Sekolo sa Bo-mapimpana Seo se se Nago Dibapadišwa

KA MONGWADI WA PHAFOGA! KUA JEREMANE

Mesong e mengwe ge bana ba tsena ka diphapošing tša sekolo sa bo-mapimpana, ba ile ba hwetša go se na selo go šetše feela fenitšhara. Ba ile ba tsena gare ka go tsoma dipopi, dibapadišwa le diphoofolo tša go bapala tšeo di dirilwego ka mašela eupša ba se hwetše selo. Go be go se na dipuku goba tšona dilwana tša go aga. Gaešita le dipampiri le dikero di be di se gona. Dibapadišwa ka moka di be di tlošitšwe gomme di be di ka se be gona go fihlela ka morago ga dikgwedi tše tharo. Go be go diragetše’ng?

Sekolo se sa bo-mapimpana ke se sengwe sa dikolo tše di thomago go tuma kua Austria, Jeremane le Switzerland tšeo di tšeago karolo lenaneong le le makatšago leo le tlišago dikgopolo tše difsa le le bitšwago Sekolo sa Bo-mapimpana Seo se se Nago Dibapadišwa. Gaešita le ge lenaneo le, leo le ilego la bolelelwa kudu ke ditsebi tša tša maphelo tša European Union le makatša, morero wa lona ke go thibela bana gore e se be makgoba a dilo tše itšego. Nywageng ya morago bjale, banyakišiši ba ile ba lemoga gore batho ga ba nwelele kudu temalelong ya mohuta le ge e le ofe ge e ba ba hlagolela bokgoni bja go ikgokaganya le batho ba bangwe e sa le ba banyenyane. Pego ya kuranta e re lenaneo le le akaretša “bokgoni bja poledišano le gore go be bonolo go boledišana le ba bangwe, go rarolla dikgohlano, go rwala boikarabelo ka seo motho a se dirago, go ipeela dipakane, go lemoga mathata, go hwetša thušo le go hwetša tharollo.” Go ya ka bao ba thomilego lenaneo le, bokgoni bjo bo bjalo bo swanetše go hlagolelwa ka pela ka mo go ka kgonegago, gomme nako yeo ya go se be gona ga dibapadišwa e reretšwe sona se, go ba kgothaletša go tla ka dikakanyo tše difsa le go ba le boikholofelo.

Go se be gona ga dibapadišwa ka dikgwedi tše tharo, go ile gwa rulaganywa gabotse gomme gwa boledišanwa ka gona le batswadi gotee le bana. Mathomong, bana ba bangwe ga ba kgone go dira selo ntle le dibapadišwa. Pego e bolela gore e bile barulaganyi ba tlalelong, “go na le dikolo tša bo-mapimpana tšeo go tšona dibekeng tše nne tša mathomo bana ba sa laolegego.” Eupša bana ba ithuta go tlwaela gomme ba tla ka dikakanyo tše difsa. Ka ge bana ba se na dibapadišwa tše ba ka bapalago ka tšona, ba kgona go boledišana, go rulaganya le go bapala kudu ba le gotee gomme se se kaonefatša mokgwa wa bona wa go ikgokaganya le ba bangwe le bokgoni bja bona bja go bolela. Bana ba bangwe bao ba bego ba tlwaetše go hlokomologa ba bangwe ka go dula ba bapala ka dibapadišwa, bjale ba thoma go ba le bagwera. Batswadi le bona ba lemogile gore go na le diphetogo tše dibotse. Ba boletše gore bana ba be ba itshwara gabotse ge ba bapala gomme ba be ba kgona go tla ka dikakanyo tše difsa go feta pele.