Khutšo ya Lefase ga se Toro Feela!

GE E ba Alfred Nobel a be a ka gadima morago ngwaga-kgolong o fetilego, na o be a tla ikwa a e-na le kholofelo ka ditebelelo bakeng sa khutšo ya lefase? Ka ntle le pelaelo, o be a tla thabela go tseba gore ba bantši ba dirile maiteko ao a tšwago pelong bakeng sa go fediša ntwa. Lega go le bjalo, o be a tla be a lebeletšane le therešo e thata. Moprofesara Hugh Thomas o e akaretša gabotse ka gore: “Ngwaga-kgolo wa bo-20—le ge ka kakaretšo tšwelopele ya tša leago le mmušo o phagamego di kgomega ka maphelo a badiidi—e bile o bušwago ke dithunya, dikoloi tša ntwa, B-52, pomo ya nuclear gomme mafelelong ya ba dibetša tša go fofišwa. O swailwe ke dintwa tšeo go tšona go tšholotšwego madi a mantši le tšeo di sentšego go feta tša mehla le ge e le efe e mengwe.” Thomas o oketša ka gore “ka gona ye ke taba ya pono ya motho ka noši ge e ba mohla wo ka kgonthe o ka hlaloswa e le woo o gatelago pele goba go se bjalo.”

Na ditebelelo bakeng sa khutšo ya lefase di bonagala ga bjale e le tše dikgolwanyane ka ge re tsene ngwaga-kgolong wa bo-21? Le gatee! Ge o šupa go Ditlhaselo tša batšhošetši tšeo di diregilego ka September 11, 2001, kua New York City le kua Washington, D.C., makasine wa Newsweek o bolela gore: “Lefaseng leo difofane tša di-767 di kgonago go fetoga dibetša tše di hlahlwago tšeo di fofišwago, ga go na selo seo se bonagalago e le seo se sa kgonagalego, seo se se nago mohola—goba, se sešoro le go feta, e le seo se ka thibelwago gore se se direge.”

Ba bangwe ba bolela gore, gore khutšo ya lefase e be selo sa kgonthe, dilo tše pedi di swanetše go direga: Sa pele, go swanetšwe go dirwa diphetogo tše dikgolo kudu ponong le boitshwarong bja batho; gomme sa bobedi, ditšhaba ka moka di swanetše go kopana ka tlase ga mmušo o tee. Beibele e bolela e sa le pele ka nako yeo khutšo e tlago go fihlelelwa—eupša e sego ka maiteko a batho. Psalme 46:9 e bolela mabapi le Mmopi, Jehofa Modimo gore: “[Ke] Mo-fediša-dintwa xo fihla mafelong a lefase.” Modimo o tla fihlelela se bjang? Ka Mmušo wa gagwe, woo batho ba bantši bao ba botegago ba ilego ba o rapelela leboelela. Mmušo woo ga se boemo bjoo bo sa hlalosegego bja pelo, eupša ke mmušo wa kgonthe woo ka wona Modimo a tlago go hloma khutšo go fihla magomong a lefase. Moporofeta yo a buduletšwego Jesaya o boletše e sa le pele gore balata ba mmušo woo ba “tlo lesa xo ithuta xo hlabana.” (Jesaya 2:4) Ka lenaneo la thuto la lefase ka bophara, batho ba tla ithuta go phedišana ka khutšo gomme ke moo “ba tl’o xo tšea dithšoša ba rula mexomá ka tšôna, ba tšea marumô ba rula maxwêtla ka ôna.”

Gaešita le mo nakong ye, Dihlatse tša Jehofa di dira se. Di gana go emišetša magagabo tšona dibetša, gaešita le ge di e-tšwa merafong e mentši yeo e sa swanego gomme di phela dinageng tša ka godimo ga 200 tšeo di sa swanego. Boema-gare bja tšona lefaseng leo le sentšwego ke ntwa bo bontšha gore khutšo ga se selo seo se inaganelwago feela, eupša ke selo sa kgonthe.

Na o ka rata go ithuta mo go oketšegilego ka kholofelo ye yeo e theilwego Beibeleng ya khutšo ya kgonthe? Hle ngwalela bagatiši ba makasine wo, o diriša aterese yeo e lokeleditšwego go letlakala 5 ya kgaufsi le moo o dulago gona goba o ikopanye le Dihlatse tša Jehofa tša tikologong ya geno.