E ba Bo-mma e sa le ka Pela

“Lesogana la-ka le be le kgahliša. Le be le e-na le tšhelete gomme re be re kgona go ya mafelong a mantši go yo ithabiša. Ge ke be ke fetwa ke kgwedi, ke ile ka lemoga gore go be go na le bothata. Ke be ke tla re’ng go mma? Se se be se ka ntiragalela bjang? Ke be ke e-na le nywaga e 16 feela gomme ke sa tsebe gore ke dire eng.”—Nicole.

LEHONO Nicole * yo a lego nywageng ya gagwe ya magareng ya bo-30, ke mma wa bana ba bararo yo a nago le boikholofelo le yo mafolofolo. Ngwana wa gagwe yo mogolo o na le nywaga e 20. Ee, nywageng e fetilego o be a le gare ga bafsa ba imilego bao ba lego mahlalagading ba dimilione bao ba sa nyalwago. Go swana le bo-mma ba bangwe bao e lego bafsa ba lego mahlalagading, o ile a ikhwetša a le ka gare ga leraga la ditlhohlo tše di boifišago, diphetho tše boima le ditebelelo tšeo di sa kgonthišetšwago.

Nicole ga a bolele kudu ka letšhogo, go se dumele boemo bjo a bego a le go bjona, go boifa, go galefa le go tlalelwa e lego dika tšeo di ilego tša swaya nywaga ya gagwe ya mafelelo ya mahlalagading—nako yeo dithaka tša gagwe di bego di tshwenyega ka diaparo le dintlha tša bona tša sekolong. Lega go le bjalo, boemo bja Nicole bo be bo sa fifala ka mo go feletšego. O be a e-tšwa lapeng le le nago le lerato leo le bego le lekile go bjala ka go yena melao ya motheo e phagamego ya boitshwaro. Gaešita le ge ka nakwana a ile a kgetha go se latele melao yeo ya motheo—gomme a lebeletšana le ditla-morago—ka morago, yona melao yeo ya boitshwaro e ile ya mo dira gore a phele bophelo bjo bo kgotsofatšago le bjo bo nago le morero. Moano wa gagwe e ile ya ba o rego, “Motho ga a lahle kholofelo.”

Ka manyami, ga se mma yo mongwe le yo mongwe yo e lego mofsa yo a lego mahlalagading a nago le lapa leo le mo thekgago—goba pono e bjalo e nago le kholofelo. Go se go ye kae ba bantši ba ikhwetša ba tantšwe boemong bjo bo bonagalago bo se na kholofelo bja bodiidi. Ba bangwe ba swanelwa ke go lebeletšana le maikwelo a bohloko a go katwa le a bošoro.

Ga go le setee sa dilo tše seo se theago motheo o mobotse bakeng sa bana ba bo-mma bao e lego bafsa ba mahlalagading. Puku ya Teen Moms—The Pain and the Promise e bolela gore bana ba bo-mma bao e lego bafsa ba mahlalagading “ba sekametše go beng le boima bjo bo fokolago nakong ya ge ba belegwa, malwetši a oketšegilego a bjaneng, go hwa e sa le masea, tlhokomelo ya tša kalafo e fokolago, ba tlaišwa ke tlala le phepo-mpe; ba lebana le bošoro bjo bo oketšegilego gomme ba gola ka go nanya ge ba bapetšwa le bana bao ba belegwego ke bo-mma bao ba godilego.” Ka kgonthe, go na le kgonagalo e kgolo ya gore barwedi ba bo-mma bao e lego bafsa ba mahlalagading le bona e tla ba bo-mma ba sa le mahlalagading ge ba bapetšwa le bana bao ba belegwego ke bo-mma bao ba godilego.

Boimana bja bafsa bao ba lego mahlalagading bo apareditše gakaaka’ng? Bo-mma bao e lego bafsa ba mahlalagading ba ka lebeletšana bjang ka katlego le ditlhohlo tša go godiša masea a bona? Na go na le tsela le ge e le efe ya go thuša bafsa go phema go wela bothateng bjo bjo bo boifišago di sa tloga fase? Dihlogo tše di latelago di ahla-ahla dipotšišo tše.

[Mongwalo wa ka tlase]