Bafsa ba a Botšiša . . .

Ke Swanetše go Dira’ng ka Bophelo Bja-ka?

“Mathomong, ke be ke sa tshwenyege ka bokamoso. Eupša ge ke le kgaufsi le go aloga sekolong, ke ile ka lemoga gore bjale ke be ke tlo lebeletšana le ditherešo tša bophelo lefaseng la mešomo leo le nago le dikoloto.”—Alex, 17.

NA GE o be o sa le ngwana, o ile wa nagana gore o tla ba eng ge o gola? O ikwa bjang ka seo gona bjale? Na o tshwenyegile ka gore o tla iphediša ka’ng ge o šetše o godile? Ge e ba go le bjalo, ga se wena feela. Puku ya Career Coaching Your Kids e re: “Go dira phetho ya mabapi le mošomo ke e nngwe ya ditlhohlo tše dikgolo kudu tšeo bafsa ba lebeletšanago le tšona.”

Ka lehlakoreng le lengwe, o ka no ba o se wa tshwenyega gakaalo ka mošomo gona bjale. Mohlomongwe o tshwenyegile kudu ka go ithabiša. Go ithabiša ga go phošo, ka gore Beibele e re “ithabêlê O sa le bofseng bya xaxo.” (Mmoledi 11:9) Lega go le bjalo, se ke sebaka se sebotse sa go thoma go naganišiša ka seo o tlago go se dira ka bophelo bja gago. Diema 14:15 e re: “Mohlale ó hlatha dikxatô.” Ke bjang o ka hlathago dikgato tša gago?

“Tseba Moo o Lebilego Gona”

Akanya o rulaganya leeto leo le tlago go go tšea dikhilomithara tše dintši go tloga gae. Go molaleng gore o be o tla thoma ka go lebelela mmapa e le gore o kgethe tsela e kaone kudu. Se se swana le ge o rulaganya bokamoso bja gago. Michael, e lego lesogana leo ga bjale le hlankelago go le lengwe la makala a Dihlatse tša Jehofa, o re: “O na le dikgetho tše dintši tše fapa-fapanego.” O tla kgetha bjang e swanetšego gare ga tšona? Michael o fetola ka gore: “Go ithekgile ka dipakane tša gago.”

Nagana ka pakane e le bjalo ka lefelo leo o nyakago go fihla go lona. Ge e ba o ralala ka go hloka morero, o ka se ke wa e fihlelela. Ka tsela ya seswantšhetšo, go ka ba kaone go nthša mmapa gomme wa rulaganya tsela ya gago. Ka tsela ye o tla be o latela keletšo ya Diema 4:26 e rego: “Lekanya boxatô bya ’naô tša xaxo.” Contemporary English Version e fetolela mantšu ao ka gore: “Tseba moo o lebilego gona.”

Nywageng e latelago, o tla dira diphetho tše bohlokwa mabapi le borapedi, mošomo, lenyalo, lapa le ditaba tše dingwe tše bohlokwa. Ge e ba sa pele o tseba moo o lebilego gona o tla kgona go dira diphetho tše bohlale. Ge o dutše o rulaganya  tsela ya gago bophelong, go na le selo seo o ka se se tshedišego mahlo.

“Xopola Mmopi wa Xaxo”

Gore o thabe e le ka kgonthe, o swanetše go ela hloko mantšu a Kgoši e bohlale Salomo a rego: “Xopola Mmopi wa xaxo O sa le yo mofsa.” (Mmoledi 12:1) Kganyogo ya gago ya go thabiša Modimo e swanetše go tutuetša tsela yeo o e kgethago bophelong.

Ke ka ba la’ng seo se le bohlokwa? Go Kutullo 4:11, Beibele e re: “Jehofa, wena Modimo wa rena o swanelwa ke go amogela letago, kgodišo le matla, gobane o bopile dilo ka moka, gomme di bile gona le go bopša ka baka la thato ya gago.” Ee, dibopiwa ka moka legodimong le lefaseng di swanetše go leboga Mmopi. Na ga o leboge gore o go neile “bophelo le mohemo le dilo ka moka”? (Ditiro 17:25) Na ga o ikwe o gapeletšega go nea Jehofa Modimo se itšego e le go bontšha tebogo bakeng sa dilo ka moka tšeo a go diretšego tšona?

