Leeto la Loida la go tšwa Boemong bja go Homola

Ka ge go anega mmago Loida

GO SWANA le mma yo mongwe le yo mongwe yo a letetšego go ba le ngwana, ke ile ka tshwenyega ka gore ngwana wa-ka o tla belegwa a e-na le mohuta o itšego wa bogole. Lega go le bjalo, ke be ke sa itokišeletša dillo tša Loida tšeo di kgomago pelo, ngwana wa-ka wa boraro, ge a dutše a e-tla lefaseng. Ka mo go sa lemogegego, ngaka e ile ya roba lerapo la Loida la mo molaleng ka didirišwa tša yona. Dibeke tše sego kae ka morago ga go buwa ga go bušetša sekeng, Loida o ile a romelwa gae. Lega go le bjalo, lethabo la rena e be e le la lebakanyana.

Nakong ya dikgwedi tše sego kae tše latelago, go ile gwa bonala gore go be go na le selo se sengwe seo se fošagetšego kudu. Dihlare tša Loida di ile tša baka karabelo e sa kgahlišego—go akaretša mpshikela, letšhollo le dithunthwane—le gona kalafo ya dika tše e ile ya bonala feela e dira maemo a gagwe gore a mpefale le go feta. Go se go ye kae Loida o be a sa kgone go laola mosepelo wa mmele wa gagwe. Mafelelong dingaka di ile tša re botša gore Loida o gobetše bjoko. Di ile tša re a ka se sa sepela goba go bolela—goba gaešita le go re kwešiša.

Maiteko a Kapejana Poledišanong

Go sa šetšwe ditebelelo tše nyamišago, ke be ke sa dutše ke dumela gore Loida o be a ka kwešiša dilo tše dintši. Ka gona ke ile ka mmalela dipuku tše bonolo le go leka go mo ruta ditlhaka. Eupša Loida o be a sa kgone go bolela, goba go bontšha leswao le ge e le lefe la go lemoga seo ke bego ke se bolela. Go be go se na tsela ya go tseba seo—ge e ba se le gona—a bego a ka se kwešiša.

Ge nywaga e dutše e feta, maiteko a-ka a go ruta Loida a be a bonala a sa atlege. Lega go le bjalo, ke ile ka tšea diiri tše dintši ke mmalela. Re ile ra ba ra mo akaretša thutong ya rena ya lapa ya Beibele le Noemí, morwedi wa rena yo monyenyane, re diriša dipuku tša Go Theeletša Morutiši o Mogolo le Puku Ya-ka ya Ditaba tša Beibele. * Ke ile ka balela Loida dikgaolo tše dintši go tšwa dipukung tše leboelela.

Go se kgone go boledišana le motho yo o mo ratago ke mo go ferekanyago e le ruri. Ge ke iša Loida phakeng, o be a lla kamoo a sa homotšegego. Ka baka la’ng? Go nna go ile gwa bonala eka o be a tlaišwa ke taba ya gore o be a ka se kgone go kitima le go raloka go swana le bana ba bangwe. Tiragalong e nngwe, Loida o ile a phula sello ge mogolo wa gagwe a be a mpalela selo se sengwe go tšwa pukung ya sekolo. Ka mo go lego molaleng, selo se sengwe se be se mo tshwenya, eupša ke be ke sa tsebe gore e be e le eng. Polelo ya Loida e be e lekanyeditšwe go fihla go medumo ya go se bolele gabotse, yeo e bego e bontšha dinyakwa tša motheo tša dijo, meetse, malao goba ntlwana.

Ge a na le nywaga e senyane Loida o ile a thoma go tsena sekolo sa bana bao ba nago le dinyakwa tše kgethegilego. Lega go le bjalo, nywageng e meraro  e latelago, boemo bja gagwe bo ile bja mpefala. O be a boifa le go sepela dikgato tše sego kae ka ntle le thušo, le gona o ile a nyaka a emiša go dira medumo le ge e le efe ya polelo. Nna le monna wa-ka re ile ra phetha ka gore go tla ba kaone go ruta Loida ka gae.

Nywageng e tshela e latelago, ke ile ka ruta Loida ka gohle kamoo nka kgonago ka gona. Ke be ke ngwala ditlhaka letlapeng, ke holofela gore Loida o tla di kopiša. Maiteko a-ka e be e le a lefeela. Na bothata e be e le go se kwešiše, goba e be e le gore Loida o be a sa kgone go laola mosepelo wa matsogo a gagwe?

