“Mohlomongwe mo Nakong ye o tla Fetoga”

ROXANA * ke mma yo a thabilego le yo a kgahlišago kudu wa bana ba bane yo a nyetšwego ke ngaka yeo e hlompšhago kudu kua Amerika Borwa. O re: “Monna wa-ka ke yo a kgahlišago go basadi, le yo a rategago go banna.” Eupša go na le lehlakore le le sa kgahlišego ka molekane wa Roxana leo gaešita le bagwera ba gagwe ba kgaufsi ba sa le bonego. “Ke motho yo šoro ka gae. Ke motho wa go ba le lehufa kudu.”

Sefahlego sa Roxana se bontšha gabotse go tshwenyega ge a dutše a tšwela pele ka pego ya gagwe. “Bothata bo thomile ka morago ga ge re sa tšwa go nyalana ka dibeke tše sego kae feela. Dikgaetšedi tša-ka le mma ba ile ba re etela, gomme ke ile ka ipshina ke bolela le go sega le bona. Eupša ge ba sepetše, monna wa-ka o ile a nkgoromeletša o šoro godimo ga sofa, a galefile o šoro. Ga ka kgolwa seo se bego se direga.”

Ka manyami, seo e be e fo ba feela mathomo a tlaišego ya Roxana, ka gobane ka nywaga e mentši, o ile a bethwa leboelela. Go bonala tlaišo e be e direga ka mokgwa o sa fetogego. Monna wa Roxana o be a mmetha, gomme ka morago a kgopele tshwarelo go tšwa pelong le go holofetša gore le ka mohla a ka se dire seo gape. Boitshwaro bja gagwe bo ile bja kaonefala—bonyenyane ka nako e teletšana. Ka morago, bošoro bo thome gape. Roxana o re: “Ke be ke dula ke nagana gore mohlomongwe mo nakong ye o tla fetoga. Gaešita le ge ke be ke tšhaba, ka mehla ke be ke boela go yena.”

Roxana o boifa gore ka letšatši le lengwe bošoro bja monna wa gagwe bo tla golela pele. O re: “O ile a tšhošetša ka go mmopolaya, a bolaye bana le go ipolaya. Ka nako e nngwe o ile a mpeeletša ka sekero molaleng. Nakong e nngwe gape o ile a ntšhošetša ka sethunya, a ntšhupa ka sona ka tsebeng gomme a se thuntšha! Ka mahlatse, se be se se na kolo, eupša ke ile ka nyaka go bolawa ke letšhogo.”

Tlwaelo ya go Homola

Go swana le Roxana, basadi ba dimilione lefaseng ka bophara ba tlaišega ka diatleng tša banna ba bašoro. * Bontši bja bona ba dula ba homotše ba sa bolele ka tlaišego ya bona. Ba bolela gore go bega taba go tla ipontšha e le ga lefeela. Go feta moo, bontši bja banna bao ba tlaišago ba fo gana  ditatofatšo ka dipolelo tše bjalo ka, “Mosadi wa-ka ke sefela-pelwana” goba, “O sekametše go feteletšeng dilo.”

Ke mo go nyamišago gore basadi ba bantši ba phela ka poifo ya ka mehla ya go hlaselwa lefelong leo ba swanetšego go ikwa ba šireletšegile kudu go lona—magae a bona ka noši. Lega go le bjalo, ka manyami, kwelobohloko gantši e bontšhwa mohlasedi go e na le mohlaselwa. Ka kgonthe, ba bangwe ga ba dumele gore monna yo a bonagalago e le yo a hlomphegago a ka betha molekane wa gagwe. Nagana ka seo se ilego sa diragalela mosadi yo a bitšwago Anita ge a be a bolela ka go se pepetletše ka kgobošo yeo a bego a e hwetša go monna wa gagwe yo a bego a hlomphega kudu. “Yo mongwe wa bao re tsebanago le bona o ile a re go nna: ‘O ka latofatša bjang monna yo bjalo yo a hlomphegago?’ Yo mongwe o ile a bolela gore ke swanetše go ba ke mo rumola ka tsela e itšego! Gaešita le ka morago ga ge monna wa-ka a pepentšhitšwe, ba bangwe ba bagwera ba-ka ba ile ba thoma go nkatoga. Ba be ba nagana gore ke be ke swanetše go kgotlelela ka gobane ‘yeo ke tsela yeo banna ba lego ka yona.’”

Go etša ge phihlelo ya Anita e bontšha, ba bantši ba hwetša go le thata go hwetša therešo e sa belaetšego ya go tlaišwa ga molekane. Ke eng seo se hlohleletšago monna go ba yo šoro kudu go mosadi yo a bolelago gore o a mo rata? Bahlaselwa ba bošoro ba ka thušwa bjang?

[Mengwalo ya ka tlase]

[Lepokisi/Seswantšho go letlakala 4]

Tekanyo e Kgolo ya Bošoro bja ka Gae

Go ya ka Boipolelo bja Ditšhaba tše Kopanego bja go Fedišwa ga Bošoro Kgahlanong le Basadi, lentšu “bošoro kgahlanong le basadi” le ka šupa go “tiro e nngwe le e nngwe yeo e ka feleletšago ka bošoro bjo bo theilwego go bong, goba yeo mohlomongwe e ka feleletšago ka go gobala mmeleng, ka tša botona le botshadi goba monaganong goba tlaišego basading go akaretša ditšhošetšo tša ditiro tše bjalo, kgapeletšo goba go thibelwa go hwetša tokologo ka boithatelo, go sa šetšwe gore di dirwa phatlalatša goba bophelong bja ka gae.” Gare ga dilo tše dingwe, bošoro bjo bo akaretša “bošoro bja mmeleng, bja dikopano tša botona le botshadi le bja monaganong bjo bo diregago ka gae le setšhabeng ka kakaretšo, go akaretša go bethwa, go gobošwa ka tša botona le botshadi ga bana ba banenyana, bošoro bjo bo tswalanago le ba bogadi, go katwa gare ga batho bao ba nyalanego, go ripša ga ditho tša bosadi le mekgwa e mengwe ya setšo yeo e lego kotsi basading.”