Bafsa ba bantši gare ga Dihlatse tša Jehofa ba ile ba kgetha tirelo ya nako e tletšego ka gobane ba dula ba gopola Mmopi wa bona. Therešo ke gore tirelo ya nako e tletšego ke pakane e hlomphegago gomme e tliša ditšhegofatšo tše dintši. (Maleaki 3:10) Eupša go nyakega gore o naganele pele. Ka mohlala ipotšiše gore, ‘Ke na le tsebo le bokgoni bofe tšeo nka tlago ka di diriša gore ke kgone go iphediša ge ke le tirelong ya nako e tletšego?’

Kelly, yo ga bjale a nago le nywaga e 27, o ile a thoma go rulaganya e sa le yo mofsa. O be a e-na le pakane ya go tsenela tirelo ya nako e tletšego. Mafelelong a nywaga ya gagwe ya mahlalagading, Kelly o ile a thoma “go itirela dithulaganyo” mabapi le mošomo. O re: “Ke  be ke swanetše go kgetha seo ke tlago go iphediša ka sona ge ke le tirelong ya-ka.”

Kelly o ile a ithutela go ba mothuši wa ngaka ya meno lenaneong la tlwaetšo ya mošomo sekolong se se phagamego. O ile a ba a thopa sefoka phadišanong ya mmušo. Eupša katlego ya gagwe ga se ya dira gore a lahlegelwe ke pono ka pakane ya gagwe ya bohlokwa. Kelly o re: “Tirelo ya nako e tletšego ke sona seo ke bego ke nyaka go se dira. Tše dingwe di be di latela ka morago.” Kelly o sa dutše a thabela tirelo ya nako e tletšego. O re: “Ke nagana gore ke phetho e botse kudu yeo ke ilego ka e dira.”

Kgopela Tlhahlo

Ge e ba o be o sepela lefelong leo o sa le tsebego, ke therešo gore ka dinako tše dingwe o be o tla kgopela tlhahlo, gaešita le ge o swere mmapa. O ka dira se se swanago ge o rulaganya bokamoso bja gago. Hwetša keletšo go ba bangwe. Diema 20:18 e re: “Maanô a thêkxwa ka keletšô.” Batswadi ba gago le bona ke mothopo wa kgonthe wa tlhahlo. O ka nyaka keletšo le go Bakriste ba godilego moyeng bao bophelo bja bona bo bontšhago gore ba na le bohlale bja Modimo. Roberto o kgothatša ka gore: “Lebelela ba godilego bao ba beago mohlala ka phuthegong ya geno goba diphuthegong tšeo di lego kgaufsi le ya geno. Ba ka go botša dilo tšeo o ka bago o sa di lemoge.”

Go feta motho le ge e le ofe, Jehofa Modimo o nyaka go go thuša go dira diphetho tše dibotse bophelong tše di tlago go go tlišetša lethabo le legolo. Ka gona mo kgopele gore a go thuše go ‘tšwela pele o hlatha seo thato ya gagwe e lego sona’ ka bokamoso bja gago. (Baefeso 5:17) Ge o bota Jehofa ka pelo ya gago ka moka, “ké mo Yêna a tl’o xo Xo thulêla tsela.”—Diema 3:5, 6.

Dihlogo tše dingwe tša “Bafsa ba a Botšiša . . . ” di ka hwetšwa go mokero wa Web wa www.watchtower.org/ypa

BAKENG SA GO NAGANIŠIŠA

▪ Ke tsebo le bokgoni bofe tšeo o nago le tšona?

▪ Na o ka nagana ka ditsela tšeo go ka dirišwago bokgoni bjo go tumiša Jehofa?