Ge a na le nywaga e 18 Loida go be go le thata go mo laola mo e lego gore ke ile ka rapela Jehofa go tšwa pelong, ke mo kgopela gore a nthuše ke kgone go boledišana le morwedi wa-ka. Karabo ya thapelo ya-ka e tlile ka tsela e sa tlwaelegago.

Go Fediša go Homola

Phetogo e kgolo e tlile ge barwedi ba-ka ba be ba kgabiša phapoši ya rena ya go robala ka bofsa. Pele ga ge ba tloša pampiri ya kgale ya leboto, Noemí o ile a ngwala maina a itšego lebotong—maina ao a tšwago ka Beibeleng le maina a bagwera le ditho tša lapa. Ka go fo nyaka go tseba, morwedi wa-ka Rut o ile a botšiša Loida ge e ba a tseba moo “Jehofa” e ngwadilwego gona. Ka mo go makatšago, Loida o ile a ya lebotong gomme a bea hlogo ya gagwe kgaufsi le moo leina la Modimo le bego le tšwelela gona. Rut o ile a ipotšiša ge e ba Loida a be a ka kgona go lemoga maina a mangwe, ka gona o ile a mo leka. Ka mo go makaditšego Rut, Loida o be a kgona go hlaola le lengwe le le lengwe la ona—gaešita le maina ao a sa kago a a bona a ngwalwa pele! Rut o ile a bokanya lapa ka moka gore le tle le iponele. Loida o be a kgona go bala!

Ge nako e dutše e tšwela pele, re ile ra tšweletša mokgwa wo o bego o tla thuša Loida go “bolela” le rena. Re ile ra kgomaretša ditlhaka tša sehlopha sa mantšu lebotong la sefero sa rena se setelele. Go bea ditlhaka tše dinyenyane lepokising leo le swarwago ka letsogo go be go ka se šome, ka ge Loida a se na taolo e lekanego ya matsogo bakeng sa go šupa tlhaka e nngwe le e nngwe. Ka gona ge Loida a be a duma go bolela, o be a tla hlama molaetša wa gagwe ka go sepela a ye go tlhaka e nngwe le e nngwe e lego lebotong. Ka ge o ka nagana, se se be se tla lapiša e le ruri. Ge e le gabotse, Loida o be a swanetše go sepela dikhilomithara bakeng sa go no hlama letlakala le tee la poledišano, e bile go be go tšea diiri bakeng sa gore a le fetše!

Lega go le bjalo, Loida o thabetše go kgona go “bolela” le rena. Ge e le gabotse, wo e be e le molaetša wa gagwe wa mathomo go rena: “Ka thušo ya Jehofa, ke thabela gore gona bjale ke kgona go bolela.” Re tlabegile, re ile ra botšiša Loida gore: “O be o dira’ng nakong ya ge o be o dutše letšatši ka moka?” Loida o ile a re botša gore o be a nagana ka monaganong wa gagwe seo a bego a duma go re botša sona. Ruri, Loida o ile a bolela gore o be a duma go bolela lebakeng la nywaga e 18. O itše: “Ge Rut a be a thoma go ya sekolong, ke ile ka ipalela dipuku tša sekolo. Ke be ke šikinya molomo wa-ka gomme ke ntšha medumo e mengwe, eupša le be le sa nkwešiše. Ke ka baka leo gantši ke bego ke thoma go lla.”

Ke ile ka kgopela tshwarelo ke rothiša megokgo bakeng sa go se kgone go mo kwešiša gakaone. Loida o ile a araba ka gore: “O mma yo botse, e bile le ka mohla ga se wa fela pelo. Ka mehla ke be ke dula ke thabile ke le hleng ga gago. Ke go rata kudu-kudu. Ka gona o se sa lla. GO LOKILE?”

Tšwelopele ya Moya

Loida o be a šetše a na le tsebo ya Beibele, le gona o be a gopola ditemana tše dingwe tša Beibele ka hlogo. Eupša go se go ye kae o ile a re botša gore o be a nyaka go nea ditlhaloso Thutong ya Morokami ya phuthego, e lego poledišano ya Beibele ya beke le beke ya dipotšišo le dikarabo. Na o be a tla dira se bjang? Yo mongwe wa rena o be a tla mmalela sehlogo ka  moka. Ke moka Loida o be a tla kgetha potšišo yeo a bego a nyaka go e araba. Re be re mo ngwalela tlhaloso ya gagwe ge a dutše a re peletela yona. Ka gona ge re le dibokeng, yo mongwe wa rena o be a tla bala tlhaloso ya Loida. Loida o kile a re botša gore: “Ke mo go kgahlišago kudu go nna go kgona go tšea karolo ka gore go ntira gore ke ikwe ke le karolo ya phuthego.”

