Badudi ba Maweng ba Mehleng Yeno

KA MONGWALEDI WA PHAFOGA! LESOTHO

NA GO sa na le batho bao ba sa dulago maweng mehleng ya rena? Re hweditše ba bangwe Lesotho, nageng ya dithaba ka borwa bja Afrika. Motse wa bona, Ha Kome, o dikhilomithara tše ka bago 60 go tloga Maseru, motse-mošate wa Lesotho, thitong ya Dithaba tše telele tša Maluti. Nakong ya dikgwedi tša selemo, dipatoga tše tša thaba gantši di khupetšwa ke matšoba a bohwibidu bjo bo tagilego. Matšoba a a mabotse ao ka tlwaelo a tsebjago e le red-hot pokers [kniphofia caulenses], a nea phapano e bonagalago go dimela tše botse tše tala tša tikologo.

 Gona mo malapa a mantši a latela tsela ya go phela ya nywaga-kgolo. Ge e le gabotse ba aga magae a bona ka gare ga mawa a dipatoga tša dithaba. Dikota le didirišwa tše dingwe tše bjalo ka mahlaka di dira foreime e koto ya leboto la ka pele. Leboto le khupeditšwe ka motswako wa leraga le maloko a dikgomo. Tšhireletšo ye e nea tšhireletšego e itšego maregeng a tonyago a Lesotho, ge boemo bja leratadima bo ka ba ka tlase ga tekanyo ya go kgahla. Ka gare go na le lefelo leo le lego mo fase leo le bitšwago ifo, leo le bolelago gore “sebešo,” leo gape le dirišetšwago go nea borutho bjo itšego ge go tonya.

Tlhaka, leboto la ka morago, gantši le maboto a ka mathoko ka moka di hlamilwe ka lefsika la lewa ka bolona. A kgophiwa ka motswako wa leraga le boloko, gomme a kgophiwa ngwaga o mongwe le o mongwe. Se se tsenya mmala le sebopego se boreledi lefsikeng. Mekgopha ya dikgomo e kgabiša ka gare gape e dirišwa e le materase bakeng sa go robala.

Moeng wa ka Bodikela o tla hwetša tsela ye ya setšo ya go phela e le e lapološago ka mo go fapanego. Tsela e tlwaelegilego ya moaparo e akaretša dikobo tša mebala-bala le dikefa tše bjalo ka dikhoune tšeo di dirilwego ka bjang. Bašemane bao ba sa aparago dieta ba badiši gantši ba bonwa ba hlokometše mehlape ya bona. Banna ba motse ba ka bonwa ba šoma mašemong a bona a mafela goba ka phišego ba swaregile poledišanong le banna ba bangwe.

Dika tša thekinolotši ya mehleng yeno di bonagala ka sewelo. Sefofane se se nyenyane seo se fofago godimo ka sewelo gotee le dikoloi tša maotwana a mane tšeo di tlišago baeng maweng di kgahliša ba banyenyane le ba bagolo mo motseng. Gantši go apeelwa ka ntle ka dipitša tša tshipi tše diso tša maotwana a mararo mollong o bulegilego. Ka baka la go hlokega ga dikgong, dišu, mahlaka le makala a sego kae a mehlare di a dirišwa bakeng sa go gotša mollo. Didirišwa tša ka ntlong tšeo di tlwaelegilego tšeo di hwetšwago go badudi ba ba maweng di akaretša lwala la setšo bakeng sa go šila mabele le leho bakeng sa go hudua motepa wa mabele.

Lesotho e tsebega kudu ka diswantšho tšeo di thadilwego ke Barwana, tšeo di hwetšwago maweng a mantši le mafsikeng nageng ka moka. Barwana ke bona bao ka setlogo ba ilego ba dula maweng a Ha Kome. Diswantšho tša bona di bontšha tekanyo e kgolo ya mediro, go tloga go go rea ka dikepe le melaba bakeng so go oketša lebelo moo batšea-karolo mohlomongwe ba bego ba apara dišira-sefahlego tša diphoofolo. Diswantšho tša bona gape di swantšha diphoofolo tše bjalo ka ditšhwene, ditau, dikubu, le phofu e lego phala e kgolo kudu. Diswantšho tše dintši tša magaga a Ha Kome di nyameletše. Ke feela mašaledi a mangwe ao a šetšego bjalo ka segopotšo sa bokgabo bja Barwana.

Sehlopha sa Dihlatse tša Jehofa se swaregile ka modiro wa sona wa boboledi tikologong yeo e sego kgole kudu le Ha Kome. Nako le nako se etela badudi ba maweng bao ba tsebegago ka moya wa go amogela baeng. Dihlatse gantši di amogelwa ka sekotlelo sa motepa wa lefelong leo o bitšwago motoho. Ba bantši Ha Kome ba fišegela go amogela dipuku tša Beibele. Gantši ba bontšha tebogo ya bona bakeng sa dipuku ka go nea merogo, mae goba dilo tše dingwe bjalo ka moneelo bakeng sa modiro wa Dihlatse wa go ruta.

Badudi ba ba maweng ba mehleng yeno ba na le tlhompho e tseneletšego bakeng sa Beibele e bile ba rata go botšiša dipotšišo tše dintši mabapi le bophelo, lehu le ditumelo tša bona tša setšo. Modiro wa Dihlatse tše mafolofolo tikologong yeo o feleleditše ka dithuto tša Beibele tše mmalwa. Ka tsela ye, dipeu tša therešo di hweditše mobu o nonnego dipelong tša batho ba ba ikokobeditšego.—Mateo 13:8.

[Mmapa go letlakala 26]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

HA KOME