilego a kgona go e nea, o ile a nea polelo e kgothatšago le e matlafatšago tumelo go batho bao bontši bja bona bo ilego bja swanelwa ke go ema ka maoto.

Mangwalo a mabedi a mangwalo ao Dustin a bego a a rata a ile a gatišetšwa bao ba bego ba le gona tirelong ya gagwe ya segopotšo—Mateo 24:14 le 2 Timotheo 4:7. Tumelo ya gagwe e tiilego le go botega ga gagwe go kgothaditše bohle bao ba bego ba mo tseba. Re lebeletše pele go tlo mo amogela ge a tsoga nakong ya tsogo.—Ka ge go anega hlatse yeo e ithutilego le Dustin.

[Ntlhakgolo go letlakala 30]

“Ke lwele ntwa e botse, ke kitimile lebelo go fihla mafelelong, ke bolokile tumelo.”—2 Timotheo 4:7

[Seswantšho go letlakala 29]

Ka godimo: Dustin, nakong ya ge a be a sa phetše gabotse

[Seswantšho go letlakala 29]

Ka tlase: Ge Dustin a be a kolobetšwa a e-na le nywaga e 12 le seripa