Kamoo o ka Bago Tate yo Botse ka Gona

SEHLOGO se se lego makasineng wa Economist seo se bolelago ka go phuhlama ga bophelo bja lapa, se be se thoma ka taba e tanyago kgahlego e rego: “Go dira bana go bonolo, eupša go ba tate yo lerato ga go bonolo.”

Le ge dilo tše dintši bophelong go le thata go di dira, e nngwe ya dilo tše thata kudu—e bile e le e bohlokwa kudu—ke go ba tate yo lerato. Tate yo mongwe le yo mongwe o swanetše go nyaka go ba tate yo lerato, ka ge bophelo bjo bobotse bja lapa la gagwe gotee le lethabo la lona di le kotsing.

Lebaka Leo ka Lona go Sego Bonolo

Go bolela therešo feela, lebaka le legolo leo le dirago gore go ba tate yo botse go se be bonolo ke go se phethagale mo go abetšwego—ga batswadi le ga bana. Beibele e re: “Diakanyô tša pelo ya motho [ke] tše mpe xo tloxa byaneng bya xaxwe.” (Genesi 8:21) Ka gona, mongwadi wa Beibele o ile a dumela ka gore: “Mmê ó nkamoxetše kè le wa dibe.” (Psalme 51:5; Ba-Roma 5:12) Tshekamelo ya go dira bobe ka baka la sebe seo se abetšwego ke tšhitišo yeo e dirago gore go ba tate yo botse go be thata.

Lefase le goba tshepedišo ye ya dilo le yona ke tšhitišo e kgolo. Ke ka baka la’ng go le bjalo? Ka gobane go etša ge Beibele e hlalosa, “lefase ka moka le rapaletše matleng a yo kgopo,” yo a bitšwago “Diabolo le Sathane.” Beibele e bitša Sathane gape ka gore ke “modimo wa lefase lé.” Ga go makatše ge Jesu a be a bolela gore balatedi ba gagwe ba swane le yena ka go se be ba “lefase.”—1 Johane 5:19, NW; Kutollo 12:9; 2 Ba-Korinthe 4:4; Johane 17:16.

Sa bohlokwa ke gore gore motho e be tate yo botse o swanetše go dula a gopola go se phethagale ga rena mo re go abetšwego, Sathane Diabolo gotee le lefase le le le laolwago ke yena. Ditšhitišo tše ga se tšeo di inaganelwago. Ke tša kgonthe! Eupša monna a ka hwetša kae tsebišo ya kamoo a ka di fenyago ka gona le kamoo e ka bago tate yo botse?

Mehlala ya Legodimong

Bakeng sa gore tate a hwetše thušo ya kamoo a ka fenyago mapheko ao go boletšwego ka ona ka mo godimo, a ka ya Beibeleng. E hupere mehlala e mebotse. Jesu o ile a bolela ka o mongwe o phalago yohle ge a be a ruta barutiwa ba gagwe go rapela ka gore: “Tata-wešo wa maxodimong!” (Mongwalo o sekamego ke wa rena.) Beibele ge e hlalosa Tatago rena wa magodimong e fo re: “Modimo ké Yêna leratô.” Tate yo e lego motho o swanetše go lebelela bjang mohlala wo? Moapostola Paulo o ile a kgothatša ka gore: “Bang baetši ba Modimo . . . le  tšeê ka tsela ya leratô.”—Mateo 6:9, 10; 1 Johane 4:8; Ba-Efeso 5:1, 2.

Ge e ba o le tate, nagana ka seo o ka ithutago sona tiragalong e tee feela ya ge Modimo a be a dirišana le Jesu, Morwa’gwe. Mateo 3:17 e re botša gore ge Jesu a be a kolobetšwa, lentšu la Modimo le ile la kwewa go tšwa kua legodimong le re: “Yêna-yό ké Yêna Morwa-moratwa wa-ka, yo ke kxahlwaxo ke Yêna.” (Mongwalo o sekamego ke wa rena.) Re ka ithuta’ng go se?

Sa mathomo, nagana kamoo ngwana a ikwago ka gona ge tatagwe a botša motho yo mongwe ka boikgantšho gore, ‘Yo ke morwa’ka’ goba ‘Yo ke morwedi’aka.’ Bana ba gola gabotse ge batswadi ba ba šetša, kudu-kudu ge ba retwa ka baka la selo se sebotse seo ba se dirilego. Mohlomongwe ngwana a ka tutueletšega go leka ka matla bakeng sa go iponagatša a swanelwa ke theto.

