Dipapadi Tša Bana Leuba Le Lefsa La Bošoro

▪ Sehlopha sa barutwana ba sekolo se se phagamego se bokana gotee bakeng sa papadi ya kgwele ya maoto. Papadi e feleletša ka ntwa ya mašata yeo go yona batswadi ba ka godimo ga 100, bahlahli le dibapadi ba hlabilego mašata le go betša matswele ka morago ga nako ya kokeletšo ge sehlopha se sengwe se nweša gomme se fenya papading.

▪ Sehlopha sa bafsa bao ba lego nywageng ya bona ya pele ga mahlalagadi se bapala papadi ya kgwele yeo e bapalwago ke bašemane le banenyana. Ge sebapadi sa nywaga e lesome se wiša kgwele, mohlahli wa sona o ile a se lahlela fase gomme a se roba matsogo ka bobedi.

▪ Mohlahli wa sehlopha sa baseball sa Liki ya Bafsa o ntšha yo mongwe wa dibapadi tša gagwe papading. Tatago mošemane o tšhošetša ka gore o tla bolaya mohlahli gomme o ahlolelwa go dula kgolegong lebaka la matšatši a 45.

▪ Nakong ya go itlwaetša papading ya bana ya hockey ya lehlweng, bo-tate ba babedi ba thoma go ngangišana ka taba ya go dirišwa ga melao ya papadi. Tate yo mongwe o betha yo mongwe go fihlela a e-hwa ka pele ga bana ba gagwe ba bararo.

DIPEGO tše tšhošago tše swanago le tše di thomile go ata ka tsela e boifišago. Go bonagala leuba le lefsa la bošoro le thomile go aparetša mafelong a dipapadi, mapatlelong a basketball, mafelong a go thelela lehlweng le mabaleng a dipapadi. Ke bošoro bja batswadi le bahlahli bao ba  kgethago go lwa go e na le go fenywa papading. Jeffrey Leslie yo e lego mopresidente wa Mokgatlo wa tša Diatleletiki wa Jupiter-Tequesta (Florida) o re: “Ke ile ka bona batswadi ba kgadimola bana ba bona, ba ba hlohleletša ka matla gore ba ntšhe ka ga tšhwene; ka bona bana ba e-lwa dipapading ba hlohleleditšwe ke batswadi ba bona; ka bona bana ba lla ba le godimo ga totoma ya mobu ka ge batswadi ba bona ba ba lešitše dihlong.” O oketša ka gore: “Ga go selo seo se dirago gore batswadi ba itshware ka tsela e šoro gakaakaa go swana le dipapading tša bafsa.” Bakeng sa go šireletša bana bošorong bjo bo bjalo, ditšhaba tše dingwe di ile tša swanelwa ke go gata mogato o matla wa go thibela batswadi ba bangwe go ya dipapading tša bana ba bona.

Ke eng seo se bakilwego ke leuba le la bošoro? Fred Engh e lego mohlomi le mopresidente wa Setlamo sa Setšhaba sa Dipapadi tša Bafsa seo diofisi tša sona di lego Florida o re: “Boitshwaro bjo bjo bo hlabišago dihlong bja palo e golago ya batho ba bagolo bo senya dipapadi tša bafsa, bo senya lethabo le go fetišetša molaetša o sa kgahlišego go bana ba dimilione.”

Go Dira Selo le ge e le Sefe Bakeng sa go Fenya

Sebaki sa motheo sa bothata bjo go bonagala e le kganyogo ya batswadi ba bangwe ya go nyaka go bona bana ba bona ba phala ba bangwe le go dira selo le ge e le sefe bakeng sa go fenya. Moemedi wa Mokgatlo wa go Thibela go Gobošwa ga Bana kua Canada o re: “Ge go fenya e le yona pakane ya motheo, ge go ba matla e le yona pakane ya motheo, se se hlola boemo bjoo go bjona batho bao ba hlaselegago gabonolo ba tlaišegago. Dipapading tše, bana ke batho bao ba hlaselegago gabonolo.” Molaodi wa Mokgatlo wa Thuto ya Bophelo bjo Bobotse bja Mmele le tša Maphelo wa Ontario (Canada) o bolela gore bana bao ba lego ka tlase ga kgateletšo e bjalo “ba ka ba le mathata a monagano e sa le ba banyenyane. Gomme ge ba gola, [mo gongwe] ba ka thatafalelwa ke go lebeletšana le go palelwa.”

