Pono ya Beibele

Na Jesu Ruri e be e le Morwa wa Modimo?

MOAPOSTOLA Petro o ile a botša Jesu a kgodišegile gore: “Ke wena Kriste, Morwa wa Modimo yo a phelago.” (Mateo 16:16) Temana ye ke e tee feela ya tše dintši ka Beibeleng tšeo di šupago Jesu e le Morwa wa Modimo, e lego polelwana yeo e hlohleleditšego batho ba sekametšego bodumeding gore ba be le dipono tše di sa swanego ka yena.

Batho ba bantši bao ba dumelago gore Jesu Kriste ke Modimo ba thatafalelwa ke go hlalosa gore ke ka baka la eng a bitšwa Morwa wa Modimo. Motho yo a naganago gabotse o tla bona gore ga go kgonege gore Jesu a be batho ba babedi. Ba bangwe ba nagana gore Jesu e be e le feela motho wa bohlokwa historing, monna yo bohlale goba mohlomongwe moporofeta wa kgonthe wa Modimo. Ke’ng seo ge e le gabotse Beibele e se rutago? Na seo o se dumelago ka Jesu se bohlokwa?

Leitšibulo la Modimo

Beibele e bontšha gore go bile le nako yeo Modimo a bego a le noši. Ge a bontšha lerato la gagwe o ile a dira phetho ya go ba tate ka go fana ka mpho ya bophelo, gomme seo ga se a se dira ka tsela ya batho. Go e na le moo, o ile a diriša matla a gagwe a sa hlalosegego a go bopa ka go hlola motho yo a phelago yo a hlalefilego kudu wa moya—“mathomo a tlholo ya Modimo,” yoo ga bjale re mo tsebago e le Jesu Kriste. (Kutollo 3:14; Diema 8:22) Ka ge Jesu a bopilwe ke Modimo nakong ya ge Modimo a le noši, o bitšwa ka mo go swanetšego gore ke “morwa yo a tswetšwego a nnoši” le “leitšibulo la tlholo yohle.”—Johane 1:14; Bakolose 1:15.

Ka gona, go molaleng gore ka ge e le tlholo ya pele-pele ya Modimo, Jesu go ka se kgonege gore e be Mmopi, yena “Modimo a nnoši.” (1 Timotheo 1:17) Ka lehlakoreng le lengwe, Modimo o ile a nea Morwa wa gagwe ditokelo tše dintši. Ka mohlala, Modimo o ile a diriša Jesu go bopa “dilo tše dingwe ka moka,” go akaretša le barongwa. Barongwa ba ba bitšwa ‘bana ba Modimo,’ ka ge le bona Jehofa e le Monei-Bophelo wa bona.—Bakolose 1:16; Jobo 1:6; 38:7.

 Ka morago ga gore Modimo a lokišetše lefase gore le tle le dulwe ke batho, go bonagala a be a bolela le Morwa wa gagwe wa leitšibulo ge a be a re: “A re direng motho ka xo swanthša ka rena.” (Genesi 1:26; Diema 8:22-31) Ka baka leo, Jehofa o ile a bopa morwa wa Modimo wa pele yo e lego motho, Adama, a diriša sebopiwa sa moya seo se bego se tla bitšwa Jesu.—Luka 3:38.

Jesu e ba Morwa wa Modimo yo e Lego Motho

Moapostola Johane o utolla gore ka nako e beilwego, Morwa wa Modimo wa moya “e bile nama, a tla a dula le rena.” (Johane 1:14) E le gore Modimo a dire phetogo ye, ka tsela ya mohlolo, o ile a fetišetša bophelo bja Jesu go tšwa legodimong go ya popelong ya kgarebe ya Mojuda yeo e bitšwago Maria. Ka yona tsela yeo, Jesu o ile a dula e le Morwa wa Modimo gaešita le ge e be e le motho wa nama. Go oketša moo, ka ge go se motho yo mongwe ge e se Modimo yo a filego Jesu bophelo, Jesu o ile a belegwa a phethagetše a se na sebe. Morongwa Gabariele o ile a botša Maria gore, “yo a tlago go belegwa o tla bitšwa yo mokgethwa, Morwa wa Modimo.”—Luka 1:35; Baheberu 7:26.