Sa bobedi, Modimo o ile a bontšha kamoo a ikwago ka gona ka Jesu, a bolela ka yena e le “morwa-moratwa.” Mantšu ao a bontšhago lerato a tšwago go Tatagwe a swanetše go ba a ile a thabiša Jesu kudu. Bana ba gago le bona ba tla kgothatšega ge e ba o ba bontšha gore o tloga o ba rata ka mantšu a gago, ka go ipha nako ya bona, ka go ba šetša le ka go kgomega ka bona.

Sa boraro, Modimo o ile a botša Morwa wa gagwe gore: “Ke go amogetše.” (Mareka 1:11, NW) Seo le sona ke selo se bohlokwa kudu seo tate a swanetšego go se dira, e lego gore a botše bana ba gagwe gore ba a mo kgahliša. Therešo ke gore ngwana le yena o tla tšama a dira diphošo. Ka moka ga rena re dira diphošo. Eupša bjalo ka tate, na o dira boiteko bja go hwetša dibaka tša go reta ngwana wa gago ge e ba dilo tšeo a di dirago goba a di bolelago di kgahliša?

Jesu o ile a ithuta gabotse go Tatagwe wa legodimong. Ge a sa le mo lefaseng, o ile a bontšha ka mantšu le ka go bea mohlala kamoo Tatagwe a ikwago ka gona ka bana ba Gagwe ba mo lefaseng. (Johane 14:9) Gaešita le nakong ya ge Jesu a be a swaregile e bile a gateletšegile, o ile a ipha nako ya go dula fase ke moka a bolele le bana. O ile a botša barutiwa ba gagwe gore: “Lesang bana ba tlê xo Nna; Le se kê la ba thibêla.” (Mareka 10:14) Lena bo-tate, na le ka latela mohlala wo o beilwego ke Jehofa Modimo le Morwa wa gagwe ka botlalo?

Mohlala o Mobotse o Bohlokwa Kudu

Go bohlokwa kudu gore o beele bana ba gago mohlala o mobotse. Boiteko bja gago bja “xo ba etetša ka xo ba ruta le xo ba eletša tša Morêna” mohlomongwe bo ka se šome gakaalo ge e ba wena ka noši o sa ikokobeletše tayo ya Modimo e bile o sa dumelele bophelo bja gago go laolwa ke yona. (Ba-Efeso 6:4) Lega go le bjalo, ka thušo ya Modimo o ka fenya lepheko le ge e le lefe e le gore o phethagatše taelo ya gagwe ya gore o hlokomele bana ba gago.

Nagana ka mohlala wa Viktor Gutshmidt, e lego yo mongwe wa Dihlatse tša Jehofa kua nageng yeo  e kilego ya ba Soviet Union. Ka October 1957 o ile a ahlolelwa go dula nywaga e lesome kgolegong ka baka la go bolela ka tumelo ya gagwe. O ile a tlogela barwedi ba babedi gotee le mosadi wa gagwe, Polina. Ge a le kgolegong, o be a dumeletšwe go ngwalela lapa la gagwe mangwalo eupša a thibetšwe go bolela selo le ge e le sefe ka Modimo goba ka taba e kgomago bodumedi. Gaešita le ge a be a lebeletšane le bothata bjo, Viktor o be a ikemišeditše go ba tate yo botse, gomme o be a tseba gore go ruta bana ba gagwe ka Modimo e be e le selo sa bohlokwa kudu. Ka gona, o ile a dira’ng?

Viktor o anega ka gore: “Ke ile ka hwetša taba ka makasineng wa Soviet wa Young Naturalist le wa Nature. Ke ile ka thala diswantšho tša diphoofolo le batho godimo ga diposkarata gomme ka ngwala le kanegelo goba phihlelo ka ga tlhago.”

Polina o re: “Gatee-tee ge re be re hwetša diposkarata tše, re be re di tswalanya le ditaba tša ka Beibeleng. Ka mohlala, ge di be di akaretša botse bja tlhago, dithokgwa goba dinoka, ke be ke bala Jesaya kgaolo 65 yeo e bolelago ka kholofetšo ya Modimo ya go dira lefase gore e be paradeise.”

Morwedi wa Viktor e lego Yulia o a anega: “Ke moka mma o be a tla rapela le rena, gomme re be re lla. Dikarata tše di ile tša bapala karolo e kgolo kgodišong ya rena.” Polina o bolela gore ka baka la seo, “banenyana ba ile ba rata Modimo kudu go tloga bjaneng.” Ga bjale boemo bja lapa ke bofe?

