“Ka Dinako tše Dingwe ke Nagana Gore ke a Lora!”

Lourdes o bogetše motse ka lefasetere la phapoši ya gagwe, menwana ya gagwe e khupeditše molomo wa gagwe wo o theba-thebago. Ke mosadi wa Latin America yo a ilego a tlaišega nywaga e 20 ka diatleng tša Alfredo, monna wa gagwe yo šoro. Alfredo o ile a tutueletšega go fetoga. Lega go le bjalo, go sa dutše go le thata go Lourdes go bolela ka bohloko bja mmele le bja maikwelo bjo a ilego a bo kgotlelela.

Lourdes o bolela ka lentšwana la tlasana gore: “Go thomile dibeke tše pedi feela ka morago ga lenyalo la rena. Ka nako e nngwe o ile a nkgola meno a mabedi. Nakong e nngwe gape ke ile ka phema gomme letswele la gagwe la thuba lekase la diaparo. Eupša mantšu ao a bego a a bolela a be a kweša bohloko kudu. O be a mpitša ‘ditšhila tše di se nago mohola’ gomme a ntshwara bjalo ka ge eka ga ke na tlhaologanyo. Ke be ke nyaka go tloga, eupša ke be nka kgona bjang le bana ba bararo?”

Alfredo o swara legetla la Lounders ka borutho. O re: “Ke setswerere se segolo. Ke ile ka ikwa ke nyatšega ge ke be ke newa mangwalo a tlhokomedišo gomme ke newa taelo ya go hlokomelwa. Ke ile ka leka go fetoga, eupša go se go ye kae ke ile ka itshwara ka tsela e swanago gape.”

Dilo di ile tša fetoga bjang? Lourdes yo mo nakong ye a bonagalago a iketlile kudu o a hlalosa: “Mosadi wa lebenkeleng leo le lego sekhutlong ke yo mongwe wa Dihlatse tša Jehofa. O ile a ithapela go nthuša go kwešiša Beibele. Ke ile ka ithuta gore Jehofa Modimo o lebelela basadi e le ba bohlokwa. Ke ile ka thoma go kopanela diboka tša Dihlatse tša Jehofa, gaešita le ge mathomong seo se ile sa befediša Alfredo. E be e le phihlelo e mpsha go nna go fetša nako le bagwera Holong ya Mmušo. Ke ile ka makatšwa ke go lemoga gore nka kgona go ba le ditumelo tša-ka, ka di bolela ka bolokologi gaešita le go di ruta batho ba bangwe. Ke ile ka lemoga gore Modimo o ntebelela ke le yo bohlokwa. Se se ile sa nnea sebete.

“Go ile gwa ba le phetogo e kgolo yeo nka se tsogego ke e lebetše. Alfredo o be a sa dutše a e-ba gona Mmiseng wa Katholika ka Sontaga se sengwe le se sengwe, gomme o be a ganetša seo ke bego ke se dira le Dihlatse tša Jehofa. Ke ile ka mo lebelela thwii ka mahlong gomme ka bolela ka go thekga ditho eupša ka kgodišego ka re: ‘Alfredo, seo o se naganago ga se seo ke se naganago.’ Ka gona, ga se a ka a mpetha! Ka morago ga nako e sa fetšego pelo, ke ile ka kolobetšwa gomme ga se a ka a hlwa a mpetha gape ka nywaga e mehlano ga e sa le go tloga ka nako yeo.”

Eupša diphetogo tše dingwe tše dikgolo di be di sa letše ka pele. Alfredo o hlalosa gore: “Mo e ka bago nywaga e meraro ka morago ga ge Lourdes a kolobeditšwe, mošomi-gotee le nna yo e lego yo mongwe wa Dihlatse tša Jehofa o ile a ntaletša ntlong ya gagwe gomme a ntlhalosetša dilo tše di kgahlišago go tšwa ka Beibeleng. Ka ntle le go botša mosadi wa-ka, ke ile ka thoma go ithuta Beibele le yena. Go se go ye kae ke be ke sepela le Lourdes go ya dibokeng. Bontši bja dipolelo tšeo ke ilego ka di kwa moo di be di le mabapi le bophelo bja lapa gomme se gantši se be se ntlogelela maikwelo a go hlabja ke dihlong.”

Alfredo o ile a kgahlišwa ke go bona ditho tša phuthego, go akaretša banna ba fsiela lebato ka morago ga diboka. Ge a be a etetše magaeng a bona, o ile a bona banna ba thuša basadi ba bona go hlatswa dibjana. Ditiragalo tše tše nyenyane di ile tša bontšha Alfredo kamoo lerato la kgonthe le šomago ka gona.

Kapejana ka morago, Alfredo o ile a kolobetšwa gomme mo nakong ye yena le mosadi wa gagwe ba hlankela e le badiredi ba nako e tletšego. Lourdes o re: “Gantši o nthuša bakeng sa go hlwekiša tafola ka morago ga dijo le go alola malao. O a ntheta bakeng sa dijo tšeo ke di apeilego gomme o ntumelela gore ke dire dikgetho—bjalo ka mmino wo ke tla ratago go o theetša goba dilo tša ka ngwakong tšeo re tlago go di reka. Tše ke dilo tšeo Alfredo a sa kago a di dira le ge e le neng pele! Morago bjale, ka lekga la pele, o ile a nthekela ngatana ya matšoba. Ka dinako tše dingwe ke nagana gore ke a lora!”

 [Seswantšho go letlakala 10]

“Ke ile ka lemoga gore Modimo o ntebelela ke le yo bohlokwa. Se se ile sa nnea sebete”

[Seswantšho go letlakala 10]

Alfredo o ile a kgahlišwa ke go bona ditho tša phuthego, go akaretša banna, ba fsiela lebato ka morago ga diboka

[Seswantšho go letlakala 10]

O ile a bona banna ba thuša basadi ba bona go hlatswa dibjana

[Seswantšho go letlakala 10]

“Morago bjale, ka lekga la pele, o ile a nthekela ngatana ya matšoba”