▪ Ke sebopego sefe se se kgethegilego sa tirelo ya nako e tletšego seo se ipiletšago go wena seo go boletšwego ka sona sehlogong se?

[Lepokisi go letlakala 16]

TSELA E NAGO LE MAFELELO A SA KGAHLIŠEGO

Beibele e re: “Bao ba ikemišeditšego go huma ba wela molekong le molabeng le dikganyogong tše dintši tša go hloka tlhaologanyo le tše gobatšago, tšeo di phonkgetšago batho tahlegong le tshenyegong.” Tsela ya go phegelela mahumo e tletše ka mathata! Mafelelong, e ka go lebiša dikolotong, ya baka dipelaelo le go wa moyeng.—1 Timotheo 6:9, 10.

[Lepokisi/Diswantšho go letlakala 17, 18]

BOBULAMADIBOGO

Mogoeledi wa mmulamadibogo ke Mokriste yo a kolobeditšwego yoo a beago mohlala, yo a rulagantšego go fetša diiri tše ka bago tše 70 kgwedi le kgwedi a bolela ditaba tše dibotse tša Mmušo wa Modimo. Ka tlwaetšo le phihlelo, babulamadibogo ba loutša bokgoni bja bona bjalo ka barutiši ba Beibele.

TIRELO YA BETHELE

Maloko a lapa la Bethele a hlankela makaleng a Dihlatse tša Jehofa, moo a thušago ka go beakanya, go tšweletša, le ka go romela dipuku tša Beibele. Kabelo e nngwe le e nngwe Bethele ke tokelo e kgethwa ya tirelo.

GO HLANKELA MOO GO NAGO LE TLHOKAGALO E KGOLO KUDU

Babulamadibogo ba bangwe ba kgona go hudugela moo go nago le tlhokagalo e kgolo kudu ya bagoeledi ba Mmušo. Ba bangwe ba ithuta leleme le lengwe gomme ba hlankela dinageng dišele goba phuthegong yeo e šomišago leleme leo.

TIRELO YA DITŠHABA-TŠHABA

Bahlanka ba ditšhaba-tšhaba ba ya dinageng tše dingwe gore ba thuše go aga Diholo tša Mmušo le meago ya makala. Se ke se sengwe sa dibopego tša tirelo e kgethwa seo se swanago le modiro wa bao ba ilego ba aga tempele ya Salomo.—1 Dikxoši 8:13-18.

SEKOLO SA TLWAETŠO YA BODIREDI

Thuto ya dibeke tše seswai e tlwaetša bagolo le bahlanka ba bodiredi ba swanelegago bao ba sego lenyalong dithulaganyo tša mokgatlo le go bolela phatlalatša. Dialoga tše dingwe di abelwa go hlankela nageng ya gabo tšona, tše dingwe di amogela kabelo ya go hlankela dinageng dišele.

TIRELO YA BOROMIWA

Babulamadibogo ba swanelegago le bao ba phetšego gabotse ebile ba e-na le maatla ba tlwaeletšwa tirelo gore ba yo hlankela dinageng dišele. Baromiwa ba phela maphelo a thabišago le a kgotsofatšago.

[Lepokisi/Seswantšho go letlakala 17]

KE TLA DIRANG KA BOPHELO BJA-KA?

Bidio ye yeo e tšweleditšwego ke Dihlatse tša Jehofa, e akaretša dipoledišano le bafsa ba tšwago Brazil, Brithania, Jeremane, le United States. Go se go ye kae e tla hwetšagala ka maleme a mantši.

[Seswantšho go letlakala 16]

“Go ithekgile ka dipakane tša gago.”—Michael, leloko la lapa la Bethele

[Seswantšho go letlakala 17]

“Ke phetho e botse kudu yeo ke ilego ka e dira.”—Kelly, yo a nago le nywaga e tshela e le mmulamadibogo.

[Seswantšho go letlakala 18]

“Lebelela bao ba beago mohlala o mobotse.”—Roberto, leloko la lapa la Bethele