Ge a be a na le nywaga e 20, Loida o ile a bontšha kganyogo ya go kolobetšwa. Ge a be a botšišwa gore o tseba seo go ineela go Jehofa go se bolelago, Loida o ile a araba ka gore o šetše a dirile se nywaga e šupago e fetilego pejana—ge a be a na le nywaga e 13 feela. O itše: “Ke ile ka rapela Jehofa, gomme ka mmotša gore ke nyaka go mo hlankela ka mo go sa felego.” Ka August 2, 1997, Loida o ile a bontšha boineelo bja gagwe go Jehofa ka go kolobetšwa meetseng. Loida o ile a re botša gore: “Ka thušo ya Jehofa, kganyogo ya-ka e kgolo e phethagetše!”

Loida o thabela go bolela ka Mmušo wa Modimo go ba leloko le baagišani. Ka dinako tše dingwe o sepela le rena ge re dira boboledi go batho ba lego setarateng. E bile o lokišeditše le lengwalo leo re le tlogelago mojako ge e ba go se na motho ka gae. Loida o bontšha kgahlego e kgethegilego go batšofadi le bao ba babjago. Ka mohlala, ka phuthegong ya rena re na le kgaetšedi yo a kgaotšwego leoto. Loida o re boditše gore, “ke a tseba gore go bolelang go se kgone go sepela,” ka gona o ile a lokišetša lengwalo la kgothatšo bakeng sa kgaetšedi yo. Gape go na le Jairo, mošemane yo monyenyane phuthegong e nngwe, yo a hwilego ditho go tloga hlogong go theogela tlase. Ge Loida a e-kwa ka tlalelo ya gagwe, o ile a mo ngwalela lengwalo. Ka boripana, le itše: “Go se go ye kae Jehofa o tla re fodiša. Paradeiseng go ka se be le tlaišego. Nakong yeo re tla phadišana ka go kitima. Ke a sega ka gore e tla ba lethabo le legolo. Go nagana gore re tla ba ka tsela yeo Jehofa a re bopilego ka yona, ka ntle le malwetši . . . Na ga se mo go kgahlišago?”

O Thušitšwe go Kgotlelela

Gona bjale ke kwešiša dilo tše dintši mabapi le boitshwaro bja nako e fetilego bja Loida bjo bo bego bo mmakatša. Ka mohlala, Loida o re ge e be e sa le yo monyenyane o be a sa nyake go gokarelwa ka gore o be a tshwenyegile kudu. O itše: “Go be go bonala e le mo go sa lokago gore banabešo ba ka bolela le go ithuta dilo tšeo nna nka se kgonego go ithuta tšona. Ke be ke ikwa ke befetšwe kudu. Go be go na le dinako tšeo ka tšona ke bego ke bona go le kaone ge nkabe ke hwile.”

Gaešita le ge a na le mpho ya go bolela, Loida o lebeletšana le ditlhohlo tše dintši. Ka mohlala, kgwedi e nngwe le e nngwe goba nako e itšego o ba le dithunthwane ka go latelana moo a bonalago eka o a kgangwa gomme matsogo a gagwe le maoto a šikinyega ka mo go sa laolegego. Go oketša moo, go fetelwa le ge e le gofe—gaešita le go tonya mo go sa rego selo—go mo dira gore a fokole e le ruri. Ka makga a mantši, Loida o a gateletšega ka baka la maemo a gagwe. Ke eng seo se mo thušago go kgotlelela? E re a go botše ka mantšu a gagwe ka noši:

“Thapelo e bile thušo e kgolo kudu. Go bolela le Jehofa go ntira gore ke thabe, ke ikwe ke le kgaufsi le yena. Gape ke leboga lerato le šedi tšeo di tšwago go ba bangwe Holong ya Mmušo. Ke ikwa ke na le mahlatse gore go sa šetšwe mathata a-ka a mmele, ke godišitšwe ke batswadi ba babedi ba kgahlišago bao ba nthatago kudu. Nka se lebale seo banabešo ba ntiretšego sona. Ditlhaka tšela tše botse tše di bego di le lebotong di phološitše bophelo bja-ka. Bophelo bja-ka nkabe bo se na morero, ge nkabe e se ka lerato la Jehofa le lerato la lapa lešo.”

[Mongwalo wa ka tlase]

[Seswantšho go letlakala 24]

Loida le lapa la gabo