Bafsa ba a Botšiša . . .

Nka ba Kgaufsi Bjang le Bo-rakgolo le Bo-makgolo?

“Bobedi bo-rakgolo le bo-makgolo ke baanegi ba dikanegelo. Dikanegelo tša bona di nthuša go kwešiša maikwelo a-ka.”—Joshua.

GO BE go e-na le dinako tšeo ka tšona go bego go tlwaelegile bakeng sa meloko e mmalwa ya ditho tša lapa gore e dule gotee—gantši ka legaeng le tee. Segwera sa kgaufsi le bo-rakgolo le bo-makgolo ba motho e be e le tsela ya bophelo.

Mehleng yeno, menabo e metelele e ka aroganya bafsa le bo-rakgolo le bo-makgolo ba bona. Go feta moo, dipalo tše di golago kudu tša malapa di thubja ke tlhalo. The Toronto Star e begile gore “bo-rakgolo le bo-makgolo gape e ka ba bahlaselwa ba tlhalo gomme ba šitišwa go bona ditlogolwana tša bona tšeo ba di ratago.” Maemong a mangwe, bothata ke gore bafsa ba bantši ba fo ba ba e-na le pono e fošagetšego ka batšofadi, ba ba lebelela e le bao ba se nago kwešišo ya mehla ya rena, e le bao ba nago le dipono, ba se nago mohola le bao ba sa kgonego go bona gore ba fapane kudu le bona. Mafelelo ke afe? Bafsa ba bantši ba tloga ba se kgaufsi le bo-rakgolo le bo-makgolo ba bona bjalo ka ge ba swanetše go ba kgaufsi le bona.

Se se a nyamiša. Go etša ge sehlogo se se fetilego lelokelelong le la dihlogo se bontšhitše, go ba le tswalano ya kgaufsi le bo-rakgolo le bo-makgolo ba motho—kudu-kudu ge e ba e le bao ba boifago Modimo—ke mo go kgahlišago, mo go holago le mo go thabišago. * Ngwanenyana wa mahlalagading yo a bitšwago Rebekah o bolela ka rakgolo’agwe le makgolo’agwe gore: “Re ka dula re sega gotee ka mehla.” Ka mo go swanago, mofsa yo a bitšwago Peter o re: “Ga ke boife go ba botša kamoo ke ikwago ka gona goba gore dipakane tša-ka ke dife. Ka dinako tše dingwe ke ikwa ke lokologile kudu ge ke e-na le bona go feta ge ke e-na le batswadi ba-ka. Ke nagana gore nka boledišana le bo-rakgolo le bo-makgolo ba-ka ka se sengwe le se sengwe.”

Go thwe’ng ka wena? Mohlomongwe o be o le kgaufsi le bo-rakgolo le bo-makgolo’ago ge o be o sa le yo monyenyane. Eupša gona bjale ka ge o le mofsa, e ka ba gore ga se wa dira mo gontši bakeng sa go godiša tswalano mo nakong ye. Ge e ba go le bjalo, molao wa motheo wa Beibele wo o lego go 2 Ba-Korinthe 6:11-13 o rego, ‘katološa’ leratong la gago la go ba rata, o ka dirišwa gabotse mo. Potšišo ke gore, Bjang?

Go Gata Mogato wa Pele

‘Go katološa’ go bolela go gata megato e itšego ya pele. Go feta moo, Beibele e re: “Yo a swanetšwexo ke tše botse O se mo hlokišê tšôna, xe ’atla sa xaxo sè kxôna xo di dira.” (Diema 3:27) Ge o be o sa le yo monyenyane, o ka no ba o be o  se na ‘matla’ a go dira selo se sengwe ka tswalano ya magareng ga bo-rakgolo’ago le bo-makgolo’ago. Eupša ga bjale ka ge o godile, mohlomongwe e bile o le motho yo a tšwilego mahlalagading, o ka hwetša gore go na le megato e mmalwa yeo o ka e gatago ka mo go swanetšego.

