Bafsa ba Lego Mahlalagading Bao ba Nago le Bothata bja Boroko—Na ke Taba Yeo e Tshwenyago?

KA MONGWADI WA PHAFOGA! KUA CANADA

KURANTA ya Globe and Mail ya Canada e bolela gore go hlorega boroko go fokotša bokgoni bja monagano le kgopolo, gomme barutwana ba lego mahlalagading ba gare ga bao ba lego kotsing e kgolo. “Go hlorega boroko ga bana le bafsa ba lego mahlalagading go bile go tswalanywa le mathata a boitshwaro, go selekega le go ba mafolofolo ka mo go feteletšego.” Bo-ra-thutamahlale ba nyakišišitše ka mekgwa ya go robala ya barutwana ba sekolong se se phagamego bao e ka bago ba 2 200 gomme ba hwetša gore mo e ka bago ba 47 lekgolong ba be ba robala diiri tša ka tlase ga tše seswai tšeo di kgothaletšwago bakeng sa go robala bošego bjo bongwe le bjo bongwe.

Globe e bolela gore le ge tsela ya bona ya bophelo gantši e be e šitiša bafsa go robala boroko, “ba bangwe ba bona ba ka ba ba tlaišwa ke mathata a tša kalafo ao a sego a hlwa a hlahlobja. Go hema ka bothata (apnea) ge o robetše go kgoma bana bao e ka bago ba 4 lekgolong, bao ba nago le nywaga e 4 go iša go e 18.” Nakong ya ge o robetše, tsejana ya moya yeo e lego ka morago ga kodu e tswalelega ganyenyane goba ka mo go feletšego, ka go rialo ya šitiša go sepela ga oksitšene. Ka gona, bjoko ga bo khutše ka mo go feletšego, gomme bana ba tsoga ba lapile e bile ba selekegile.

Ditšhupo tša tšharakano yeo e ka bago e le gona di akaretša go gona goba go letša melotšana nakong ya ge o robetše, hlogo yeo e opago gantši mesong le mathata a go kgona go gopola le go tsepamiša kgopolo gotee le go robala mo go tšwelago pele le mo go feteletšego ga mosegare. Batswadi ba eletšwa gore ba fele ba theetša nako le nako ge bana ba bona ba robetše boroko. Dr. Robert Brouillette yo e lego setsebi sa malwetši a bana a boroko kua Montreal Children’s Hospital, o bolela gore ngwana yo a nago le tšharakano a ka kgaotša go hema ge a robetše gaešita le ge kgara e ka ba e fegelwa. “Go kgaotša ka gonyenyane go tla fedišwa ke go phafoga ga ngwana ge a tsoga goba a tsoga ka gonyenyane [le] go hema ka makga a sego kae pele a boela gape borokong.” Ditiragalo tše bjalo di ka direga ka makga a makgolo bošego bjo bongwe le bjo bongwe gomme tša dira gore ngwana a ikwe a feletšwe ke matla a go tsoga.

Mokgatlo wa tša go Hlorega Boroko wa Amerika o kgothaletša go dirišwa ga phapoši ya go robala yeo e fodilego, ya lefsifsi le yeo e se nago ditšhitišo tše bjalo ka dithelebišene goba di-computer. Le gona, go boloka lenaneo la ka mehla la go ya malaong le go tsoga go tla thuša bana le bafsa bao ba lego mahlalagading gore ba robale boroko bjo bobotse bošego. Ba bangwe bao ba nago le bothata bja go hema ge ba robetše, ba dirišitše motšhene wo o dulago o ntšha moya, woo o budulelago moya gabonolo dinkong le molomong bakeng sa go boloka bo-ka-morago bja kodu bo bulegile nakong ya ge ba robetše. Ngaka e nngwe ya malwetši a bana e boletše gore: “Boroko bo bohlokwa kudu go feta dijo tšeo re di jago. Bo bohlokwa kudu go feta boitšhidullo. Boroko bo laola dihomoune tša rena, maikwelo a rena le tshepedišo ya rena ya go lwantšha malwetši.”