Tiišetšo ya gore Jesu ke morwa wa Modimo nakong ya ge e be e le motho wa nama e ile ya tšwa go Tatagwe ka boyena. Nakong ya go kolobetšwa ga Jesu, Johane Mokolobetši o ile a bona magodimo a bulega gomme a kwa lentšu le e-tšwa legodimong le re: “Yo ke Morwa wa-ka, morategi, yo ke mo amogetšego.” (Mateo 3:16, 17) Ga go makatše ge Johane a ile a botša barutiwa ba gagwe gore: “Ke bone seo, gomme ka hlatsela gore yo ke yena Morwa wa Modimo.”—Johane 1:34.

Nakong ya bodiredi bja gagwe bja lefaseng, Jesu ga se nke a letša phalafala ya go bega gore yena ke Mesia Morwa wa Modimo. (Mareka 8:29, 30) Gantši o be a dumelela batho gore e be bona ba fihlelelago phetho yeo ka bobona ka gore ba theetše dithuto tša gagwe, ba ithute tsela ya gagwe ya bophelo le go bona mehlolo ya gagwe e mentši, yeo bontši bja yona e bego e dirwa phatlalatša. Ka mohlala, o ile a fodiša “ka moka bao ba bego ba sa ipshine, ba tlaišwa ke malwetši le mahloko a fapa-fapanego.” (Mateo 4:24, 25; 7:28, 29; 12:15) Difofu, difoa, digole le ba nago le malwetši ka moka ba ile ba tla go Jesu, gomme a ba fodiša. O ile a ba a tsoša le bahu! (Mateo 11:4-6) Ka tsela ya mohlolo Jesu o ile a sepela godimo ga meetse gomme a homotša diphefo le maphoto nakong ya ledimo le matla barutiwa ba gagwe ba lebeletše. Pontšho ye ya go ba le matla e ile ya tutueletša barutiwa gore ba re: “Ruri o Morwa wa Modimo.”—Mateo 14:24-33.

Kamoo Morwa wa Modimo a ka go Holago ka Gona

Ke ka baka la’ng Modimo a ile a fetišetša Morwa wa gagwe yo a tswetšwego a nnoši go tšwa legodimong go ya lefaseng, e le gore a tle a hwe lehu le sehlogo? “Gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.” (Johane 3:16) Ee, ke feela ka go hwa moo Jesu a bego a ka “nea moya wa gagwe gore e be topollo bakeng sa ba bantši.” (Mateo 20:28) Ke therešo gore historing ka moka, ga go motho yo a bontšhitšego lerato le legolo kudu go batho go feta Jehofa le Morwa wa gagwe wa leitšibulo.—Baroma 8:32.

Ka morago ga lehu la gagwe, Jesu o ile “a bolelwa e le Morwa wa Modimo” ka tsela e kgethegilego le e matla, “ka go tsoga bahung” le go boela bophelong bja gagwe e le Morwa wa Modimo wa moya. (Baroma 1:4; 1 Petro 3:18) Ke moka, ka morago ga gore a lete ka go se fele pelo a dutše kgaufsi le Tatagwe mo e ka bago nywaga-kgolo e 19, Jesu o ile a bewa e le Kgoši ya Mmušo wa Modimo—mmušo wa legodimong woo kgaufsinyana o tlago go buša godimo ga lefase ka moka.—Psalme 2:7, 8; Daniele 7:13, 14.

Na o nyaka go amogelwa ke Morwa yo yo matla wa Modimo? Ge e ba go le bjalo, re go kgothaletša gore o hlahlobe dithuto tša gagwe gomme o di diriše bophelong bja gago. Jesu ka boyena o boletše gore: “Se se bolela bophelo bjo bo sa felego, gore ba hwetše tsebo ka wena Modimo a nnoši wa therešo le ka yo o mo romilego, Jesu Kriste.” (Johane 17:3) Ke therešo gore seo motho a se dumelago ka Morwa wa Modimo ruri se tloga se le bohlokwa!—Johane 3:18; 14:6; 1 Timotheo 6:19.

NA O KILE WA IPOTŠIŠA?

▪ Ke bjang Jesu e lego Morwa wa Modimo yo a tswetšwego a nnoši?—Johane 1:3, 14; Kutollo 3:14.

▪ Ke ka baka la’ng o ka dumela gore Jesu ke Morwa wa Modimo?—Mateo 3:16, 17.

▪ O ka holwa bjang ke go dumela gore Jesu ke Morwa wa Modimo?—Johane 3:16; Johane 14:6; 17:3.

[Diswantšho go letlakala 30, 31]

Dithuto tše di holago tša Jesu le mehlolo ya gagwe e matla di hlatsetše gore e be e se motho feela yo a tlwaelegilego