Ga go makatše ge kgalefo ya batswadi le bahlahli bao ba fišegelago thoko gantši e fetišetšwa go bo-radiatleletiki ba banyenyane ka bobona. Nakong ya papadi e nngwe ya volleyball ya banenyana, dibapadi di ile tša hlasela bo-malokwane ka makga a šupago. Ngwanenyana yo a ilego a ntšhwa phadišanong ya papadi ya thenise o ile a arabela ka go senya koloi ya molaodi. Ka morago ga go kgalelwa phošo, sebapadi sa papadi ya go penyana (wrestling) sa sekolo se se phagamego, se ile sa thula malokwane mo phatleng ka phatla ya sona gomme malokwane a idibala. Darrell Burnett, e lego setsebi sa malwetši a monagano a bana sa tša kalafo le setsebi sa tša monagano go tša dipapadi tša bafsa o re: “Go be go tlwaelegile gore dipapadi tša bafsa [e be e le] tšona lefelo le le šireletšegilego bakeng sa boitshwaro bjo bobotse papading. Ga go sa le bjalo. Ga e sa hlwa e le papadi feela.”

Seo Batswadi ba ka se Dirago

Batswadi ba swanetše go gopola gore lethabo le boitšhidullo ke mabaka ao a dirago gore bana ba thabele dipapadi. Ka gona go fetola dipapadi tša bana go ba modiro wo o bakago kgateletšego le go ba goboša ka mantšu ga go hole selo—e bile ga se go bontšha lerato. Beibele e re: “Lena Bô-tata-xo-bana! Le se kê la befediša bana ba lena.”—Ba-Efeso 6:4.

Ke eng seo se ka thušago motswadi go ba yo a leka-lekanego tabeng ye? Sa pele, e ka ba mo go holago go leka go gopola kamoo go bego go le ka gona ge o be o sa le yo mofsa. Na o be o kgona go bapala e le ka kgonthe go etša dikgwari dipapading? Na ke mo go kwagalago go lebelela gore morwa goba morwedi wa gago a dire bjalo? Go feta moo, “bana e sa le dirathane.” (Genesi 33:13) Le gona, leka go kgomarela pono e botse mabapi le taba ya go fenya goba go fenywa papading. Beibele e bitša phenkgišano e sa laolegego ‘lefeela le go phuthela moya ka kobo.’—Mmoledi 4:4.

Ka mohlala, yo e kilego ya ba sebapadi sa sehlopha sa baseball sa liki e kgolo o kgothaletša batswadi gore ba dule ba e-na le pono e botse mabapi le go fenya goba go fenywa papading, gomme ba se ke ba galefa kudu ge ngwana a sa bapale gabotse goba ba thaba kudu ge ngwana a fenya papading. Go e na le go dira gore go fenya e be selo se segolo, batswadi ba swanetše go lebiša tlhokomelo lethabong la bana la go holega ga bana ka go dula e le bao ba phetšego gabotse mmeleng.

Ka gona batswadi ba bangwe ba phethile ka gore dipapadi tše di rulagantšwego tša bana di atiša go hlohleletša moya o sa kgahlišego wa phadišano. Lega go le bjalo, se ga se bolele gore bana ba bona ga ba thabele go bapala le ba bangwe. Ka mohlala, batswadi ba bantši ba Bakriste ba hweditše gore bana ba bona ba thabela go bapala le badumedi-gotee le bona ka mafuri goba phakeng ya tikologong. Ka tsela ye batswadi ba kgona go ba le taolo e kgolo  tabeng ya batho bao bana ba bona ba gweranago le bona. Go intšha ga lapa go ka nea dibaka tše di oketšegilego bakeng sa papadi e agago. Ke therešo gore papadi ya ka mafuri mohlomongwe e ka se ke ya nea lethabo le le swanago le leo le hwetšwago ka go ba sehlopheng seo se fenyago. Lega go le bjalo, o se ke wa lebala gore ka tsela le ge e le efe “xo tlwaetša mmele xo hola xa-nyane fêla. Se se holaxo xohle ké borapedi.” (1 Timotheo 4:8) Ka go kgomarela pono e leka-lekanego ka dipapadi, o ka šireletša ngwana wa gago gore e se be mohlaselwa wa leuba le lefsa la bošoro.

[Diswantšho go letlakala 21]

Dipapadi e swanetše go ba tše di thabišago, e sego mothopo wa dithulano