Go Diriša Phafoga! ka Katlego

GE A e-na le nywaga e 16, Vanessa e lego yo mongwe wa Dihlatse tša Jehofa kua United States, o ile a swanelwa ke go ngwala pego ya sekolo ka taba yeo e lego mabapi le anorexia. O re: “Ke ile ka dira dinyakišišo eupša ka hwetša tsebišo e nyenyane feela. Ke ile ka boledišana le batswadi ba-ka ka taba ye, gomme ba šišinya gore ke nyakišiše taba ka dikgatišong tša rena.”

Ka go nyakišiša ka dikgatišong tša Dihlatse tša Jehofa, Vanessa o ile a kgona go hwetša tsebišo e ntši bakeng sa pego ya gagwe. O re: “Eupša se e be e le karolwana feela ya mošomo. Ke ile ka ba ka swanelwa ke go nea pego ya molomo ka pele ga morutišigadi le barutwana ba 20!” Vanessa o be a tla lebeletšana bjang le tlhohlo ye?

Ka go swana le Dihlatse tša Jehofa dikarolong ka moka tša lefase, Vanessa o amogela tlwaetšo ya go tlwaeletšwa go bolela phatlalatša Sekolong sa Bodiredi sa Pušo ya Modimo seo se swarelwago Holong ya Mmušo ya tikologong ya gabo. Vanessa o re: “Ka sekolo se, re hlangwa gabotse bakeng sa go ya bodireding le go boledišana le ba bangwe. Re bile re hwetša keletšo mabapi le seo re swanetšego go šomela go sona e le gore batho ba kgone go re kwešiša gakaone.” Mafelelo a mošomo wa Vanessa o mafolofolo pegong ya gagwe ya sekolo e bile afe? O re: “Ke ile ka hwetša dintlha tše di phagamego kudu.”

Vanessa ke o mongwe wa bafsa ba bantši bao ba dirišago dikgatišo tšeo di theilwego Beibeleng le tlwaetšo ya moya ka katlego. Bafsa ba bjalo ba swanetše go retwa ka gobane ba latela keletšo ya Mmoledi 12:1 e rego: “Xopola Mmopi wa xaxo Ò sa le yo mofsa.”