Viktor o hlalosa gore: “Bjale barwedi ba-ka ka bobedi ba nyetšwe ke bagolo ba Bakriste gomme bobedi bja bona ba na le malapa a tiilego moyeng ao a nago le bana ba hlankelago Jehofa ka potego.”

Go bea mohlala o mobotse gantši ga go nyake gore motho a be le bohlale bja go hlama dilo feela, eupša go nyaka le gore a dire boiteko bjo bogolo. Dipelo tša bana mohlomongwe di tla kgomega ge ba bona tatago bona a leka ka matla. Morwa yoo a feditšego nywaga e mentši a le bodireding bja nako e tletšego o ile a bolela ka tatagwe ka tsela ya go mo leboga a re: “Ka dinako tše dingwe tate o be a boa mošomong a lapile kudu mo e lego gore o be a otsela, eupša re be re tla swara thuto ya rena ya Beibele go sa šetšwe seo, gomme se se ile sa re thuša go lemoga kamoo thuto ya lapa e lego bohlokwa ka gona.”

Go molaleng gore go bea mohlala o mobotse—bobedi ka mantšu le ka ditiro—ke selo sa bohlokwa kudu bakeng sa gore motho e be tate yo botse. O swanetše go dira bjalo ge e ba o nyaka go bona therešo ya seema sa Beibele se se rego: “Ngwana mo eteletše tsela y’axwe; ké mo a tl’o xo tšofala à sa ka a e lahla.”—Diema 22:6.

Ka gona, gopola gore seo o se bolelago ga se sona feela selo sa bohlokwa; sa bohlokwa kudu-kudu ke seo o se dirago—e lego mohlala woo o o beago. Setsebi se sengwe sa Canada sa mabapi le thuto ya bjaneng se ngwadile gore: “Tsela e kaone kudu yeo ka yona re ka dirago gore bana ba rena ba itshware gabotse [ka tsela yeo re tlago go e rata] ke gore rena ka noši re itshware ka yona tsela yeo.” Ke therešo gore ge e ba o nyaka gore bana ba gago ba rate dilo tša moya, go bohlokwa gore le wena ka noši o di rate.

Iphe Nako ya Bona!

Bana ba gago ba swanetše go bona mohlala wa gago o mobotse. Seo se bolela gore o swanetše go  fetša nako o e-na le bona—nako e ntši kudu, e sego go fo betha mabala a nkwe. Ka bohlale theetša keletšo ya Beibele ya go ‘thakanela sebaka,’ ke gore, go tlogela dilo tše e sego tša bohlokwa gakaalo bakeng sa gore o be le bona. (Ba-Efeso 5:15, 16) Ge e le gabotse ke’ng seo se lego bohlokwa go feta bana ba gago? Na ke go ba le TV e kgolo, ditlabakelo tša go bapala kolofo, ntlo e botse goba mošomo wa gago?

Go na le seema se se tlwaelegilego se se rego, ‘Tloga-tloga e tloga kgale, modiši wa kgomo o tšwa natšo šakeng.’ Bo-tate bao bana ba bona ba llwego ke bophelo bja boitshwaro bjo bo gobogilego goba gaešita le mokgwa wa go phela wo o sa kgothaletšego dilo tša moya, gantši ba itshola o šoro. Ba lla ka gore ba ile ba palelwa ke go ipha nako kgafetša-kgafetša ya go ba le bana ba bona ba banyenyane nakong ya ge ba be ba nyaka tatago bona e le ka kgonthe.

Gopola gore nakong ya ge bana ba gago e sa le ba banyenyane ke nako yeo o swanetšego go nagana ka ditla-morago tša dikgetho tšeo o di dirago. Beibele e bitša bana ba gago gore “ké neô ya Morêna,” e lego selo seo Modimo ka boyena a go gafetšego sona. (Psalme 127:3) Ka gona, le ka mohla o se ke wa lebala gore o ikarabelela go Modimo ka bona!

Thušo e a Hwetšagala

Tate yo botse o fagahlela go hwetša thušo yeo e tlago go hola bana ba gagwe. Ka morago ga ge morongwa a boditše mosadi wa Manoa gore o be a tla belega ngwana, Manoa o ile a rapela Modimo a re: “A kê a boêlê a tlê xo rena, a re rutê ka mo re swanetšexo xo dira lesoxanyana leo le tl’o xo bêlêxwa.” (Baahlodi 13:8, 9) Bjalo ka batswadi ba lehono, Manoa o be a nyaka thušo ya mohuta ofe? Anke re boneng.