Ka mohlala, ge e ba bo-rakgolo’ago le bo-makgolo’ago ba dula kgaufsi le wena, o ka go dira mokgwa go ba etela ka mehla. Na go a tšwafiša? Mohlomongwe ge e ba o dula moo ka setu se se sa kgahlišego. Ka gona, thoma poledišano! Le ka boledišana ka eng? Molao wa motheo wa Beibele wo o lego go Ba-Filipi 2:4 o a thuša. E re botša gore ‘re se ke ra šetša tša go ikhola eupša re šetše tša go hola le ba bangwe.’ Ka mantšu a mangwe, bontšha kgahlego go bo-rakgolo’ago le bo-makgolo’ago. Dira gore ba bolele ka dilo tšeo ba tshwenyegago ka tšona. Ba ikwa bjang? Ke eng seo ba bego ba dutše ba se dira? Mohlomongwe ba ka thabela go bolela ka tša nakong e fetilego. Ka gona, ba botšiše gore bophelo bo be bo le bjang ge ba be ba sa le ba bafsa. Goba gore tatago goba mmago o be a le bjang ge e be e sa le yo mofsa? Ge e ba bo-rakgolo’ago le bo-makgolo’ago e le Bakriste, ba botšiše gore ke eng seo se ba gogetšego ditherešong tša Beibele.

Bo-rakgolo le bo-makgolo gantši ke dišego tše di humilego tša histori ya lapa gomme mohlomongwe ke bao ba ikemišeditšego kudu go go anegela dikanegelo tše di thabišago. Ka kgonthe, o ka ba wa nyaka go fetoša se tiragalo e thabišago. Leka go botšološiša bo-rakgolo’ago le bo-makgolo’ago, mohlomongwe o ngwale dintlha goba go gatiša ka khasete goba bidio. Ge e ba o sa kgonthišege ka seo o ka se botšišago, dira gore batswadi ba gago ba go thuše go hlama dipotšišo tše di swanetšego. Ka ntle le pelaelo, o tla ithuta dilo tše dintši tšeo di tlago go go thuša go kwešiša gabonolo bo-rakgolo’ago le bo-makgolo’ago, batswadi ba gago gaešita le wena ka noši. Joshua o bolela gore: “Bobedi bo-rakgolo’a-ka ke baanegi ba dikanegelo. Dikanegelo tša bona di nthuša go kwešiša maikwelo a-ka.”

Lega go le bjalo, o se ke wa lebala gore bo-rakgolo’ago le bo-makgolo’ago le bona ba kgahlegela kudu bophelo bja gago le mediro ya gago. Ge o ba botša seo o se dirago, o ba laletša gore e be karolo ya bophelo bja gago. Se ka ntle le pelaelo se tla dira gore le batamelane kgaufsi kudu. Mofsa wa kua Fora yo a bitšwago Igor o re: “Nna le makgolo re rata go nwa teye gotee lebenkeleng la go rekiša dilapološi, re bolele ka dilo tšeo bobedi re sa tšwago go di dira.”

Ke Eng Seo re ka se Dirago Gotee?

Ge le šetše le thomile go boledišana, mohlomongwe le ka tšwela pele go direng dilo gotee. Le e-na le seo le se nagannego pele, mohlomongwe le ka lemoga mehuta ka moka ya mediro yeo le ka e dirago gotee. Dara yo mofsa o gopola gore: “Bo-makgolo’a-ka ka bobedi ba nthutile go apea, go boloka dijo ka ditšhitswaneng, go paka, go bjala dibjalo le go šoma ka serapaneng.” Amy o ile a tlatša bo-rakgolo’agwe le bo-makgolo’agwe dipokanong tša lapa le maikhutšong. Go ithekgile ka nywaga ya bona, bo-rakgolo le bo-makgolo ba bangwe ke bao ba nago le mafolofolo kudu. Aaron o rata go bapala kolofo le makgolo’agwe. Joshua o rea dihlapi le go dira mediro e mengwe ya ka gae le bo-rakgolo’agwe.

Ge e ba bo-rakgolo’ago le bo-makgolo’ago e le barapedi ba Jehofa, e ka ba mo go thabišago kudu go tšea karolo dibopegong tša borapedi bja Jehofa le bona, tše bjalo ka go boledišana le ba bangwe ka Beibele. Igor o ile a sepela le makgolo’agwe go ya kopanong ya ditšhaba-tšhaba ya Dihlatse tša Jehofa kua Poland. O re: “E be e le phihlelo e sa lebalegego yeo re bego re kgona go e abelana, gomme re sa dutše re thabela go boledišana ka yona.” Ka kgonthe, ga se bo-rakgolo le bo-makgolo ka moka bao ba kgonago go sepela kudu. Lega go le bjalo, ke mo go swanetšego go fetša nako le bona.

