Bophelo bjo Bobotse Bakeng sa Bohle—Na ke Pakane e Fihlelelegago?

NA O kganyoga gore wena le lapa la gago le ka thabela bophelo bjo bokaone? Ee, o kganyoga seo. Eupša le ge ba bantši ba rena re ka tlaišwa ka sewelo ke malwetši a manyenyane feela, go dimilione tša batho bolwetši ke mogwera yo bohloko wa bophelo ka moka.

Lega go le bjalo, go dirwa maiteko a magolo bakeng sa go fokotša bolwetši. Nagana ka Mokgatlo wa Lefase wa tša Maphelo (WHO [World Health Organization]), e lego mokgatlo wa Ditšhaba tše Kopanego. Sebokeng seo se bego se thekgilwe ke WHO ka 1978, baemedi ba ba tšwago dinageng tše 134 le mekgatlong e 67 ya UN, ba ile ba dumelelana ka gore bophelo bjo bobotse ga se feela go lokologa bolwetšing. Ba boletše gore bophelo bjo bobotse ke “boemo bjo bo feletšego bja go phela gabotse mmeleng, monaganong le go tša leago.” Ke moka, baemedi ba ile ba gata mogato o tiilego wa go tsebatša bophelo bjo bobotse e le “tshwanelo ya motheo ya batho”! Ka gona, WHO e ile ya bea pakane ya go fihlelela “tekanyo e amogelegago ya bophelo bjo bobotse bakeng sa batho ka moka ba lefaseng.”

Pakane e bjalo ke yeo e ipiletšago gaešita le go hlomphega. Eupša ke bjang mohlomongwe seo se ka tsogago se fihleletšwe? Ka kgonthe maemong ka moka a boiteko bja motho, kalafo e bile e nngwe ya dilo tšeo di botwago kudu le go ratwa. Go ya ka kuranta ya Brithania ya The European, batho ba ka dinageng tša ka Bodikela ba ile ba gola ba tlwaetše “kgopolo ya kalafo ya setšo ya ‘phodišo ya mohlolo’: sehlare setee bakeng sa go rarolla bothata botee.” Ka mantšu a mangwe, bakeng sa bolwetši bjo bongwe le bjo bongwe, re letetše gore lefapha la tša kalafo le nee kalafo e bonolo le e lebanyago. Na ditsebi tša tša kalafo ruri di ka kgona go phethagatša ditebelelo tše bjalo tše phagamego?