Brent Burgoyne yoo e lego morutiši Yunibesithing ya Cape Town mo Afrika Borwa o boletše gore: “E nngwe ya dimpho tše dikgolo tšeo motho a ka di neago ngwana ke go mo ruta melao yeo a swanetšego go phela ka yona.” Taba ya gore bana ba swanetše go rutwa melao e bjalo e ka bonwa pegong e lego ka go Daily Yomiuri ya kua Japane, yeo e boletšego gore: “Nyakišišo e bontšha gore bana ba tekanyo ya 71 lekgolong ba Majapane ga se ba ka ba laiwa le ka mohla ke bo-tatago bona gore ba se ke ba bolela maaka.” Na mantšu ao ga a nyamiše?

Ke mang yo a ka rutago melao e botegago yeo go swanetšwego go phelwa ka yona? Ke yena yo a ilego a nea Manoa tlhahlo—e lego Modimo ka boyena! Modimo o ile a romela Morwa wa gagwe yoo a rategago e lego Jesu bakeng sa go nea thušo e le Morutiši—e lego leina leo ka tlwaelo a bego a bitšwa ka lona. Ga bjale puku ya Ithute go Morutiši yo Mogolo, yeo dithuto tša yona di theilwego dithutong tša Jesu e hwetšagala ka maleme a mantši bakeng sa go e diriša ge o ruta bana ba gago.

Puku ya Ithute go Morutiši yo Mogolo ga e hlalose feela ditekanyetšo tšeo di theilwego Lentšung la Modimo eupša gape e hlalosa taba e ngwadilwego ka go diriša diswantšho tše di fetago tše 160 tšeo di nago le dipotšišo tše di lebanyago. Ka mohlala, kgaolo 22 ya sehlogo se se rego “Lebaka Leo ka Lona re sa Swanelago go Bolela Maaka,” e na le seswantšho seo se bontšhitšwego go letlakala 32 la makasine wo. Mantšu ao a ngwadilwego mo seswantšho se se tšwelelago ka go yona a re: “Mohlomongwe mošemane o botša tatagwe gore: ‘Aowa, ga se ka raga kgwele ka ntlong.’ Eupša go thwe’ng ge e ba a dirile bjalo e le ka kgonthe? Na e be e tla ba mo go fošagetšego gore a bolele gore ga se a dira bjalo?”

Go na le dithuto tše matla tšeo le tšona di rutwago dikgaolong tšeo di nago le dihlogo tše di rego “Go Kwa go a go Šireletša,” “Re Swanetše go Ganetša Diteko,” “Thuto Mabapi le go ba ba Botho,” “Le ka Mohla o se ke wa ba Lehodu!,” “Na Meletlo ka Moka e Thabiša Modimo?,” “Kamoo o ka Thabišago Modimo ka Gona” le “Lebaka Leo ka Lona re Swanetšego go Šoma,” tše ke dikgaolo tše sego kae feela go tše 48 ka pukung yeo.

Ketapele ya puku ye e phetha ka gore: “Bana ka mo go kgethegilego ba nyaka go newa tlhahlo e lebišago mothopong wa bohlale ka moka e lego Tatago rena wa legodimong, Jehofa Modimo. Se ke seo Jesu, Morutiši yo Mogolo, a bego a se dira ka mehla. Re na le kholofelo e tletšego ya gore puku ye e tla thuša wena le lapa la gago go bopa maphelo a lena gore e be ao a kgahlago Jehofa, gore le tle le šegofatšwe ka mo go sa felego.” *

Go molaleng gore go ba tate yo botse go akaretša go beela bana ba gago mohlala o mobotse, go fetša nako e ntši o e-na le bona le go ba thuša go phela ka go dumelelana le ditekanyetšo tša Modimo go etša ge a di utolotše ka Beibeleng.

[Mongwalo wa ka tlase]

[Seswantšho go letlakala 24]

Gaešita le ge Viktor Gutshmidt a be a le kgolegong, o ile a kgona go ba tate yo botse

[Diswantšho go letlakala 24, 25]

Ge a be a golegetšwe tumelo ya gagwe, Viktor o ile a thala diswantšho tše bakeng sa go ruta bana ba gagwe

[Seswantšho go letlakala 25]

Barwedi ba Viktor ka 1965

[Seswantšho go letlakala 26]

Bo-tate ba swanetše go tšea karolo ka mafolofolo go ruteng bana ba bona