Bohwa bja Moya

Mehleng ya Beibele, mosadi yo a bitšwago Loisa o ile a kgatha tema e bohlokwa go thušeng setlogolo sa gagwe Timotheo go ba monna yo kgahlišago wa Modimo. (2 Timotheo 1:5) Ga go makatše gore bo-rakgolo le bo-makgolo ba bantši ba Bakriste ba kgatha tema e bjalo lehono. Joshua o boletše mabapi le bo-rakgolo’agwe le bo-makgolo’agwe gore: “Ba hlanketše Jehofa nako e telele go feta yeo ke e phetšego, ka gona ke ba hlompha ka mo go tseneletšego e sego feela bjalo ka bo-rakgolo le bo-makgolo eupša e le babotegi.” Amy o re: “Bo-rakgolo le bo-makgolo ka mehla ba bolela kamoo ba kgothatšegago le go thaba ge ba mpona ke hlankela Jehofa ka potego. Lega go le bjalo, go bona mohlala wa bona o mobotse le phišego ya bona ka Jehofa e le babulamadibogo [baebangedi ba nako e tletšego], go nkgothaleditše go tšwela pele tirelong ya-ka ya bobulamadibogo.”

 Chris o bitša makgolo’agwe “motho yo a ntutueleditšego kudu go ithuta le go gola.” O oketša ka gore: “Le ka mohla nka se lebale mantšu a gagwe a gore ‘re swanetše go direla Jehofa sohle seo re ka se kgonago.’” Rakgolo le makgolo’a Pedro ba kgathile tema e kgolo kudu go goleng ga gagwe moyeng. O re: “Phihlelo ya bona e nthušitše kudu. Bo-rakgolo le bo-makgolo ka mehla ba be ba sepela le nna go ya boboleding gomme ke leboga seo kudu-kudu.” Ee, go batamela kgaufsi le bo-rakgolo le bo-makgolo bao ba boifago Modimo go ka go thuša go hlankela Modimo ka botlalo kudu.

Bo-rakgolo le Bo-makgolo Bao ba Dulago Kgole

Go thwe’ng ge e ba bo-rakgolo’ago le bo-makgolo’ago ba dula kgole kudu? Ge e ba go kgonega, leka go ba etela ka mehla. Dira seo o ka se kgonago go kgomarela kgokagano maetong a gago. Hornan o bona rakgolo’agwe le makgolo’agwe ka makga a mararo feela ka ngwaga, eupša o re: “Ke ba leletša mogala Sontaga se sengwe le se sengwe.” Dara yo le yena a dulago kgole kudu le bo-rakgolo’agwe le bo-makgolo’agwe o re: “Ba kgahlegela bophelo bja-ka, gomme re leletšana mogala goba ra ngwalelana E-mail beke e nngwe le e nngwe.” E-mail le go leletšana mogala ke tše di swanetšego, eupša o se ke wa nyenyefatša matla a mokgwa wa kgale wa lengwalo la go ngwalwa ka seatla. Bafsa ba bantši ba ile ba makatšwa ke go hwetša gore bo-rakgolo le bo-makgolo ba bona ba bolokile lengwalo le lengwe le le lengwe leo ba ilego ba ba ngwalela lona ga e sa le go tloga bjaneng bja bona. Mangwalo ao a ka balwa le go bušeletšwa—le go tšeelwa godimo. Ka gona, kgonthišega gore o a ngwala!

Bo-rakgolo le bo-makgolo gantši ba na le lerato le le kgethegilego la go rata ditlogolo tša bona. (Diema 17:6) Go na le ditsela tše dintši tša go aga le go boloka tswalano ya kgaufsi le bo-rakgolo’ago le bo-makgolo’ago, go sa šetšwe gore ba dula kgaufsi goba kgole. Dira boiteko ka mo o ka kgonago ka gona.

[Mongwalo wa ka tlase]